26個月大的成長報告

<2yr2mo>

踏入兩歲，依個月有D驚喜比我地，雖然bb話依然多，但都多了講其他的，尤其是樣樣野都叫"果個"。

驚喜係今個月終於識玩配對蛋及入形狀!

活動能力
1） 一仔自己搬d凳仔，然后企上凳仔，望下桌上有乜東東? 
又先企上張凳，再企上學習桌，成日又開又關廚房或廁所燈/抽氣扇的電掣。

2) 街市有番啤梨賣，第一天工人姐姐話一仔唔食，好彩我早估到，同時叫定工人姐姐到時可比番萍果。

第二天剛巧星期日我放假，一仔坐低見到唔係萍果，就叫"果果"，跟住起身拉我隻手一起去廚房，行了一個圈，唔見果果，最后一仔都肯食啤梨。

3）有一排無同一仔一起玩手抓板，原來一仔已識晒拼英文字母、數字、形狀、交通工具、12生肖，其中no. 1 最喜欢拼數字板，no. 2才係英文字母板。  

4） 上個月買了些磁石英文字母，原来都啱size拼入字母板里，一仔第一次見到，表情好驚奇咁。

5）不再幫一仔剷短頭髮了，一來因他大個仔，二來姨媽話唔好睇。

頭髮長了的一仔，每次洗完頭后，頭髮無以前咁快乾，上個月用風筒同一仔吹頭，都要抱实佢，经过一仔妈幾次自己吹頭都比一仔望住后，今個月一仔肯隔住一步距離企定定比吹頭髮，都唔驶抱实佢。

6) 以前一仔d鞋我地入膠袋放高處，出街時一仔會手指指對鞋。今個月，一仔媽專登將佢对鞋放係鞋柜最下層，出街時，一仔會自己拎，回到家，又會自己放番入鞋柜里。

7) 大人房床尾有張高身買木椅，一仔會爬上木椅，再爬上大人床。

8) 上個月玩配對蛋，一仔都好似唔識，今個月有一晚無意中見到一仔玩，才知佢原來已識玩啦!

9）以前一仔唔会瞓一仔爸個心口架，今個月居然有兩次，但第一次一仔爸居然話一仔重喎，個胃又唔舒服，所以一仔媽即刻比番自己個心口一仔瞓。第二次，一仔以为一仔爸係一仔媽，塊脸拧下左拧下右，發現無乜肉，唔好瞓，即刻閃走了。

10) 每個月都會見姨丈、姨媽，但每次都好似仍好陌生咁，但今次，姨丈、姨媽走時換番對鞋，一仔居然又拎番對拖鞋比姨媽穿，好似係話叫姨媽唔好咁快返屋企咁?

姨媽話一仔依樣似一仔媽小時候!

11) 一仔成日偷入廚房玩，一仔爸最后自製了廚房門欄，都有22吋高，整了幾天，一仔居然識搬張凳仔去門欄前，企上凳仔，再想伸脚跨入門欄里!

12） 將張學習桌/椅由走廊推到飯廳。

13）間中捉住媽媽塊脸，不停咁撞麻佢自己脸珠到，好似要媽媽不停錫佢咁。

14）細個時可以咬到自己脚趾公，有幾個月曾经見过一仔想咬，但隻脚屈唔到，原以为佢d骨头开始变硬，不似BB時咁柔軟，点知依個月又見到一仔咬到脚趾公。

15）喜欢從背面攬住一仔媽对脚，跟住一仔媽向前行。

16）继续做破坏王，玩具巴士一早已比一仔扔到無晒声，里面散晒，最近一仔学了原始人，用重型的車車玩具不停咁去撞d小型玩具，已经撞裂了幾個叠叠杯。

17) 發脾氣時，會不停擰頭，一仔爸怕一仔會擰親條頸，會用雙手hold住一仔個頭，唔比一仔擰，唔知其他bb會唔會咁呢?



說話:
曳曳、機機、巴士、果個、果果、覺覺(瞓覺)、好驚、驚驚、姐姐、dog、eight、nine、1、2、no

1) 有一晚一仔媽已瞓了，矇矓中聽到一仔叫"機機"，原來我未關上網，我妹LINE我，一仔原來亦未瞓，知電話響。

3) 上了床，在床上講"覺覺"。

4) 午覺中瞓瞓下哭醒了，叫"好驚"，我握住佢隻手仔，同時話媽媽係到，唔驚唔驚，好彩一仔又瞓番。

5) 工人姐姐去了街市買餸，回來開門時一仔媽在大人房換緊衫，在房中問”边個番黎？”估唔到在廳中的一仔居然会回应”姐姐”。

6）睇緊手机youtube，若突然有电話声响，一仔会喊，現在更会話”驚驚”添。


出牙:
可能出緊第17隻牙 >> 下排左面最后隻大牙，所以近幾天又唔比一仔媽用牙刷幫佢刷牙，好彩用手指刷仍肯。

唔知點解有時好似見到一仔下排排牙后面很黃呢?


食:
1) 自從見了健康院護士后，話食物整大粒d會比一仔咬多d，會幫助一仔說話能力，即時先將菜由切碎改為切粒，一仔又真係食到。

半個月后，亦將豬肉攪碎改為切粒，一仔又食到。

但一仔始終唔成個生果食，亦唔食菜幹。

2) 有一排無食啤梨，現在街市有得買，但一仔有時唔肯食。

3) 有好幾次晚飯，成碗飯一仔差不多食晒，再比少少奶佢飲，佢都推開支奶樽。

唔飲奶，要改補飲水，因一仔平時用自己的膠杯，只飲2、3啖，但用媽媽的玻璃杯，一仔會飲多d水。

4）自從一仔改晒唔食粥，會食飯后，好耐無再加芝士及淮山粉，於是早排試番將淮山粉加入米到，食麵或食麥皮時加芝士，希望一仔会长高d啦！

5) 一直無換奶樽，因希望一仔能成功戒甩奶樽，但一仔已兩歲了，仍未戒到，所以都係換晒d奶樽先。



如廁訓練:
1) 見天氣回暖，打算同一仔用番potty，點知連續幾天，一仔只會拎走個potty蓋，要佢坐落去，點都唔肯坐。

2) 之前係yahoo 拍賣了d 4層既戒片褲，95碼再試多次着，才發現大腿邊及檔位包得唔貼，怕會係大腿夾檔邊漏尿呀。

跟住上淘寶買，原來叫"防水褲"，一樣95碼，但大條好多，相信一仔今年都唔啱着。

要改去yahoo 拍賣再買些。


瞓覺:
1) 多數上午覺唔瞓，改下午一次過瞓2-3.5小時，

2) 喜歡瞓大人枕頭，尤其係一仔爸果個，比一仔媽的更厚身。

3) 有幾晚半夜突然喊醒，要幾分鍾后先可瞓得番。



沖涼
由一仔識坐開始，沖涼就坐起浴盤里，沖完時，我地準備好條大毛巾鋪係我地大腿上，一上水，就放在大腿上，即刻用先巾包好。

但現在一仔長高了咁多，條毛巾包唔晒，好容易滴水。

工人姐姐隔個星期日放假，一個月前，當一仔媽自己湊時，一仔沖完涼，會抱佢出水，企係浴盤旁，方便用毛巾抹。

起初一仔都會想伸腳入番浴盤里架。。。一個月后，一仔肯乖乖自已企出浴盤了。

唔知幾時先可以教到一仔唔再瞓係我地大腿上洗頭，改佢自己坐係浴盤里洗呢?

不過，我想應該要先教識佢"合上眼"依個指令先!