<3yr3mo>
一仔歲幾時係夏天，一仔肯坐potty，都成功在potty上殊殊及痾臭臭幾次，一仔又肯主動幫手搬potty，天氣漸涼時，停了potty training。
到兩歲幾的夏天，打算幫一仔再potty training，點知一仔完全唔肯坐potty，曾買了一個廁板樓梯，一仔只肯坐兩三秒。
到9月尾讀N班時，班主任幫一仔試了三個星期戒片，失敗收場!
一仔媽都好擔心，試過有間幼稚園在面試K1時，有話入讀時要已戒了片。
曾經在網上睇過一篇文章，居然話 3 - 4歲才是適合戒片(可惜搵唔番依篇文章)，果時一仔媽半信半疑。
5.1假期帶一仔出去玩了兩天，星期日晚及星期一早上一仔一提要返學，就扁晒咀，於是星期一替一仔請假，星期二請工人姐姐轉告班主任戒片要延期，點知班主任話唔緊要，照開始戒，估唔到今年再試，一試就成功了!!
抗戰又開始了，第一天(5月6日，三) 學校戒片
濕了面褲及底褲各三條、一對鞋及襪。
老師還教工人姐姐回家后只比一仔瞓覺時著片，其他時間只著面褲，又每十五至三十分鐘要叫一仔去廁所。
結果呢？
五點晏覺瞓醒后，濕了一條面褲，因一仔掛住玩手機。
由一仔媽七點半回到家至九點，一仔自己叫去廁所坐麻上廁所板，就算無廿次，都有十次以上，成功殊了三次+開了一次大。
一仔媽發現一仔今天著三角底底的皮膚位置有些紅，可能係一仔在學校痾濕了，幸好第二天無再紅。
抗戰第二天(五月七日，四)，估下結果先？
…
…
…
在學校時，完全無濕！
回到家，因掛住玩車仔，一仔自己叫得工人姐姐過來，去到廁所已濕了條面褲，一仔喊，工人姐姐同一仔講 ”唔緊要，我不會鬧你架”。
晏覺瞓醒了，一仔跟一仔爸、嫲嫲去酒樓攞定位食晩飯提早慶祝母親節，其間一仔成日話要去痾c，一仔爸同一仔講著了片咋，痾係片到啦，一仔都仍叫要去廁所，最后嫲嫲帶了一仔去廁所，係殊殊呀，唔係痾c，一仔好似未識分清楚殊殊定痾c？
晚飯其間一仔飲了起碼50ml水，又起碼45分鐘后才回到家，係屋企樓下大堂時，一仔摸住條褲，er了幾聲，很不安咁，入了升降機后又er，於是一仔媽抱起一仔，一回到家除了鞋，一仔已衝入廁所坐低，殊了好大篤，而片完全無濕，証明一仔忍了好耐!
由八點三回到家，到九點三換番片準備瞓覺期間，一仔主動叫去廁所差不多十次，成功殊了兩次+開大一次。
九點半入了房上床睇電視，到十點半瞓覺時，一仔見我地輪住去廁所，一仔亦叫要去，一仔媽心諗 "仔呀，你已有片，不是殊在片上嗎?" (昨晚一仔都係如以往殊在片上啊)。
估唔到一坐上廁板，一仔殊了好多，而塊片仍係乾架。
抗戰第三日(五月八日，五)
學校無濕片!
回家后有一次濕了面褲，因遲了打開個厠板樓梯。
瞓晏覺，工人姐姐唔記得幫一仔著番條片，但好彩一仔無殊殊。
白天成功去廁所開了兩次大。
一仔媽七點半回到家，一仔去了一次殊殊，之后食晚飯時飲了50ml水，由八點三食完飯到九點三著番片，期間平均十五分鐘主動叫去廁所，亦成功每次都有殊殊！
抗戰第四日(五月九日，六)
今天一仔唔駛返學，起床扭了五分鐘后，自己話去廁所，殊了好大篤。
一仔媽八點返工前，一仔更去廁所開了一次大。
一仔媽放工回家，工人話一仔全日只著面褲，包括瞓晏覺，都無濕褲。
今晚平均４５分鐘主動叫去廁所。
晩上九點三著番片準備入房上床睇電視時，一仔媽不經意同一仔講 "阿仔，現在仍要著片瞓覺，遲d 等你瞓覺都無殊殊，才不用著片啦！"
十點半睇完電視，一仔叫要去廁所，殊好大篤，片仍係乾架！
抗戰第五日(五月十日，星期日)
未夠七點一仔就醒了，可能他記得又掛住今早有街街去。
問一仔有無殊殊，佢話No，但過了幾秒，佢卻話要去廁所，殊了好大篤添，而塊片居然係乾！
莫非昨晚不經意的說話有效？
一仔爸問今早幾點出發？一仔媽話等麻一仔痾臭臭先，不負所望，一仔七點九主動話有臭臭，一辦完大事，我地就出發去食早餐，再去今日的目的地“調景嶺體育館室內兒童遊戲室”。
當然，一仔有著學習褲，掛住玩的一仔，居然可以到十點三完場時才要殊殊，遊戲室有兒童廁所，一仔成功企係到殊殊！
之后去了東港城，十一點半一仔又主動叫去廁所，商場雖有兒童廁所，但有小朋友用緊，因唔知要等幾耐，所以同一仔用普通廁所，因見廁塔只高了少少，所以論論盡盡的抱高一仔企係到殊，又成功了，直到十二點半回到家，一仔才再殊。
兩點半沖涼，一仔三點才瞓著，一仔媽唔似工人姐姐心口有個勇字，替一仔穿了學習褲才瞓，一仔居然瞓到七點才醒，醒了話去殊殊，學習褲又係乾的！
今天，一仔平均一小時去廁所殊殊一次。
抗戰第六日(五月十一日,星期一)
連續兩朝早夜片都係乾，七點起床后殊了好大篤，一小時內去廁所痾臭臭三次(以前一次過痾在片上)。
今天肯合作穿底底返學，無再扭，但仍不願返學(因戒片前的五一假期連玩了兩天后，一仔成日叫去街街)。
晏覺，一仔好配合心口掛個勇字的工人姐姐，無著片，齋穿面褲，無濕。
平均一小時主動叫去殊殊一次。
九點前最后一次飲水，九點半及十點半去殊殊，一仔媽問一仔今晚唔著片瞓，好唔好？一仔答好！
一仔媽同一仔講，如果今晚要殊殊，要叫醒媽媽同你去，唔好痾濕褲仔同張床呀！
結果...明天揭曉...
抗戰第七日(五月十二日，星期二)
今早一仔一起床，面褲無濕，一仔媽問一仔去唔去殊殊，佢答No，一仔媽隔幾秒后再問，一仔用行動表示要去，殊了超大篤，Yeah, 戒夜片都成功!
之后一仔坐低，唔夠一分鐘，一仔喊，捉住條褲話濕，原來有少少遺尿呀，一仔媽同一仔講唔緊要，換了褲就ok啦！
今日一仔逃學，跟了爸爸、姑媽、嫲嫲去飲茶，需穿了學習褲，一仔依然叫要去廁所，爸爸第一次帶一仔去兒童廁所！
總結，七日抗戰勝利，戒日片→戒夜片→戒出街片(下次可以試下短途唔著片)！！！
一仔，要繼續keep下去！！！
今次戒片順利，特別要感謝學校的班主任梁老師、多位姨姨及屋企的工人姐姐!
