2015年10月21日 星期三

乖乖剪頭髮

<3yr8mo>

可能一仔BB時第一次剪頭髮被一仔爸嘈吵的電剃刀嚇親,每次剪髮,一仔會大喊,好似剪到佢咁!


BB時用的電剃刀

自從上年一仔爸的剪髮師傅調來附近商場開工後,兩父子都改揾師傅剪。每次一仔要坐係一仔媽大腿上剪髮,又要準備盒菊花茶飲最初兩、三次,一仔爸媽都要出手固定一仔,之後幾次雖唔駛出手,但一仔仍然喊得好淒涼,全程都喊,好彩師傅剪得快手,十分鐘內剪完。

試過帶一仔去有車坐的髮型屋剪,喜歡玩車的一仔,都不肯坐車,最後都係由一仔媽抱住,一仔都係一邊剪一邊喊。

上一次剪髮係九月開學前,估不到隔了一個多月,今天再剪,一仔話要坐一仔爸大腿上,還肯乖乖坐定定,全程無喊,又唔駛飲菊花茶。


用剪刀剪無喊

用電剃刀剪亦無喊


剪完髮,一仔媽用濕紙巾幫一仔抹走髮碎時,一仔才喊了幾聲!

剪髮$85,但剪髮前買的釣魚玩具及剪髮後買的車仔,加麻比剪髮還貴!





2015年10月19日 星期一

讀出1-20 + 發骨節

<3yr8mo>

平時一仔瞓覺前,都要拎幾架車仔入睡房,一仔爸媽會要一仔數下拎了幾多架車仔及報總數,數錯了或報錯數,都要一仔拎番晒出廳,當然從未發生過,因一仔爸媽會畀機會一仔數過或提水報啱數。

以前都會臨瞓前同一仔再玩數數字,1-10,一仔已識,所以多數由11開始,一仔媽講11,一仔講12,輪住講落去...

有一排都無玩數數字了,這兩晚一仔發燒,睇完電視熄燈要瞓覺,一仔媽請一仔唱歌,一仔卻突然好正經又清晣由11數到20,叫一仔由1數起,亦數到,但當一仔爸準備好手機要拍低時,被一仔發現了,所以只拍到 11-20。




發骨節
除了早上有兩、三次肚㢌外,無其他不舒服,七月頭及八月尾都試過如此發燒兩、三天,之後量是高了,所以估今次又是因發骨節而發燒,但卻比上兩次高燒了些,第一晚半夜38.7度,第二晚半夜38.4度。

一仔肯乖乖飲藥水,但很抗拒貼退熱貼,所以會改貼頸後低一點的位置。

貼完,一仔會呱呱嘈一陣!

這3次發,一仔無其他不舒服,起初都是皆因見一仔正餐食野食少了才發現的。

希望今次燒完,一仔會有一米高啦,因一仔很想去冒險樂園坐碰碰車,但要有一米高才比坐!

2015年10月18日 星期日

長洲遊 + 巨泡/泡中泡

<3yr8mo>

原本打算執屋,一仔爸又突然提議去長洲,一仔平時成日叫去街,佢當然好想去,但昨天早上及今早一仔試過兩、三次肚痾
前幾個月一仔突然戒了片,一整包即棄的學習褲只用了幾片,一仔媽仍未畀人,再穿番學習褲,一仔無抗拒,仲話係"BB"。


去到中環碼頭,剛好有一班快船,每半小時一班船,快船及普通船輪住開。


依排電視晚上播"張保仔",我地當然要帶"一仔"去張保仔洞。

在這個小碼頭,右邊搭船去香港仔,左邊有船仔去張保仔洞,大小同價5元,落船時才畀船長,船程大約5分鐘。


此碼頭有幾個白色尖頂




沿山路行去保仔洞,大約十分鐘

落船的碼頭


沿路有指示牌


去到分岔口,右邊小路是入口,左邊是出口


洞口出面大約有20-30人排隊,排了15分鐘。


另一邊係山崖


洞口好窄,裏面有些位更窄,只容納到一個人行,若肥人入了去,一定前也不能,退也不能。



洞裏好黑,一仔爸用手機apps的電筒,一仔媽用風扇的電筒照明。



條小路又上又落,又有幾級木梯要擒上擒落,完全不是電視劇裏出現過的山洞。一仔爸有時要出手幫一仔,而一仔媽著了涼鞋行得麻麻,應穿波鞋。

大約行了五分鐘,就在洞口另一邊出來了。

落了山,見到沿住海皮走,可以行番去之前上船的碼頭。

路旁泊了些三輪車,打算租一架,問了附近小食店的職員,只有市中心才有三輪車租,我地唯有沿住海皮行,行了大約15分鐘才行到市中心。


食午飯,可能揾唔到一仔喜歡食的節瓜雞肉飯,一仔只食了幾啖飯餸。

食完飯,去租三輪車,揾了一間按金只需$100,租一小時$35的。





在市中心的大街小巷兜了一個小圈,租車時老板話踩到去碼頭的大街時,"車伕"要落地推車。


咁近距離見到一仔喜歡的消防局,當然要拍照。



還車後,去了大碼頭附近的大空地,兩旁有些小食店,有一、兩間好多人排隊,相信賣的小食有些口碑,我地當然亦排隊買來試下。






大魚蛋,無魚腥味,連一仔爸都肯食,好彈牙


買大魚蛋時,見到大空地中間有個大叔表演吹巨泡及泡中泡,吸引了好多人及小朋友圍觀。

巨泡

泡中泡



原來大叔的店子在後面不遠處,$40/支,大叔會教點玩




再去另一間買一串兩味的魚蛋,期間出了意外,當一仔媽替一仔爸手中的魚蛋影相時,突然鏡頭中的一仔爸不見了,原來路邊泊了一排單車,一仔挨了埋去,d 單車壓向一仔,一仔爸即刻飛甩手上的魚蛋,一手擋住d單車,另一手扶住一仔,好彩最後大人細路都無事,一仔受驚的喊了一陣,及再去買過魚蛋而已!



回程時,剛好趕到搭普通船,一仔兩父子在船上瞓了,落了船,先搭電車(好彩又有好心女士讓座),再轉地鐵返屋企。

回家途中,在唐記點心買了一仔喜歡食的北菇滑雞飯走豉油,但見一仔無食晒,胃口麻,幫一仔量溫度,37.7度! 之後星期一及星期二都有燒,因無咳、無鼻水,估應是發骨節,而星期三係重陽假期,不用返學,可以在家再休息多一天。








2015年10月17日 星期六

言語治療訓練(5、6)

<3yr7mo>


2015.9.26
今天玩穿繩(新玩具)、薯仔先生(第2堂玩過)、猩猩掛樹(新玩具)、捉老鼠(新玩具)、攪拌(新玩具)+食物((第3、4堂玩過),因為搵不到新玩具的相片,所以遲遲未動筆寫....

猩猩掛樹,在淘寶找到類似的,棵樹對,但不是相中的猴子,應是外形有趣些的猩猩,而且上堂時不見有跳板,可能阿sir沒有拎出來!?


2015.10.3, 3號風球,不用上堂。

2015.10.10,一仔媽有事,請假,原來這天阿sir因腸胃炎入了醫院,亦請了假。

2015.10.17
一開始,一仔媽同阿sir講覺得一仔講野有進步了,有時講到少少句子,阿sir話一仔講野有進步係正常。

今天又玩了些新玩具,見上次多款新玩具的相片搵不到,一仔媽今天問准阿sir影了些相。

玩具(1),攪拌(第5堂玩過)+食物((第3、4堂玩過),練講及考一仔那個食物"切左、未切?",切完食物,一仔會自動將食物放入攪拌機裏,阿sir再叫一仔按掣啟動攪拌機攪幾下,然後要一仔自已扮飲,又畀阿sir及一仔媽飲。




玩具(2),認卡,有兩張卡,一張卡有個蘋果未切,另一張個蘋果分開了兩半,練講及考一仔那張卡個蘋果"切左、未切?"

玩具(3),捉老鼠(第5堂玩過),有黑色及白色老鼠,阿sir拎出白色老鼠時,要一仔講"我既",當拎出黑色老鼠時,要一仔講"阿sir你既",再將所有老鼠倒在遊樂場上,有些老鼠反轉了,教一仔講"要反轉",反好晒,開動場,老鼠會在場上"走來走去",阿sir和一仔分別用支捧將老鼠"捉"入籃里。



玩具(4),認卡,有兩張卡,一張卡上小朋友塊面劃花了,另一張卡上小朋友塊面乾乾淨淨。

阿sir要一仔講及考一仔邊一張卡小朋友塊面係"未洗、洗左"?


玩具(5),Hello Kitty 拼圖,阿sir考一仔邊一個窿"擺左、未擺"不同Hello Kitty的家族成員?


玩具(6),芭蕾舞蹈員的衣服拼圖,阿sir考一仔邊一個窿"擺左、未擺"件衫及條裙?


玩具(7),泥膠(第2堂玩過)。


玩具(8),再玩番蘋果認卡,再考一仔那張個蘋果"切左、未切?"

臨落堂,一仔媽終記起同阿sir講一仔仍有講BB話,只有一仔自己明佢自已講緊什麼, 阿sir話雖然在一仔的年紀不應仍有BB話講,但一仔有時講到些有意思的說話,所以可以接受。

預告 2015.10.24 一仔學校旅行,2015.10.31 一仔媽請假,2015.11.7 阿sir請假,應是2015.11.14上第7堂。


參考
言語治療訓練(1)
言語治療訓練(2)
言語治療訓練(3)
言語治療訓練(4)

2015年10月10日 星期六

卡通印章

<3yr8mo>

一仔學校現在做功課有時要蓋印,於是上淘寶淘,剛收到,大約RMB12一套有6個印。


普通印章,有蓋,其中一套的三個

滾輪印章,有蓋,原來仲可以分體兩用的,若早知道,就不需買普通印章了


剛巧一仔爸執野,畀佢搵到這幾個陳年的叮噹印仔



題外話
上個月一仔媽的淘寶及支付寶戶口同時被人盜用了,賊人改了登入的密碼及電話號碼,一仔媽好辛苦用了兩小時才入番自已的戶口改番密碼及電話號碼。

賊人"好鬼崇"又古滑的買了好多野,因在平時“已買到的寶貝”中完全睇不到購買的資料,改要在左上角“訊息”中見到已發貨的物流訊息,才知賊人買了什麼!

而哪些未發貨的,真不知賊人還買了什麼?賊人還很猖狂的第二天又嘗試再登入....最後一仔媽去了警署備案,又call淘寶取消了兩個戶口。

奉勸各位,要提高警覺留意自己電郵及手提電話有無收到淘寶或支付寶戶口變動的通知,而變動不是自己提出的? 若好似一仔媽咁倒霉淘寶及支付寶的戶口被人盜用了,要即時call去淘寶(電話: 2215 5300)跟進

2015年10月3日 星期六

終於自己舀飯食

<3yr7mo>

由一歲半開始訓練一仔自己舀食野,終於現在成功了,由九月初到今天,晚餐"多數"都係一仔自己舀來食!


一歲半時,一仔可以左右手一齊用匙餵自己食,但從碗舀出果下,就由我地負責,之後想訓練一仔做麻舀出來的動作,唔成功,唔知點解仲演變成全程由我地又舀又餵!


平時一仔食野,會玩手提電話或ipad,初時見一仔食野好快,大約廿分鐘內食晒,便由得佢,但漸漸要半小時以上....


暑假前已間中同一仔講,七月起晚餐要佢餵自己食,食飯時亦唔可以玩手提電話,最後趁九月四日抗戰利假期帶一仔去冒險樂園的波波池玩,前一晚食晩餐前,同一仔講要佢自己食飯,第二天才有得去波波池,一仔話好。


但到開飯時,一仔出聲要工人餵,一仔媽話一仔要自己餵十啖先,一仔媽數一啖、兩啖、三啖...,見一仔自己繼續食下去,一仔媽當然由得一仔繼續食落去,哈哈!

第二晩,白天去完波波池,無藉口添,於是一仔媽又話一仔自己食十啖先,數數下...哈哈

第三晩,一仔媽索性拎走麻ipad,一仔媽要一仔食十啖先,十啖食完,一仔好似忘了要ipad, 反而一仔爸話唔好呃小朋友,要畀番ipad一仔,依個慈父呢!

第四晩,一仔爸不在家食晩飯,一仔媽同一仔講食完飯才有ipad玩,一仔又肯合作喎!

之後天天食晩飯,用上面同一個理由,一仔無再拎ipad玩了。

一仔餵自己食,有時只舀餸食,又要提才會用左手扶住個碗,所以我地要一邊食一邊監督住一仔食麻白飯。

以前每晩一仔會食一碗飯,有時會叫加飯添,自從要餵自己食,有時食了大半碗飯,一仔會話飽,改由我地接手餵番,佢又可以食晒成碗飯。

午餐呢,工人話一仔已有三個星期無拎電話出來玩。

早餐食麥皮及飲奶,仍由一仔媽餵,嗯,畀多少少蜜月期一仔吧,之後....


這個短片是第一天拍的,所以仍有ipad



另外,這個月飲藥水,一仔肯用量杯飲,不需再用針筒了。