N班開學 Week 3 及 8月返學的總结 + 七星茶

<2yr6mo>

依個星期要跟正常schedule 返學，即9am - 12pm，多數工人姐姐接送返學放學。

Hannah B 媽講得啱，小朋友病，大人都會病，一仔病完后，到一仔媽病了，所以對依個星期一仔返學的情況記得有d零碎。

星期一晚，還記得爸爸話覺得一仔返學后，好似開心左，因一仔回家后都講野多左。

星期二，一仔爸送返學，老師話一仔有喊少少，在課室里周圍走又擒課室里的矮柜。

星期三開始，一仔有時話驚，尤其是在媽媽返工前話驚，要攬住媽媽，之后8am食最喜歡的蘋果的時間，連續兩天一仔都唔肯食。

一仔晏覺及夜晚，又瞓得唔好，有時瞓覺發夢又話bye，又多了講驚驚，所以依兩天(星期四、五)朝早飲奶都加了保嬰丹，希望幫一仔定下驚。

爸爸話會否跟七月十四有關？但睇番月曆，剛好農曆八月了！

bb妹媽提議試下七星茶？

回家睇，有七星茶呀，但剛過了期十天，爸爸話照試下啦，又見第一次飲，不知會否敏感，所以晚上60ml奶只加了细半包飲。

第二天是星期六，早上改食水晶梨，一仔肯食，上午瞓覺，工人姐姐話ok。

星期六唔駛返學，早上一仔見媽媽同爸爸一起出門口時，一仔連忙入房揾書包孭。。。跟住喊住講bye bye 望住爸媽出門口。

依個星期最大的轉變就係一仔返學，由最初唔肯孭書包，到今天見爸媽出門口就肯孭書包，可能在一仔心中，已知孭書包就代表可以出街，但媽媽我見到，心有些酸呢，因明白一仔有多渴望可跟爸媽一起出門口，但媽媽平日要返工，只有星期六或日才可以同佢去街玩!

星期六日晚，媽媽拎一仔返學的書本出來 (因有功課要做了，但係比家長做，填父母對小朋友有什麼祝願、喜歡什麼等)，一仔都會睇下，尤其那頁有幾個同學仔搭住膊頭去洗手間，而且居然聽到一仔講"痾殊"呢!

一仔，希望返了學后，你會多了睇書啦!

依個星期，媽媽都好留意一仔返學放學既時間，然後透過手提電話接駁到web cam睇一仔係屋企返學放學既情況，每次睇，個心都有些感動。

返學時，睇到一仔換完衫后，都會乖乖坐定定比工人姐姐同佢穿襪穿鞋返學，其中星期二，媽媽預先叫工人姐姐整估一仔，專登唔好拎書包，到臨出門口前才問一仔書包呢?

點知一仔入房係拎去街的背袋!

到星期尾，一仔終於肯拎書包，孭住個書包出門口返學了!

放學呢，當工人姐姐幫一仔除了鞋襪后，一仔會乖乖跟工人姐姐去廁所洗手，然后自已坐係 low chair上等食午飯，食完飯，大概抖一個鍾，才去沖涼瞓晏覺。

有兩天爸爸在家等一仔放學，一仔一見到爸爸在屋企，都會好開心痴住爸爸。

但有一次爸爸要返工，無係屋企等一仔放學，由web cam中見到一仔入了屋后，就周圍望，um...佢應該係睇下爸爸會否在屋企呢!?

N班開學 Week 2 + 病

<2yr6mo>

Week 2 >需返學2小時，9-11am。


Day 4 (8月18日，一)
換校服及換鞋時有扭計事小，行去學校途中開始大喊 T _ T，入到課室依然大喊又拍門…

接放學時，爸爸"裝"到一仔係課室內自在地獨自玩緊，而有d同學仔仍喊緊。

出門一見到爸爸時，爸爸話一仔"例牌"喊兩聲，今次無話驚驚了，見到盒菊花茶更收晒喊聲!

工人姐姐話一仔瞓晏覺時發開口夢，都叫 Bye Bye，以前講Bye Bye都細細聲，依幾日講 Bye Bye講到好大聲!

Day 5 (8月19日，二)

無返学，因一仔發燒。

係疹所見到同班同學仔 - 同學仔昨天下午已开始發燒。

一仔應該係昨晚開始發燒，但粗心大意的一仔媽明明摸到一仔個額頭及頸背有D熱，手暖，腳涼，卻誤信一仔爸話可能冷氣機唔夠凍。

到爸爸早上5點多起身返工時，一仔媽才醒起曾聽過小朋友返學后會容易病，即刻替一仔探耳仔，真係38.4度!

連忙餵一仔食退燒藥、貼退熱貼在背脊(同事話貼額頭及頸后最有效，但一仔唔肯，又會用手撕番張貼呢)及用暖毛巾抹身。

到7點多時已退燒，但9點多睇完醫生后，下午升番37.7度，飲多一次退燒藥后，好彩無再發燒了。

Day 6 (8月20日，三)

雖已退燒，是日在家休息多一天。

Day 7 (8月21日，四) 
換衫及換鞋時都有反抗，唔肯孭書包，由工人姐姐送返學，行去學校時都有喊。

放学時，嫲嫲、小表姐、爸爸去接放学，無帶菊花茶，都無喊呀！

老師仲話其實一仔今早入左班房后，已無喊呢！


Day 8 (8月22日，五) 
學校開生日會，着便服返學，由工人姐姐單拖接送，返學途中有喊，放學無喊啦！

第二次去將軍澳泳池@寶琳站 + 大埔林村許願樹

<2yr6mo>

估唔到今個月有得再去游水，原本一仔爸想去動植物公園，但一仔嫲嫲想教孫仔游水，當然最后嫲嫲勝出，Yeah！

嫲嫲話自己游水麻麻，但小表姐在她的指導下，依個暑假，記得7月時小表姐學游蛙式時，心口要縛成塊浮板（應該係背面用的）。

今天，塊浮板可以拆剩只用一片了，及縛在背面了，游到最后15分鐘，小表姐不用浮板都游到幾步添。

一仔呢，有過上次嫲嫲抱住過水閘后大喊，今次改由媽媽抱住過水閘，盡量係近牆邊過，唔比d水淋到一仔。

過了水閘后，替一仔穿上新買的游水手袖（之前見到blog 友Kelly 播放仔仔小豆子戴住手袖係海里自己游水，好叻呀！），深水埗買，$35一對(之后見到一間賣$28咋)。

再套上水泡，慢慢帶一仔落水，由腳可踩地到深d水踩唔到地，一仔都有瓜瓜叫，但全程無大喊！

等一仔適應后，嫲嫲拎走水泡，抱住一仔，教佢郁下手腳。

一仔媽始终站在一段距離外，作為引一仔游水的目標。

期間，見到有一個小朋友，好似一仔咁大左右，穿住依件S型水泡，好似幾好，下面cool住條腰，個人一定浮出水面。

又去淺水區的滑梯玩了一陣。

平時喜歡去公園sir滑梯的一仔，今日次次要媽媽抱住才肯sir。

有一次，爸爸話比一仔坐前d自己sir，佢會在盡頭接住一仔。

结果。。。男人的說話可信，豬乸都會爬樹！

一仔成個人”潛”晒入水，而一仔爸企係旁邊！

好彩一仔無喊咋！

玩多一陣，已一個小時有多，就走人去飲茶。

係沐浴時，一仔才大喊，因他不慣用花酒洗頭沖涼。

媽媽去換衫時，一仔亦無大喊。

唔知下個月仲有無得去游水呢?

飲完茶后，今日要趕第二埸去大埔林村的許願樹。

寶牒$5一份一個人名，$20一扎香

許願牒$20一份一個人名

依棵唔係真樹了。

再回家有第三埸，又慶祝爸爸農曆生日，食蛋糕。

一仔眼甘甘望住個蛋糕，但一啖都唔肯食。

是日一仔瞓到六点，skip了5点小食無食，晚飯提早七点半食，可能肚餓，依晚一仔肯食麻肉食麻菜。

N班開學 Week 1

<2yr6mo>

半個月前已同一仔講返学好開心架，有得玩車車，好多波波玩，又有唱歌跳舞，仲可以同同學仔玩。

另講定比爸爸知一仔在以下情況會扭計時，唔可以拎出雞毛掃罰一仔。

1）換衫 > 會唔肯着。
2）着黑皮鞋或白波鞋 > 一仔只肯着姨媽送的藍色波鞋。
3）唔肯孭書包。
4）唔願行返學果条路既方向。

结果呢。。。

Week 1 >只需返學1小時。

Day 1 (8月12日，二)
10-11am，只有今天家長可以留低陪小朋友上堂。

九点半開始穿底衫時，好容易。

但穿校服時，有掙扎，穿完還想扯甩早扣在校服上的名牌。

穿黑皮鞋時，唔願穿。

唔肯孭書包。

行去學校途中開始扁咀，然后小喊。

去到學校，要捉住才量到額頭的體温。

入到課室，大喊，出番禮堂，媽媽和工人姐姐努力揾各款玩具氹一仔，最后成功讓一仔坐車車后才無喊，但已喊了差不多十分鐘。

十点夠鐘上堂，一仔和工人姐姐留在禮堂里，媽媽獨自入班房。

有個女同學由Daddy抱住，都喊，最后走了出去禮堂。

另有兩三個同學仔在旁邊玩玩具，其他同學仔都乖乖坐定定。

一班大约有25個同學。

有正、副班主任。

今天主要派書薄、胶杯、胶盒、學費袋（半日班$2300/月）、接送証。

班房坐滿晒家長和同學仔，好彩冷氣都夠。

大约十点九已講完，出到禮堂，一仔坐緊車車，無喊  >  記得之前和一仔去過一間學校面試，一仔和工人姐姐在外面等，但一仔勁喊，媽媽係課室里聽到都汗顏。

所以，今次一仔明顯有進步了。

見課室里仍有一個家長及同學仔，媽媽捉番一仔入課室，依一刻，一仔好有興趣玩課室里的玩具，過了一陣，叫一仔走，佢反而唔想走！

其間，媽媽同班主任傾計，班主任話小朋友初初返學喊好正常，快既，只喊兩星期。

媽媽又同班主任講一仔唔食零食，班主任一聽以為係我地唔比一仔食，我即時澄清，係一仔自己唔願食，但我地希望佢係學校跟其他同學一樣會食零食呀。

講講下，講到戒片一事上，我話一仔上年都肯坐potty，冬天時暫停后，今年一仔完全唔肯坐potty。。。。班主任話如果我想，她可以試下9月中幫一仔戒片，聽到依到，姑勿論到時戒片會否成功，都開心c媽媽我喇！！！

因之前係網上睇到BK有媽媽話小朋友戒緊片，點知學校老師叫番小朋友着片返學。

於是打電話去學校問，接電話的老師亦話學校唔會幫小朋友戒片，就算升上K1都唔會呀!

現在班主任話有得戒片，當場對學校的印象分升了N倍呀! 就算一仔返學仍會喊，都變成小事了!



Day 2 (8月13日，三)
9-10am，小朋友開始要獨自上堂，但紅雨警告，是日無須返學。



Day 3 (8月14日，四)
9-10am，一仔姨媽話挑戰才正式開始。

基本同 Day 1 差不多。

八点半开始穿底衫時，好容易。

但穿校服時，有掙扎。

穿黑皮鞋時，唔願穿。

行去學校途中開始扁咀，然后小喊。

行到中途時，今天肯孭書包。

去到學校，要捉住才量到額頭的體温。

入到課室，大喊，班主任即刻抱走一仔，關門。

門外，都有其他家長係到”裝下裝下”，但又明白唔可以比小朋友見到自己。

隱约中，見到一仔趁門开時竄了出來，一仔媽連忙閃身躲入班房旁的男廁里。

過了一陣，媽媽出番男廁時，下！見到一仔個背影，但点解一仔喊住攬住人地個媽媽既？

無理由喎，一仔怕陌生，應該唔会架？

但男孩個背影、髮型、黑皮鞋，都和一仔的好相似呀！

好彩，依個時候，一仔從另一邊走了出来！

哈哈，一仔媽差d認錯自己個仔呀！

跟住到九點夠鍾上堂時，校工姨姨請家長們離開，此時，一仔開始大喊...

放學時，爸媽一起入學校接一仔，爸爸係課室門的透明窿"裝"到一仔係課室里玩緊，無喊，但一仔一出了課室門，攪住媽媽后就開始喊，又話驚驚，好彩細心既爸爸帶定菊花茶比一仔飲，他才間中喊幾聲!

另外，唔知點解一仔成頭濕晒，可能佢係課室里喊左好耐?因一仔爸話見到有d同學個頭都係好濕。

是日晏覺，工人姐姐話一仔喊醒過一次。

接放學個刻，爸爸有拍低video，之后這幾天，一仔自己係媽媽部手機間中開來睇，每次睇到，都要攪住媽媽喊幾聲。




Day 4 (8月15日，五)
9-10am，爸爸話由佢單獨接送一仔返學放學喎，想睇下一仔會否情況好d?

Hm...返學時，係好d呀，入到班房后，一仔才喊到七彩

放学呢，爸爸帶定菊花茶接放学，一仔只喊了幾声！

昨天接放學時，成頭濕晒，今天只濕少少，估計因喊少了！

但是日晏覺，一仔喊醒過一次，仲係勁喊，更要攬實爸爸添。





後話
有過同一仔去幼稚園面試既經驗，之前好擔心一仔會勁喊。

上年又聽一仔姨媽講過，佢公司有個同事個小朋友讀既一間九龍區幼稚園，有同學仔喊左成個學期，最后學校叫家長下學期幫小朋友搵過第二間讀呀。

臨開學前幾天才上網揾小朋友返學喊既資料，原來都係好普遍，媽媽才沒那麼擔心，並希望一仔快D適應，返到學校唔好再喊啦!



題外話
1. 同同事講開，才知佢女兒讀果間的中學，年年都要換學生証，學校包影相及晒相，只需十元咋。

如果幼稚園都有依個十元影相及晒相既服務就好啦!

2. 學校有提供膠杯及膠盒給學生飲水及裝濕毛巾，每天帶返屋企后，家長當然要洗一洗，而學校都好細心，在膠杯及膠盒及蓋上都貼上了印有學生名及班別的貼紙，可惜第一次洗完，學生名及班別都化開晒，完全睇唔到。

好彩之前在淘寶訂購了些防水的貼紙!


學費等資料 (N班半日班)
留位費 $660
夏季運動校服 $150（一三五穿），校服$120（二四穿）
書包 $100
每月學費 $2300 x 12個月
半年書簿文具 $1580
半年生日會 $300
半年茶點 $720

靈隱寺@大嶼山

<2yr6mo>

一仔嫲嫲每年都会去靈隱寺拜佛，上年一仔爸認承了今年帶麻一仔去，好彩天公造美，無落雨，但一仔爸事后話寧願落下雨，因当天超熱呀，但我就話落雨去街，又拎住一袋二袋才麻煩！

九点半鐘开壇，嫲嫲話希望八点幾到，一仔爸又話大嶼山巴士好耐才有一班車，又怕撞着上班人潮撘車.....最后唔知醒，四点七扎醒左，好彩大部份野前一晚已準備好，但比人摷醒換片換衫的一仔就大喊，直到出門時才收声，幸好趕到預期5点出門去接嫲嫲及小表姐，六点到東涌，但商場餐廳未開，直到六点半才揾到已開門的大家樂。

貪方便，只帶了奶比一仔飲，當早餐。

第一次搭巴士，一仔好乖的，無扭计。

落了車，大约行5分鐘。

到了寺廟，一仔唔肯坐定定，走來走去，直到11点去食齋，一仔才乖乖坐係媽媽大脾上，由媽媽用筷子一啖一啖咁餵，足足食了兩碗白飯，唔肯食其他餸。

再搭巴士去大澳，5分鐘車程，但無位，一仔都肯乖乖獨自緊握扶手企係到，無扭计。

大澳有得搭船出海睇海豚，但一仔爸話坐船不安全，所以最后都無搭船。

小表姐買了大澳的大魚旦食，但揾唔到砵仔糕。

一仔當然痴飲洛神花茶(但同事話原來好"涼"，不太適合小朋友飲)、凍飲。

上番巴士搭去東涌時，一仔终於瞓着了。

但由東涌再坐車番屋企，一仔無瞓番！

坑口文曲里公園

<2yr6mo>

上上次去單車館兒童遊戲室，時間玩了大半后，一仔自己着鞋要走。

上次去坑口體育館兒童遊戲室，去到門口，一仔大喊，完全唔肯入去。

所以依排放假，改了去屋企附近的文曲里公園玩，之前都知公園里有小水池，卻不知道池里原來有好多魚及烏龜！

以前，新都城都有個室内鯉魚池，有條長橋，好多小朋友喜欢去睇錦鋰、烏龜，又在橋上跑來跑去，但后來拆了，实在十分可惜。

七月尾第一次去文曲里公園，一仔第一次自己孭背袋。

起初一仔唔肯孭，一仔媽要試範孭個黑色大背囊，一仔才肯孭小背袋。。。到時返学，唔知一仔肯唔肯孭書包呢？

昨天第二次去，臨出發前發现鞋柜里的吹泡泡棒，正呀！

因太熟，心口的熱痱似乎番发

講 fish fish!

數魚

泡泡唔食得架!

今天又去，一仔唔肯着媽媽为他準備好的”小李小龍”衫，最后改穿依套。

有個朋友見到一仔張相玩到面红红，問是否正常喎？

佢話小朋友只会玩到流晒汗，应不会面红？

各位媽媽，你地的小朋友係室内或室外，都会玩到面红嗎？

30個月大的成長報告

<2yr6mo>

活動能力
1）以前食晚飯時，一仔坐 high chair，由工人姐姐餵食飯。依個月，一仔手指指張飯桌，意思要和我地一齊坐係桌邊食飯，最初，還要坐係普通椅上，奈何唔夠高，最后都肯坐番high chair上。

有時等不及工人姐姐在旁準備飯餸，一仔會玩下咁自己筆少少飯食住先。

一仔呀，你幾時先肯完全自己筆飯食呢? 

2) 一仔有時一日咬人幾次，邊個教? 當然係一仔爸啦! 一仔媽最近已經警告一仔爸唔好再咬一仔，因怕一仔開學后咬同學呀!

3) 工人姐姐話一仔有時都肯幫手執玩具，但會喊住去執!

4）一仔細個時，一仔爸曾和一仔玩過"阿拉伯王子遊戲"，即用毛巾遮住一仔個頭，估唔到現在一仔都喜歡這樣同我地玩，用毛巾遮住我地個頭!

5）講故仔進度停滯了，因一仔媽有時都很倦，一上床就瞓覺了，反而一仔有時唔想瞓住，塞本書比一仔媽讀，想拖延瞓覺既時間。

6) 自從一仔爸"復出"用雞毛掃罰一仔后，一仔聽爸爸話多d，尤其當爸爸話 : 喂，電話好大聲! 一仔會即刻將電話音量調教細聲d，但轉頭趁我地唔留意時，偷偷地又將音量調高。

6）会主動幫爸爸泵骨，但泵幾下就收檔。


講野

依個月又講多了:
依個, 我要巴士(聽過一次), 唔該, 謝謝, Thanks(唔知有無聽錯?), fox, black, pink, brown, white, 唔執(指玩具), yes

之前一仔都識叫Papa mama，依排卻統一叫"媽子"

之前已識講:
yellow, blue, red, green, cat, dog, man, oh no, oh shxx,  cow, duck, Mickey, in, out, mama、papa，Mi(工人姐姐)、果個、果果(蘋果)、奶支(奶咀)、曳曳、部機(手機或毛巾)、波、巴士、奶奶、好驚、orange、嘩、扮"乞池"，"屋澳"，one、 2 、three、four、five、eight、nine、ten、A, apple, B, ball, CDE'符'fish, GIOPVXvv(即W)YZ，no，ok、鴨鴨, 汪汪（狗叫声），媽(即係姨媽)，我知，再見(明明應要講早抖，唔知點解會講"再見"?)、貓、對唔住



失踪無再講:
嫲嫲，我要入去， 唔入， 飲奶奶， 去边到, 依到


玩手提电話
1. 除了会玩Candy crush, 釣魚、迷宮外，今個月真係識玩射配对颜色。

2. 之前一仔玩緊电話，一仔媽話要借电話影相，一仔会瓜瓜嘈，去到8月头，一仔会幫媽媽按入相機模式，才比番电话妈媽。


戒奶樽進度
只可以早上用鴨咀杯飲奶，晚上堅持要用奶樽。

見一仔平時喜歡痴爸爸用礦泉水水樽飲水，一仔媽專登買了新水樽，樽口好似礦泉水水樽咁，第一晚，一仔肯用，第二晚唔肯用，還因為抗拒用，一仔倒后行時，頭撞到窗花，唉，似乎一仔未ready戒奶樽呀!

水樽可兩用

戒奶咀進度
同樣原地踏步，而且因為一仔成晚含住奶咀瞓，令到咀角兩邊長期有口水漬，兩邊咀角依排成日紅紅地添。

刷牙進度
之前一仔刷牙都係玩玩下，自從上個月買了一支香蕉味的牙膏，試了一啖，一仔就不願再用牙刷玩添，唉！

小破壞王
張low chair 塊桌比29磅既一仔踏爆了，一仔爸係桌面痴膠水，桌底用塊硬膠的手寫板頂住先。

小朋友生眼瘡/眼挑針

<2yr5mo>

第一晚，一仔媽以为一仔右眼有黑眼圈。

第二晚，白天嫲嫲帶了一仔出街玩（Yeah，一仔肯跟番嫲嫲去街了），一仔爸以为一仔比蚊咬。

第三晚，工人姐姐番开一仔的眼皮，見到有粒白色野。

一仔媽連忙上網揾資料，才知道小朋友容易生眼瘡/眼挑針，但通常会生在上眼蓋，而一仔係生係下眼角附近，原因可能用污糟手捽眼，輕微的可用熱水敷或用白菊花水抹眼，嚴重的要睇医生。

第四天（星期日）朝早，一仔爸返完通宵班回家，白色粒已”化开左”，唔知係好番中定更嚴重了? 

”化开左”?

正面望，明顯d

側面望，無咁明顯

一仔媽連忙去药材舖買白菊花煲水。

是日敷眼加抹眼3次，及一仔飲了十多啖菊花水。

第五天(星期一)敷加抹眼又3次，放工回家已見一仔隻眼無乜腫，已好番9成，但工人姐姐忘了留番些少菊花水，所以臨瞓前無再幫一仔抹眼(第4次)。

第六天(星期二)早上，一仔肯乖乖比棉片敷耐d，媽媽拎走棉片時，一仔手指指隻眼，媽媽乘機鵝一仔唔好再捽眼了。

好似已經好番晒了

白菊花10元

1) 手執少少，大约6朵花，用生水沖兩次，放入一碗水的煲內

2)细火煲5分鐘，水滾已变黄色及有一陣菊花味（網上話要煲10分鐘）。

3)用棉片濕了菊花水，揸乾大部份水（一煲完，水會十分熱，大约等一分鐘水降少少温度才好去敷眼），熱敷患處幾秒先（因一仔唔合作），再抹眼幾下。

4)再用第二塊棉片重複以上的動作。

10元，其實買5元都夠用

浸一浸+沖水2次

手誤執多了些花

部份用杯盛起，當天每次用時，倒些少入煲內煲滾，再熱敷及抹眼

參考資料:

眼瘡

Readandeat覆大家治眼瘡的土法
冰水退眼瘡

4歲兒童眼睛生瘡

左眼睛出問題，持續多天

煲菊花茶

煲菊花茶應該用邊種菊花

點煲菊花荼?

愛心杞子菊花茶

點煲菊花茶先唔苦

我想問點煮"菊花茶"嫁?

Paper Cutter (剪相器)

<2yr5mo>

這陣子為一仔準備學校相片及報K1相片，以前用界刀，要界好多下才界開晒d相。

之前在田鼠B媽 blog中見到 Yin B媽提到可買cut紙器，剛好有同事要在淘寶買東西，那可以夾埋一起用國際轉運，運費會平好多呀 (最后經4PX，所有野加麻4.56kg，由深圳去香港都係HK$51.08，不過星期五晚用PPS比運費后，到星期日下午5點才出庫，好彩都趕到星期一下班前收貨)!

印象中，在影相店只見過這款，成把刀，size又大，當然唔想買它拎番屋企。

估唔到係淘寶搵到依款，輕巧又安全又平，連運費(到深圳)RMB38

唔怕再界到手軟又界花張枱了!