2015年9月27日 星期日

搭纜車 + 大嶼山拜大佛 + 食齋

<3yr7mo>中秋節正日

一仔爸臨時加插行程搭纜車去大嶼山拜大佛及食齋,不然可以預早在網上訂票(早一日上網睇但亦已sold out, 可能因是星期日),慳返買票時間。

飲完茶、坐了一小時巴士去到東涌大約十點,好彩纜車站不太多人,排隊買票+排隊上車各需15分鐘,用匯豐或AEON卡有九折,因為一仔媽和小表姐都畏高,選擇了東通去程坐普通車廂warm up下先,昂平回程時才坐水晶車廂。

成人 $230
65歲長者出示身份証  $180
3-11歲兒童 $150

上了纜車(一架可坐8人)時,有專人替乘客影相,昂平落車後即在店子揀相,難得一仔正經望鏡頭,買了套裝,包一張相+兩個鎖匙扣(雙面)共$230,另送了一張優惠劵,可去市集店子再影相後送一張免費相片。



東涌落巴士時忘記去便利店買定飲品,在纜車站買支水要$15,去到東涌市集普通店子買罐可樂要$20,但原來再行前小小,有一間7-11便利店,一罐可樂正常價$7。


7-11便利店

纜車由東涌去昂平,車程大約15分鐘吧(忘了計時)?十一點半買到票,落車買相、穿過市集、買香拜佛,到買齊票時已一點半了。


市集沿路有四、五個立體佈景版供遊人影相。


有兩款套餐: 珍味素$98(六人),貴賓齋$138(七人)。

5歲以下不用買票,所以我地只買了4張珍味素齋票,保留張齋票收據,可免費去大佛睇舍利子,齋菜供應至6:30pm。


售齋票處

齋堂在白色小巴車頭方向


貴賓齋

珍味素


買完票即去齋堂,在接待處交齋票,不太多食客,仍有多張吉桌,我地5個人剛好一張小桌,有BB椅,好快有待應送上湯及餐點。

齋堂


我地的珍味原本一湯六餸,但因我地只買了4人票,只得一湯五餸,沒有了最後一款的腐竹餸,要5-6人票才包六餸,買票時售票員都無講呢,見鄰桌二個人的,只得三碟餸(好似)及細碟些。

齋菜好好味,連平時細食的小表姐,都大讚春卷好味,連食了兩、三舊。





期間一仔話去v v,一仔爸帶一仔去洗手間途中發現這間小食店賣糕點、炒米粉、齋卥味,但只可坐露天座位。





露天座位

食完,一仔嫲嫲揾地方坐低,一仔爸媽、一仔和小表姐就向208級的長樓梯出發,我地只用了5分鐘便上到樓梯頂,一仔些少倦意都無,勁!



在大佛兜了一個圈看風景後,便在蓮花底座入口去睇舍利子,只有兩層,好快便行完。



齋票收據

經過一個月返學、放學,天天都要上落少許樓梯,一仔現在已可一腳踏一級落樓梯,更甚者,到最後幾級樓梯,一仔可隔三級樓梯跳,真大膽!




有人話在這中央圓形廣埸上睇及拜大佛最好。



回程去市集揾送免費影相的店子,室內拍四個景,室外又影兩張,排隊影相及取相又各要15分鐘(因多人),一張4R免費,加一張要$100,兩張起有折,我地要了一張免費及加買了一張。


影相的店子

橙色底果張係優惠劵

一仔媽排隊影相時,一仔爸替一仔睇中了店里一套消防局包一架消防車的玩具套裝$298,買完相去付款買這套裝時,才知道店子做緊推廣,買滿二百元送一張相片及兩張許願卡,我地不想再排隊影相,職員好醒目的建議我地在剛才的相片中再揀一張便可。


左面係消防局



右面係警署







安裝時,全部冷氣機都安裝唔到

摺門好快畀一仔"拆斷"了


寫許願卡

                            掛在許願樹側的許願板上

回程搭水晶纜車,要再出示車票及帶上搭水晶纜車的手帶,另有一條隊專排水晶纜車。

有坐過普通車廂的經驗,回程坐水晶纜車,小表姐話唔驚,但一仔媽望住透明車底下的山景,可能有些層次感,仍有少許驚,但望海景時,無層次感,無驚。




山景

海景

返到東涌,等了廿分鐘才有巴士,好多乘客,已無晒雙人坐位,我地只好各自坐,上了巴士一陣,坐在一仔媽大腿上的一仔,好快便瞓著了,一小時的車程,一仔到落車時才睡醒!

正餐只食雞肉、烚蛋、節瓜、豬肉及菜芯的一仔,今天多數只食白飯及少少小白菜咋。




2015年9月19日 星期六

言語治療訓練(4)

<3yr7mo>


今天玩入豬仔錢箱、入柱、切生果、playskool波波、動物拖車、砌漢堡包、吹泡泡。

玩具(1),豬仔錢箱,練講"將錢放入錢箱"



玩具(2),入柱,練講"將圈放入柱到"

玩具(3),切生果, 第三堂曾玩過
阿sir話回家后可以用擦得甩的水彩筆畫花生果,當係污糟了,教及考一仔污糟了的生果係唔食得。


玩具(4),playskool波波, 第一堂曾玩過
阿sir另外拎出一個大波,間中會問一仔個大波可否入落遊戲機個窿裏,一仔識答唔可以。


玩具(5),動物拖車 : 一架電動拖車,車廂有一個個窿,要對應放入不同的動物,放對及放到後,動物會叫。



練講"將xx放入車到"


玩具(六),砌漢堡包, 第三堂曾玩過
今堂阿sir叫一仔放xx先,再放yy,睇下一仔識否跟指示做


玩具(七),吹泡泡,第二堂曾玩過,仍覺得好難吹到泡泡。


後話
今個星期覺得一仔講野係叻了少少,如曳曳時,我地會同一仔講"一仔瞓廳",之後一仔會改講"爸爸瞓廳"。

瞓覺時,一仔媽想同一仔再講多幾句,一仔會話“唔講,好攰,瞓覺“。

食晚飯時,一仔爸有時會和一仔媽閒話家常,一仔會突然講“唔講,食飯”。



參考
言語治療訓練(1)
言語治療訓練(2)
言語治療訓練(3)



言語治瘵療- 好書分享(1)

在網上揾言語治療資料時,無意間揾到這本書,有網上試閱,覺得幾好,剛好帶一仔去上言療堂可以繞路過去,便買了一本,$35,唔貴。





本書只有A4紙一半大,有21頁,一仔媽難得很快一天內便讀完,之前在ek 睇有些jm分享言遲的小朋友在上了密集式訓練後大有改善,當時不明白固中的原因及訓練,讀完這本書,加上陪一仔上了幾堂言療,深深明白書中講的技巧,可惜政府沒有提供這類昂貴的密集式訓練,只有讓小朋友排隊排特殊學校、早期訓練(俗稱e位)、幼兒園/幼稚園兼收位(俗稱i位),但往往要排起碼一年以上才有位呢。

這本書可以去"這個網址"訂購及郵寄,一仔媽不寫出機構名及書名,因不想好似賣廣告咁!

2015年9月12日 星期六

K1 - 由迎新日至first two weeks

<3yr7mo>

22/8(六),家長日+迎新日,1.5小時
之前已收到學校老師的whatsapp提醒去家長日。

可以用whatsapp 同老師聯絡,真係方便好多,當然,若沒什麼特別事,都不會騷擾老師!

離遠見到新學校的門口,一仔唔肯再行,又大喊,好彩今天分2組及2 parts, 我地果組屬於part 1 去音樂室唱歌先,期間玩吹及執假樹葉,吸引到一仔玩得很投入又開心。

Part 2 家長同小朋一起入課室聽班主任介紹返學的準備,一仔唔肯入課室,因佢見到禮堂有其他玩具,如車車、小型玩具屋,好彩一仔媽叫麻工人姐姐一起來(好讓工人熟悉帶一仔返學放學的路線),於是讓工人睇住一仔在禮堂玩,一仔媽獨自去聽書,由於課室門無關上,一仔有時會走入班房揾一仔媽。

回家後,問一仔返學好玩嗎?一仔話好玩!

一仔媽好擔心一仔不適應返新學校,因一仔好喜歡舊學校的班主任,舊學校和新學校返學的路線上半部份是相同的,擔心工人開學時帶一仔返學,一仔會扭行返舊學校,結果呢…


28/8(五),第一天返學,1小時,穿校服

前一晩,一仔嫲嫲畀定了一封利是一仔爸,要我地放係一仔書包裏面,好意頭!

離遠見到著住相同校服的同學仔,一仔居然好開心的跑上去,要一仔媽叫唔好再跑才停低。

今天一仔媽可以陪一仔上堂,班房裹有3個老師。

入到課室裏坐定,一仔識了第二個同學仔小張,一仔好乖的肯借出車仔比小張玩。

漏講了點識第一個同學仔,係blog 友個女勞小姐呀,同班呢!

今日分2 parts, part 1 老師在班房裹講故仔書,一班同學仔圍一個圈坐在椅子上,一仔要一仔媽在側邊陪住佢,好彩老師都畀。

一仔媽記得以前去其他學校面試時,亦有老師講故仔書,但一仔通常無興趣,會走左去玩玩具,令一仔媽十分擔心一仔有專注力的問題,但今天,估唔到一仔肯坐定(有八乘)聽老師講故仔,點解?

因老師講故仔的方法特別,除了好似其他學校老師咁拎住一本特大的故事書,逐頁掀逐頁講外,特別在每頁有小部份被一張紙仔遮住,老師要同學仔估下是什麼?然後請一個同學出來幫手打開張紙仔,再要同學講出是什麼? 令每個同學都有份參予,更投入聽老師講故仔!

一仔打開的係一隻簡筆畫的帆船,但之前未見過,一仔卻好有聯想力的將帆船上下倒轉睇,答係“遮”,一把打開的雨傘!

Part 2去音樂室唱歌玩遊戲,其中一個遊戲要同學們幫手拎住一塊好大的彩虹布拋下拋下,令到個個都玩到好開心。




臨走,一仔媽吸取了肚B媽分享的經驗,連忙和幾個同學仔媽媽交換電話號碼入谷。

原來有些同學仔以前同一仔同一間舊學校讀N班添,一仔媽唔認得d 同學仔,反而同學仔的媽媽認得一仔先!


31/8(一), 今個星期返一小時,今天生日會,著便服
工人姐姐帶一仔返學,一仔無喊,但入到班房後,一仔想要工人留低陪佢,工人即話去廁所而成功閃走了。


1/9(二),著運動服返學
同學媽媽谷裏報料話一仔唔肯入學校,工人話一仔扭要去波波池,入到課室,老師即畀玩具一仔玩,好讓工人成功閃走。


第一週總結
老師話一仔有喊住要工人陪佢入課室放書包,但工人走了后,佢又能夠乖乖地坐定上堂,無喊。

一仔急v時,亦會出聲去洗手間。


第二週總結,正常返三小時
一仔無喊,老師話一仔適應得很好,上課都投入,但依然唔食茶點,只飲飲品。


插曲
工人話試過兩次返學及放學,一仔和同學仔拖手仔一齊行,有一次還一邊行一邊唱歌!


一仔媽感想
一仔返N班時喊了一個月,K1返新學校,一仔媽起初好擔心,現在放心好多了,每晚問一仔返學好唔好玩,一仔多數答好玩; 問一仔返學開唔開心,一仔答開心。

一仔爸媽希望一仔繼續返學好玩、返學開心,可以認識更多同學仔,一起玩同學習,一齊成長,和睦相處!







2015年9月5日 星期六

言語治療訓練(3)

<3yr6mo>

中心姑娘早幾天前call 一仔媽,話阿sir 有事,今個星期要提早上堂,下堂亦要順延一星期才上堂。

但去到中心時,估唔到姑娘約了我地和另一個小朋友相同的上堂時間,既然如此,一堂時間有五十分鐘,一仔媽帶一仔去APM行但回程時卻遲了少少上堂!

星期五一仔話唔返學,話要去阿Sir到,但星期六去到,一仔見到阿sir時卻怕羞,叫錯了阿Sir個名!

今堂又有新玩具玩。

玩具(1), 砌漢堡包




Sir和一仔輪住將食物放上包到。

一來訓練"輪住玩"概念;

二來再練習講"畀xx我";

三來今次新講"放xx係yy到",如"放芝士係牛肉到"。

有些食物一仔未見過或未講過,如芝士及煙肉。

一仔有時會認錯芝士為薯片,其實無教過一仔薯片,應該之前係學校見過。

蕃茄和牛肉好似,一仔亦會認錯。

一仔對"係"及"到",有時會講唔到,阿Sir話這兩個字無什麼特別意思,所以對有言語遲綬的小朋友來講,是會較弱講這些字。

之前在家已留意到一仔對講"得唔得"中的"唔"或其他生字的中間字會講唔到,要加強訓練先。

四來阿Sir教新講"先放xx,然後yy",話一仔這個年紀可以明白先後次序的概念,一仔一半半做到,所以Sir話一仔可能係"靠估"多。


一仔媽建議
1) 回家後和一仔練習講"放xx係yy到",一仔好似好抗拒,屋企無漢堡包,但有大大小小不同的車輛,會改叫一仔"放的士係巴士上面"。

既然"到"無意思,難講d,咁改講"上面"有意思d,好似又好d; 

又或有時專登收埋d玩具,然後問一仔"係邊到?"一仔亦會跟住講"係邊到?",然後加長句子,要一仔跟住講"架巴士係邊到?"

工人姐姐在廚房,問一仔,工人姐姐"係邊到?"
引導一仔答"工人姐姐係廚房到"! 

之前一仔對講"畀"及"擺",有時會撈亂了,遲些當一仔學好了講"放xx係yy上面",再"xx係yy上面"及"xx係yy"吧!


2) 可以用不同顏色的積木,如"放黃色係藍色上面",可惜屋企太多玩具,已收麻積木玩具了。




玩具(2), 街道+馬路拼圖



好似手抓版咁,但這塊版係一幅街道+馬路圖,圖上還有幾個車窿,除了可以考小朋友是否對應到放對不同類型的車輪外,還可以讓小朋友模擬將車輪在馬路上行走。

又再訓練"輪住玩"概念及一仔講“畀xx我“及“放xx係馬路到。



玩具(3), 釣魚



這個電動釣魚機,開動后,魚口會一開一合,要趁魚口開時放支魚竿在魚口里,將魚勾上來。

魚絲有些特別,是一支膠棍,不是繩,容易操控。

阿sir 和一仔輪住釣魚,但釣魚機轉的速度有些快,於是阿sir見多魚口打開時,會停了釣魚機,讓一仔可以順利釣到魚。

釣完后,數下邊個釣得最多? 

每次玩完,一仔都會合作幫手收拾。


玩具(4), 切生果




一仔以前玩過,無難度,只係一仔喜歡將把刀上下倒轉拎(但屋企果把泥膠刀又不會倒轉拎,奇怪!)

切完,頭一、兩次阿sir 要一仔畀一仔媽或工人姐姐食生果,之後再切完,無大提示下,睇一仔會否記得都要畀一仔媽或工人姐姐食,好彩一仔都記得!


玩具(5), 畀一仔自己揀,佢揀玩番街道+馬路拼圖。

走時,一仔指住中心出面的公園滑梯,一仔媽雖趕時間,但都讓一仔玩了十分鐘才走。


後話
上了3堂,一仔的進步不太明顯,主要因一仔爸媽要返工,回家後能同一仔練習的時間不多,但一仔媽從上堂中學到技巧,亦會多留意一仔有什麼說話的弱點,再加強練習。



參考
言語治療訓練(1)
言語治療訓練(2)