兒童鋼琴書(2)

<2yr3mo>

估唔到咁快可以寫到下文添....一仔爸唔駛望住本琴譜(淘寶買)，都可以彈到"小星星"依首歌，還問有無第二首可以比佢彈?

趁一仔爸三分鍾熱度未冷卻，要盡快買番本香港版的兒歌琴譜先。

之前係大眾書局問過，無!

打電話去教協問，無!

好彩公司有個女同事識彈琴(好似8級以上)，佢建議我去通利琴行問下，而公司附近原來有間大間的(有兩層高)，亦終於買到本琴譜了!

選書既時候，本本書都有個薄薄既膠袋入住，好彩個職員話本本都可以自行拆開膠袋拎出來。

最后，搵到三本琴譜，但都只得蝌蚪文，無數字，亦無顏色，希望一仔爸都識睇。

第一本，$88，都認到好幾首歌，所以買了它

               第2本，$28咋，可惜只得幾首歌識，所以無買

第3本，$60，因趕住返公司，無詳細睇，亦無買，好似都有好幾首歌係識的

初次評估@尤德

<2yr3mo>

今年二月尾一仔返健康院檢查2歲說話能力，當時護士話要四月再見医生做跟進，醫生話要去尤德再做評估，好快就約到5月中做評估啦。

電話中職員已話個評估大約需時一小時，有什麼文件要帶，但第一次評估，小朋友不需要去。

我同一仔爸準時去到(其中一位家長去都可以)，第一次去收100元(之后每次60元)，要先填一份問卷(3頁)，見護士時交給護士。

等了一陣就見護士，吳護士(戴住個mask)起初有d cool，又講野大聲，唔似健康院個醫生咁nice。

吳護士要傾傾下先有d笑容。

主要問我地一仔講野既情況及其他的發展。

我地話一仔今個月講多了，如巴士、orange等，亦講到一半既英文字母及英文的數字。

但吳護士話英文字母及英文的數字很抽象，小朋友應該學講其他的單字先。

我心諗我地都知單字的重要，但一仔肯講英文字母及數字，都好過無啦!

我地話一仔有d野曾经講过一兩次，例如”我要入去”、”飲奶奶”，吳護士有d唔信，我地話剛巧有拍到video添。

吳護士講有自閉症的小朋友會偏好學某d野，但自閉症的定義好廣泛的，要睇麻其他野。

一仔和我地有眼神接觸嗎? 有!

和我地有玩有笑嗎?有!但我話一仔要9個月大先有笑，果次係睇緊李克勤主持的遊戲節目”決戰一分鐘”

會自轉360度嗎?有，間中，轉多個圈，轉既時候視線會望定一個方向(依個係一仔爸講，一仔媽都無留意到)。

用腳尖行路?有，間中。

吳護士問醫生話一仔有"社交技能問題"，知唔知指什麼?

我話可能係指學指令慢，有d野專登教一仔，一仔要一排先學会做，例如錫錫、bye bye，而現在都未好識指出眼耳口鼻，(回到家后，先諗起漏講了去幼稚園面試，一仔會扭計要走，要warm up下，先肯留低。又剛好睇了一集"天下父母心 - 與孩同行"，其中一集"媽媽，我怕...."，片中媽媽形容個女"活潑，但又慢熱"，好似一仔呀)。

聽指令去做野呢? 我地講有d野無教一仔，但一仔睇多幾次后，自動自覺会幫手做，例如上年夏天搬potty、拎奶樽去廚房比工人姐姐、瞓覺關電視、關燈等等。

吳護士話可能只係"習慣"，唔算係聽指令，要我地再留意下。

最后，吳護士話最少要等6至9個月先可見專業人士再跟進，到時一仔已返N班，相信講野方面會有改善，亦可請幼稚園老師幫忙留意一仔既情況。

另外，六月有個講座"語言技巧多面睇"，我同一仔爸都可以去。

如果去，登記時收60元。如果無身份証，要收3460元。

吳護士再比了一份四頁的問卷我地填，填完交比接待處后就走得。

回到家，睇番吳護士比既資料，原來依個中心都有網址，有d資料可以download pdf 檔案，其中有份講”語言發展遲缓”、"發展遲缓”，点解吳護士無比我地，亦無叫我地去睇下既？

  

依排好忙，去了图書館借書，揾下d資料点可以令一仔肯睇書，又睇”天下父母心”，吸收人地父母湊仔经验，又要報税，公司又忙，少了去其他blog友到睇blog呢！

依篇post，都要一個星期多先写好！

戒片行動@復活節假

<2yr2mo>

上年夏天同一仔用potty，只要有手提电話睇，一仔都会乖乖坐係potty到。

到秋天時，就收埋了個potty。

见天氣回暖，又再同一仔用potty，点知一仔唔肯坐，頂多会玩而拎走個potty蓋。

工人姐姐話買塊兒童厠板喎，經过千色店，買了一塊$7x，但回家放上大人廁板后，兒童厠板很鬆，很容易会前后郁到。

於是唯有拎番之前買落既廁板連樓梯。

一仔似乎对廁板連樓梯的興趣大好多，可能平時有陪一仔媽去廁所，但第一天試用時便出師不利。

話試用，唔係真係坐上去后直接vv，只係比一仔試坐，唔想好似坐potty咁，一仔連坐都唔肯坐。

第一天，set好廁板連樓梯好，一仔走入廁所時click 到門檻，差d卜到，一仔喊住出番廁所。

第二天，一仔只肯坐在樓梯上。

第三天，一仔媽自己坐上去先，一個冬天肥了十磅的一仔媽，差d攝住左，起唔到身。

跟住一仔上了樓梯，由一仔媽幫忙轉身坐上廁板上，一仔握住兩边扶手，但坐得好前。

第四天，一仔上了樓梯，識自己轉手及轉身坐上廁板。

第五天踏入復活節假的第一天，一仔坐上廁板后，一仔媽話坐后d，一仔都識坐后d。

之后幾天試，都係失敗結局。

兒童鋼琴書(1)

<2yr3mo>

見一仔有時有興趣玩手機apps的彈琴及玩玩具電子琴，一仔媽上淘寶搵下，又搵到"兒童鋼琴書 "喎。

第一本

第二本

不過，好多歌都未聽過，間中搵到一兩首識的，同一個歌名，但d歌詞同我地聽慣既就唔一樣。

或者，要去香港的書局買d香港版的幼稚園或小學版的音樂書?

一仔媽連唱歌都走音，學彈琴依個重任，當然交比識彈半首歌的一仔爸，唔知等到幾時一仔爸先會教一仔彈呢?

27個月大的成長報告

<2yr3mo>

活動能力
1）上個月漏写了一仔有時会成日捉住媽媽隻手去摸佢脚趾公既趾甲，睇下有無反甲而要剪？

好乖會坐係到比一仔媽幫佢剪指/趾甲。

2）教了一個月，一仔终於識同人飛吻了，總要飛到有聲果隻。

3）原本以为一仔喜欢瞓大人枕頭，但原來佢都喜欢瞓媽媽早前買比佢既兒童枕頭，当一仔爸返中班和夜班時，一仔可以霸了爸爸個床位瞓，由bb房拎了一仔個枕頭去大人房后，一仔識將自己個枕頭放係爸爸原本的枕頭位置上，如果反轉了無公仔果面，又会反番轉要有公仔果面。

4）間中当玩的，都肯執番玩具入玩具箱里，但一仔始终最like倒晒d玩具出來。

5） 今次淘了塊大的神奇畫板，包括一些副助工具，副助工具未比一仔玩住。

一仔都好喜欢自己拎它出來畫，但揸笔既手摯就唔正確，緊唔緊要的呢？因見有学券的幼稚園要K2才开始学写字。

6）星期日趁一仔爸返中班，上午一起去公園玩sir滑梯，一仔媽中途要除件外套，然后縳係條腰到，点知玩sir滑梯時件外套勾住左，一仔爸見到一仔都幫手解开呢！

7） 去街坐一仔爸架車，平時都係直接抱一仔落car seat 到坐，有一日只得一仔爸和一仔去街，估唔到一仔原來已識自己擒上car seat，然后自己坐好比一仔爸幫佢戴安全带。

8) 上個月廚房加了門欄，一仔幾天后已識專登搬張凳仔，然后企上凳仔上，想用腳跨過門欄。

今個月，有時唔用凳仔，直接學我地用腳跨過門欄，好彩一仔唔夠高，但相信好快佢會成功，就好似果時佢想擒出網床咁。

9）教了一仔幾個月指出五官，一仔剩係間中指下我地個鼻，唔算識！

有一晚瞓觉，將把声得意d同佢講，加麻手勢順住”眼耳口鼻”咁指，点知第三晚一仔識番”眼耳口鼻”順住指！

但間中同佢玩，都唔係次次指到。

10) 多了拎住布公仔及巧虎及小花一起玩。

11）飲完奶，又主动番拎個奶樽去廚房比工人姐姐，有時會整古工人姐姐添，見工人姐姐伸手要拎走個奶樽，一仔會笑住咁縮開!

食完飯，又肯幫手將桌布夾放入櫃桶里、由大人房搬番張大班椅去客廳。

一仔，那你幾時先肯主動收拾玩具呢？



瞓覺
1) 因為白天要戒片，早上多數無瞓觉了。

2) 某一晚忽然發現依一個月的夜晚瞓觉習慣在不知不觉中改變了，以前一上床后，还会比一仔睇一陣手機的youtube。

最近一話瞓觉，一仔会自动拎部手提电話放入房中個柜桶里，再返去客廳关电视，我話要同工人姐姐講good night， 一仔会指住雪柜頂個奶咀盒仔講”果個”，我就会迫佢講”奶支支”先，一仔会细细声講”奶支”或”支支”。

去到睡房門前，一仔会幫手拎走防夾手夾、关門、上床关燈！

3) 若一仔發现床上有玩具，我会話瞓觉啦，唔玩玩具，玩具要比媽媽，一仔都会乖乖照做。

4）之前因为戒奶咀行動失敗，一仔瞓觉都含住個奶咀实一实，好彩依個月無咁实了，瞓瞓下個奶咀都会甩番出來。

而瞓醒，亦會主動除奶咀唔要。

一仔，那你幾時先肯戒奶咀呢?


起床
原本六点半起床食早歺，因8月中N班开学，想改为七点食，那將來十二点放学，回到家十二点半食午飯，希望都捱到。

点知一仔有時瞓醒唔見一仔媽，依然六点半起床呢！


剪頭髮
第一、二次由一仔爸剪
第三次上海鋪
第四次由一仔爸剪
第五次由一仔媽剪
第六次另一間上海鋪剪，抱住一仔企係門口，一仔可能未知咩事，都仍係望下望下人地剪髮，到我地真係坐低時，一仔开始掙扎。

原本一仔坐係我大腿上，面向鏡子，中途剪髮師傅建儀將一仔拎轉，頭趴在我膊頭上。

工人姐姐都有幫手按住一仔個頭。

剪了五至十分鐘，一仔喊得超凄涼，又勁掙扎。

剪髮師傅話原本見一仔咁乖係門口，才会剪，结果喊成咁，下次若見到一仔係街尾，師傅係街頭会掉頭走人。

去到門口，一仔已經無喊，还肯同師傅揮手bye。

今次剪髮，30元咋！


手提电話
1) 平時返工出門前，一仔媽放個手袋在桌上，同一仔講媽媽要返工，一仔会先熄了手機，才放入手袋里。

有一天，一仔媽專登教一仔要熄上網（WI-FI），才熄機，教了三天，第四天一仔就学識了！

一仔呀，点解学依d咁快就学識？但學d指令及講野就咁耐呢？

2) 話打電話比三姨，一仔識揾"LINE"，要視像。話打比一仔爸，但一仔就搵電話，無得視像!



換片換衫
1） 上個月一話換片，一仔都会乖乖入房換。

今個月，一時時会，有時要捉佢入房。

有時上了床，更要捉佢瞓低先肯換片。

2）換完片，要穿褲時又唔合作。

原來工人姐姐已改变了一仔穿褲的方法。

一仔不需要再瞓係到穿褲，改企係到穿了。

3) 返幼稚園，唔知要唔要由尿片改穿學習褲呢?




食野飲野
1）月頭出街食排骨飯就no problem，其他的，多數唔食或只食一兩啖。

月尾出街食晚飯慶祝母親節，今次一仔终於肯食其他餸了。

2） 間中叫外賣回家，一仔肯食多幾啖米缐及米粉！

如果食杯麵，一仔lur住食添！

3）見到外賣的杯装飲品（大話七、檸七），亦会lur住飲。

4)  最會主動講"果果"(蘋果)，有時未夠鍾，已指住廚房工作桌上放蘋果既位置，叫要食呢?

5）有時食剩少少飯，主动拉一仔媽去指住奶粉罐，即要補飲奶。



戒片
由復活節開始戒，但進度超慢。

同一仔講要去廁所vv，一仔就扁晒咀，係未未係時候呢?

上年夏天一仔肯乖乖坐potty，今年一次都唔肯坐!

原本好苦惱，应该继续戒片，还是暂時停一停先呢？

如果現在停戒片，怕6、7月時再開始，一仔又唔肯坐廁板樓梯!?

好彩個天幫我做了決定，依幾天落雨，天氣涼番，一仔間中都打乞池，要換番長衫长褲着添，所以戒片行動暫停了。

等到6、7月時才开始吧？

雖然戒片唔成功，但起碼一仔現在肯用花晒沖洗下半身。

希望遲d唔駛用浴盤沖涼，直接用花灑。

其實，戒片的關健係未要等一仔識示意有vv呢?一日未識，都未係時候?



講野
依個月講多了。。。

係認到講到既 2、three、eight、nine、ten、ABCDE'符'GIOPVWYZ

mama、果個、果果(蘋果)、奶支(奶咀)、曳曳、部機(手機)、波、巴士、奶奶、好驚、orange、嘩、扮"乞池"

最會講"屋澳"，睇巧虎DVD，見到隻老鼠係桌上，唔識落地下，一仔就講"屋澳"，見到隻老鼠趺左落地下，一仔又講"屋澳"，見到玩具火車出了軌，又講"屋澳"。

K1童被遺保母車一句鐘

K1童被遺保母車一句鐘

”爸媽不知道的幼稚園生活” - 好書推介

原价$68，係大眾書局会員，有9折！

估唔到咁快又買第二本書睇，二百頁，又係一天內睇晒！

原本無諗住買，但在書局睇到個書名，再見到红色既封面，才記起有blog 媽媽（阿肶媽？小豆子媽？還是其他Blog 媽媽呢？Sorry，忘記了是誰？）介绍过話好睇！

依一代的小朋友返幼稚園的形式，同我地果代比，真係完全唔同晒！

而睇睇下本書某d內容時，直头笑了出來！

本書亦解答了我心中的某些疑問，更驚嘆依一代的小朋友有多聰明！

例如：
1）早排田鼠B媽提过有d幼稚園会幫小朋友係学校戒片，但点戒法呢？学校点解有多余的校服替換？

2）点解N班会比K班早些开学呢？

3）点解每堂得20分鐘？

4）香港禁止学校老師体罰学生，d老師有什么对策呢？

5）育婴園及幼兒中心，與幼稚園的分別？

6）”細仔”应否留班？

7）A - Z 的正確發音?

8）認字卡点用才有效？

9）K2先可学写字，K1可以有什么訓練？

10）学校的图書点样來的？

11）小朋友在学校戴口罩，真有用嗎？

12） 牟利和非牟利學校的分别?

13） N班学外語好嗎？

还有其他的疑問，未睇前都無想过会有呢！？

”如何教宝宝閱讀” - 好書推介

自從陀了一仔后，每天空閒的時間都係上網搵育兒的資料。

以前通宵睇小說的日子彷彿係上世紀的事，就算睇育兒的書，都係間斷咁睇。

連妹豬媽介绍買的書（作者係汪培延），買了，但都未睇呢！

誓估唔到今天勞動節買了依本書，約200頁，斷斷續續睇，都可以一天內用了六小時睇晒。

印象最深刻係依頁！

一仔仍說bb話多(但依半個月又多講了些其他的單字)，遲d更要去尤德跟進。

平時比英文字母書或數字書一仔睇，一仔都係掀幾掀就唔睇。

故事書更加會替一仔媽冚麻本書。

一直有諗緊係未未係時候比一仔睇書呢?

回想以前我地個讀書年代，那有話幼稚園開始睇書?

都係上了小學三、四年班，學校每班有了圖書角后，先開始喜歡睇書。

所以，有諗過遲d再教一仔睇書都未遲。

但睇了依本書后，完全改變了我的諗法。。。好彩，現在開始都未遲!