戒奶咀終極篇

<3yr2mo>

上年試過多次替一仔戒奶咀，都係失敗收場，主要係一仔爸媽心軟，其次係一仔會喊好耐，fb有篇文章流傳話BB喊多過20-30分鐘會影響個腦發展!

唯有平時成日話一仔大個仔，仍食奶咀，"核突"!

原本一仔只係瞓覺時食奶咀，但農曆新年假前病了一排，變成平時一仔都要叫食奶咀!

但上個星期，有突破性的進展!

星期三晚 : 見一仔係咁"咬"個奶咀，一仔媽已出聲警告他奶咀咬爛了就無得食了。

一仔成日整爛d玩具，但就未試過咬爛奶咀!

星期四晚 : 工人話個奶咀比一仔咬爛了少許，亦show比一仔睇，於是是夜只比奶咀錬，一仔想當奶咀咬，當然唔同"口感"，一仔有少許扭計，但無喊，一仔爸於是同一仔講明天去買新奶咀。

剛巧這幾天一仔的"眼痕"復發，平時有奶咀食，好快瞓著，但現在無了奶咀，一仔要一仔媽用紙巾幫他對眼蓋"掃下掃下"咁止痕，籮籮攣攣成個鐘才瞓著，

星期五晏覺 : 工人話一仔雖咬住個爛奶咀，但都要好耐才瞓著。

星期五晚 : 話一仔爸唔記得買新奶咀，要一仔明天提一仔爸買。

是夜一仔不止"眼痕"復發，一仔大腿上有一達蚊痕，不只要一仔媽幫他搽藥膏，亦要幫他R痕，又要幫他對眼蓋"掃下掃下"，三管齊下，都要籮籮攣攣成個鐘才瞓著。

星期六晏覺 : 工人再提一仔奶咀爛了，一仔自已將奶咀拎去垃圾桶扔了，籮籮攣攣成個鐘才瞓著。

星期六晚 : 一仔問一仔爸 "爸爸，奶支支，買?記得?"一仔爸當然又話明天買。

是夜一仔眼痕加頭痕，又籮籮攣攣成個鐘才瞓著。

星期日晏覺 : 開了冷氣，拎住剛買的新界的士，有一仔媽陪住，唔駛半小時就瞓了，中途醒了，唔見一仔媽，無再瞓返，此個晏覺只瞓了1.5小時。

星期日晚 : 一仔無問奶支支，但眼痕，籮籮攣攣成個鐘才瞓著。

星期一晏覺 : 開了冷氣，一仔無問奶支支，中途醒了，問奶支支，又要工人姐姐攬住才瞓番。

之后幾天，情況差不多，有一晚成一點才瞓到。

有時瞓覺前一仔仍問奶支支，一話佢自己扔了奶支支去垃圾桶，一仔就無言，樣子好失落咁，一仔媽睇到都有d心痛，但為了一仔好，為了一仔將來有排靚牙，狠下心都要!

現在一仔瞓覺只需摸住毛巾及拎車車陪瞓。

Bye bye 奶支支!