6th N班面試@維景灣幼兒學校

<2yr>

香港保護兒童會維景灣幼兒學校

依間學校係小表姐曾經讀過，一仔姑媽陀住小表姐時已報名，所以小表姐由 0-2歲班已開始讀，但無校車，天天要一仔嫲嫲同小表姐一起搭車接送上學放學，現在小表姐讀官小啦，官小真係好多功課啊!

但一仔媽要到一仔出世后，2012年4月尾時先報名，輪候號碼 3x，真係無諗過可以今年年頭會收到面試信in N班。

今早面試時間係 0900 - 0920。

去到学校門外，一仔已經拖住一仔媽隻手要掉頭走。

果時係八點九，但未入得住，要5分鐘前先可入，唯有同一仔及工人姐姐周圍行。

行既時候，一仔係都要拖一仔媽遠離學校既方向。

到夠鐘入到去大堂等時，有幾個家長同小朋友都坐定定，但一仔又喊又成日拖一仔媽去大門要走。

到再入班房時，只得另外一個家長及小女孩。

一仔企係門后又喊住要走，好彩最終比一仔媽揾到叠叠杯吸引到一仔玩，才無再喊。

現場三個老師又樂力氹一仔，用LEGO積木區上的玩具車sir滑梯比一仔睇，玩到一仔后來自己除襪添。

其間老師又安慰一仔媽話有些小朋友會係咁喊，因去了陌生既地方及見到陌生既人，需要些時間warm up 下。

但一仔媽話一仔平時都有去公園玩、又去街，都唔怕咁樣喊，只有幾次面試都係咁。

再向老師提過一仔剛才係學校門口已想掉頭走，老師都話好少小朋友咁既年紀會知道學校係什麼? 

其間一仔係柜里拎了一盤玩具，已拎緊去想放旁邊的桌上，一仔媽即出聲話一仔，"你好似無問過老師比唔比玩啊?" 一仔即時拎番果盤玩具去柜里。

一仔媽同老師傾緊計，講一仔識講什麼時，一仔突然望住牆上的英文字母講"ABCDE..."。

老師問一仔係邊到學? 一仔媽答睇手機 youtube! 

但漏了講其實一仔都喜歡睇d書有英文字母添，更加唔記得講一仔上年年尾時的26個英文字母、0-9數字及形狀的手抓板，一仔已識併晒！

一仔媽又話一仔好喜歡食蘋果，但當老師拎住個假蘋果給一仔時，一仔一d反應都無，莫非一仔知係假的? 

但一仔媽唔識即時執生幫一仔解話，真係反應遲鈍的一仔媽!

其間一仔媽又問老師屋企附近小學的意見，粱省德小學及陳耀星小學，因網上很少有家長提及，估唔到老師的回答係 : 可以再睇定d! 言下之意係"學校唔係咁好"?

因問"港澳信義會小學"時，老師都話幾好!

最后面試完成時，有份小puzzle送，及好彩一仔都肯乖乖跟媽媽走，一仔亦有舉起一隻手掌仔”小小”手勢咁同老師byebye，唔知老師睇唔睇到呢？

面試結果要三月中先有，一仔媽已打定輸數，但十分讚賞三個老師的愛心及耐性，因依間係一仔可以由開始喊，到最后無再喊的第一間學校!

面試后既感想
再一次證明，依類面試唔止可比小朋友吸取經驗，家長亦可以。

經過今次面試，及一仔媽反思后，有以下感想。

1) 將來面試時，一仔媽要反應快d，幫一仔執生解畫。

2) 經過幾次面試及今次老師所講，一仔媽發現一仔好喜歡面試時學校有吸引佢的玩具及設施玩，就唔會怕出現喊的情況，例如慶恩及梁省德有大堂的大型遊戲設施，英皇有外籍老師帶領唱歌。

但若要一仔入班房坐定定玩，就一定衰硬!

希望9月返了英皇N班后，到年尾再in K1時，希望一仔會大有改善啦!