頭泥

—仔三個半月大時開始有頭泥，起初印印姐姐無同我地講，係有一次我見她在—仔頭上"有動作"，我問她，她才講已用人手幫一仔清理了好多頭泥已幾天了，但見一仔頭頂仍一大範圍是頭泥，於是，我教印印姐姐用健康院派既小冊子上的方法 ~ 先薄薄搽一層橄欖油(藥房有得買，$10-$20一支)，待30分鐘后抹掉，然后洗頭沖涼。

但用此方法好似不太worK，每天只抹去少少頭泥，兩星期后依然好多頭泥，剛好返健康院打四個月大的針，問醫生才知道橄欖油要搽多些才可軟化D頭泥（搽太少無效）,5分鍾后,用手指逐D逐D捽甩,会有少少红.或另一個方法，一仔爸發現D頭泥其實痴住D頭髮，所以應"執往"幾條頭髮仔，輕輕向上扯，便可逐少逐少將頭泥扯走除去(會連頭髮也扯走，沒辦法，當順便換麻BB頭髮)，3天便將頭泥全部清除了。

一仔出世時好多頭髮，但不知何時開始甩頭髮，當頭泥完全清除后，不出一星期，頭頂上的頭髮長番出來，還頗長又多呢。

發燒

一仔一個月大打針時無發燒，兩個月大打針有發燒，針口又紅又腫，由於第一次，我、一仔爸、印印姐姐都倒瀉蘿crab咁，幸好有有經驗的同事及中學同學指點。

針口又紅又腫:
要用暖毛巾敷，毛巾凍了要再弄暖番再敷，直至BB舒服或睡著了。

發燒:
先探溫度，如果微燒，先用退熱貼敷額頭，減少衣服，要BB飲多D水。
請留意不要在BB一瞓醒即探熱，因溫度會高D，果次我無經驗，一見是38度(Pat探)，便給一仔餵退燒藥。

如果發高燒，睇醫生 、食退燒藥、減少衣服、要BB飲多D水外，還要不停用暖水幫BB抹身，尤其要抹頸、手腳的關節位，幫助散熱快D。
個人經驗 : 敷了退熱貼后，半小時至一小時再探熱，不跌反升才餵退燒藥，然后一小時后再探燒。
其實我都不知多久要採一次燒，我想半小時探一次，但由於是幫一仔探pat，怕會太密了，但又擔心溫度不跌反升...
另一方法可同時用就係用手捉摸額頭、手手腳腳。
 (由於用耳探一仔体溫倉不準確，所以一仔係用電子探熱針探Pat。)

探熱部驟 :
將BB擺放如換尿片姿勢(如有需要，可以清潔Pat. Pat先)，男B的要用一張紙巾遮一遮小B仔，避免他突然開細。
探熱針先用棉花濕D火洒抹淨，兩隻手指揸住針頭后1.5-2cm位置，將針頭插入凡士林，很快取出沾了一層薄薄凡士林的針頭，然后插入Pat Pat，要留意那兩隻手指固定在針頭1.5-2cm位置千萬不要動外，還要同時在Pat Pat外皮膚"頂住"，防止BB突然動時針頭會插得過入，另一隻手要幫忙固定BB兩隻腳不要弄動。 探熱完成后，用紙巾/棉花抹一抹針頭，再用清水清潔，最后再用棉花濕火酒抹淨。


發燒溫度表:http://www.pharmacy.cuhk.edu.hk/kidmed/pharm/doc/temp_conversion.pdf


嬰幼兒發燒需知 :http://www.ilovemama.com/thread-18992-1-1.html(唔知點解，依個網址通常第一次入到去，但第二次或之后就不可以，所以直接抄下來了 ~ 請看另一篇"嬰幼兒發燒需知")

五個半月大的一仔

飲水
之前可能由於差不多5個月大才開始給一仔飲水，他每天只飲得10ml左右。

但自從上星期日同一仔去濕地公園逛了一圈熱到他呢 ~ 他現在肯飲多少少水了，一天都有30ml，而且係他自已揸住奶樽兩邊耳仔飲。

食奶咀用奶樽一仔識得對準自己個咀仔飲，但食奶咀呢，奶咀仍不能對準放入咀仔，枉一仔爸教了他一個妙方法 :
一仔現在會啜腳趾公，一仔爸將一仔一隻腳抬高到腳趾到一仔的口邊，對一仔講，一仔你睇，個奶咀咀同你隻腳趾公形狀好似嫁，所以你當奶咀咀係腳趾公，咁就會食得準喇，印印姐姐在旁聽到都笑 ~ 但一仔食準奶咀仍未能成功。

厭奶期開始?
自從上星期六試了兩天給一仔食幾啖粥仔后，9pm餐奶飲唔到150ml了。
上星期六及星期日 : 開了 150ml，只飲了 100ml。
星期一、二 : 開了 120ml，只飲了 100ml。
星期三(昨晚) : 開了 120ml，飲剩一啖都唔肯飲麻。

煲粥仔 / 整菜蓉 / 整魚肉

上星期六短週在家，試下煲粥仔、整菜蓉、魚肉，結果如下:

煲粥仔
2湯匙 + 300ml熱水(=20湯匙水)，放入保溫杯焗兩小時，打開已開晒花，煲一陣 (約2分鍾)~ 原來應要再加水，因有些"結結地" ，及要慢火煲 8-10分鍾 [今次煲唔到健康院小冊子那個更稀的樣子 ~ 一D米都無]。
另外，今次煲的份量都很大碗，初初煲BB不會食咁多，下次應用1湯匙 + 150ml熱水(=10湯匙水, 即 1:10)。
所以，用飯匙(若有20ml)盛了些少給一仔試食外，余下的用一個微波爐有膠蓋的玻璃碗盛起，放入雪柜普通格第二天煲滾再試食。
打算一次煲兩天的粥。

一仔勉強食了幾啖，跟住又要食糊仔，糊仔后加奶粉如平常。
(平時一仔天天大便一次，除非去了街影響了他的作息時間，試過最近連續兩天去街，兩天沒有便便，第三天一來便多到背脊都有，我放工回家一仔爸同我講日本福島又核爆兼陸沉了，我話不會吧? 一仔爸才話原來剛才一仔勁多便便，堂舅父仔形容此次事件為"核爆便便"。
今次星期六、日連續兩天食了幾啖粥仔的一仔都無便便，好彩第三天(今早)有番便便了[好彩沒有又核爆]，所以食粥仔on hold先，睇多幾天便便情況)

整菜蓉
依健康院DVD既方法整，先洗淨，后浸一小時，滾水落菜煮一分鐘，剁碎，用濾網過 ~ 但過唔到，係未未切得夠細粒呢? 所以自己先試食，有陣草青味，唔知點先可以去除草青味呢?
未比菜蓉給一仔食，因只係試範給印印姐姐睇點樣整菜蓉而已。

整魚肉 買了一塊鯇魚腩及鯇魚排(加嘛$18)，想試下邊一款較好食又少骨，又依健康院DVD既方法整，先洗淨，后用蔥和薑鋪面及底，可能蒸得耐了點，有些鞋鞋地。
未比魚肉給一仔食，因又只係試範給印印姐姐睇點樣整魚肉而已。

五個月大的一仔

五個月大的一仔 :

識吮腳趾(左腳)，聽到我地話 “No No, 打打” 就會放番低腳仔 ;

抱住他時他會攪住你條頸，頭仔挨麻你身上，嗲你 ;

八卦好多，小小聲，都會弓起個背，頭仔仰后望望 ;

兩隻手揸住奶樽，將奶樽扯出又放入咀仔，但未必次次對得準 ;

可以單手抓住個充氣球，左手交右手，右手交左手，加上兩隻腳夾住轉個球 ;

飲奶無以前咁尊心 ;

喜歡扭爸爸耳仔、扯人頭髮、搣人都好痛 ;

識側身瞓，有時還會攪住攪枕瞓 ;

終於識轉身，但未識轉番回去，轉唔到時，會出聲求救 ;

(有人話BB識吮腳趾時，就識轉身，一仔正是這樣!)
未識坐，會坐到東歪西倒，但喜歡行 ;

喜歡洗頭、沖涼，剛開始會坐在浴盆里兩隻腳勁踢水 ;

平時要孭住先可入睡，又易醒 ;

依份係五個月大小霸王的成長報告 !

飲食情況:
一日5餐奶 :
早上5點埋身人奶，9am/ 1pm/ 5pm/ 8:30pm，其中一餐奶樽餵人奶，其余奶粉"雅倍1號 - 心美力"，每餐150ml。
12點半餵60ml奶+5湯匙Healthy Times Brown Rice Cereal
原本9pm應是最后一餐奶，但一仔通常8:30pm要飲，不然8:45pm飲時已經一路飲一路瞓了。

差不多5個月大才開始給一仔飲水，因發現他的片仔無以前咁濕、咁重手，不知是否天氣熱，他流汗多了?
他不太喜歡飲水，奶樽加了手挽給一仔學揸住飲，但每天只飲得10ml左右

每天一次便便

母乳情況:
約8小時泵一次(我知道應該每4小時泵一次才可keep到奶量，但時間/地方/環境唔容許)。
5am 一仔埋身食，左右各10-15分鍾。
1:30pm 公司附近商場育嬰室泵奶，約20-30分鍾(包括清洗泵奶器具)，由最初 50ml， 到上星期前 80-100ml ，到現在只得 60-80ml。
9-9:30pm 家里泵奶，情況比中午好些，由最初 20-30ml， 到上星期前 100-110ml 到現在只得 60-100ml(通常星期一至四晚餐有一大碗上奶湯如章魚節瓜蓮藕 / 白鰂魚/ 木瓜豬手)。

現在泵奶少了，主要是左邊只泵得 10 - 30ml，之前左右各有40-50ml，而右邊通常比左邊多D。