試学日第一天

<2yr1mo>

英皇共有4天試學日，三、四、五、六月各一天，每天各一小時，下午一点至兩点，逢星期五。

d時間咁，焗住要向公司請全日假。

我地未到一点，已到学校，係学校对出的公園玩下先。

另有一对夫婦同仔仔係度玩緊sir滑梯，仔仔係细B，十一月出世。

对夫婦話前幾天才收到学校电話通知，話细B太细，要到今年十一月足兩歳才返学，所以可以不用去試学日，書簿雜費、校服費亦改六月先交。

但对夫婦話已向公司請了假，所以都帶仔仔來試学日。

而且，試学日既時間亦改了為一点半至兩点半。

除了电話外，学校話亦寄了信通知家長，对夫婦話無收过信！

我地呢，电話同信都無收过！

差不多到一點，陸續有d家長亦已到了，佢地都話無收过。

好彩我地早到，因太多家長同小朋友參加，一点半時見仍有家長在排隊登記呢！

試学日亦係学校舉行生日会日，所以第一part，老師請讀緊的学生一起上台唱歌，唱了兩首歌，見到d同学仔都好开心，跟住老師又唱又做動作。

第二part，老師同我地班新生及家長唱歌，最后又邀小朋友上台入波仔。

個礼堂好多人，只得前排既家長可以咁投入，后排的家長，继续比小朋玩下車仔、sir滑梯、波波。

一仔玩得好开心，玩到出晒汗髮脚濕晒，最后除剩件恤衫及底衫。

咁虛冚的場面，亦难得一仔爸有耐性，無依依哦哦話人多，又熱又乱。

但学校的行政好乱，原來当天亦安排了試校服，登記時老師無講，好彩台上遊戲完结時老師有講，不然，我地还以为擺放校服個corner係比讀緊的学生訂校服呢。

一、三、五穿運動服（120元）及白鞋。
二、四穿校服（150元）及黑鞋。
書包（100元）。

好彩之前剛睇了小豆子媽個blog介绍，学校有咁既穿法，家长可以每款只買一套。

可惜唔可以一星期五天都穿白鞋，要買多一双黑鞋了。

原本話今天要交2600元雜费，但有BK家长打电話問过教育署，要5月先可收学費，可能有家長亦打电話去学校問，現在学校出了通告，五月头才需交書薄雜费及校服費，另学费7月交。

而开学日子定佐8月12啦！！