<2yr11mo>
記得大概九月定十月，亦有家長日，不過果次一仔媽無去，只在電話中和班主任梁老師瞭解一仔在學校的情況。
今次家長日，約在星期六，原來係總結一仔在學校上學期上堂的情況，下星期一(二月二日)就係下學期了。
梁老師桌上有一本本大約A4 size 的folders，里面有幾頁的評核紙，可惜要下學期完時才可給家長拎走，亦不可以影相。
１》其中一頁有一仔玩緊的相片，依一頁話一仔大小肌肉都ok。
２》另有三至四頁講一仔在不同領域的表現，分五級，一仔每個領域各有不同級的表現。
３》記得梁老師曾話一仔不專心聽指令，有一次教一仔用衣夾夾紙，想訓練他的小肌肉，一仔無望住梁老師做，一仔當然做唔到。
一仔媽在家和一仔玩了兩三次，一仔一時時肯做，好似興趣不大，但梁老師話一仔在學校都夾到了，以為我地在屋企有特別訓練過。
４》有一份勞作，在一張紙上畫了一條頸巾，有幾點要貼上五六粒彩色粒粒做裝飾，令梁老師很意外的，當塗上膠水后，一仔可以準確的將粒粒貼在適當的位置上。
５》有一幅畫中間有個圖案(不記得是什麼了)，一仔可以重點只油顏色在圖案上，當然有油出界。
梁老師話一仔喜歡油顏色，而一仔令梁老師又好意外的，一仔好快油完此幅畫。
只油圖案內及好快油完亦令一仔媽好意外！
梁老師話一仔起初都會油在桌上，但油油下就無油在桌上了。
聽完梁老師講，回家拎番本畫簿比一仔油，一仔真係好快油及只油在圖案上。
一仔現在仍會用左右手食野或揸筆，漏了問梁老師幾時先知小朋友用定邊一隻手呢?
一仔媽向梁老師反應一仔揸筆的手勢不正確，梁老師話現階段不用理會揸筆的手勢。
6》梁老師話一仔喜歡音樂，依排都會跟住做些動作了。
一仔在屋企睇電視或youturbe時聽到歌，都會跟住搖擺身體，一仔爸好喜歡睇，仲話一仔搖擺得好靚 > 一仔媽無音樂天份，真係唔識睇搖擺得靚唔靚呢。
7》一仔唔食零食，一個學期要交$720茶點費真係浪費，但梁老師話一仔喜歡飲水及飲奶，會叫添飲。
8》梁老師話一仔有d古惑添，例如在玩一組game，有四parts,一仔玩過一次后，第二次玩完第三part后，企係到，唔肯繼續玩第四part，因一仔唔想咁快玩完個game。
9》有時一仔唔聽話，梁老師會叫一仔去冷靜區，一仔都知道被罰，會扁晒咀，但仍會走去冷靜區。
10》粱老師話一仔會怕陌生，有時連請了幾天病假無返學，到返學第一天，一仔會好乖坐定定，讓梁老師以為換了第二個學生呢。
11》粱老師話一仔都喜歡聽講故事，而且有時會自己係課室里拎書睇，依點令一仔媽好意外。
12》評核紙中，有一行梁老師剔一仔的"探索"(=好奇心)有最高的5分，一仔對新野，會好有興趣。
從以上不同的表現/評核，感覺到梁老師真的好用心去瞭解每個學生，好感恩一仔入到梁老師教的班別里!
<2yr11mo>
自從上年８月中N 班開學後，一仔個個月都病，都要去睇醫生，由最初要迫食藥，到后來肯乖乖食藥，真係一個好鼓舞的轉變。
除了病要食藥，一仔好似亦得了眼敏感，成日捽眼，有次捽到隻眼都紅麻，前后分別睇了兩個醫生拎了三支眼藥水，但一仔好抗拒滴眼藥水，每次都要一個"捉實"佢，然后另一個幫佢滴眼藥水。
試過趁一仔瞓覺時幫佢滴，但有時會畀佢發現而失敗滴唔到。
唔明白點解一仔咁怕滴眼藥水？
我地有時自己眼癢，都有在一仔面前滴眼藥水，佢應該明白滴眼藥水無侵略性啊！
一月中時一仔又病了，除了有咳和微燒，兩隻眼角有好多黃色眼c，醫生今次開了有抗生素成份的眼藥水，一日要滴四次，要滴七日！
每次替一仔滴眼藥水，好似打仗咁，今次仲要滴咁多次又咁多日，點算好？
好彩第二天一仔爸放假，一仔爸可以替一仔滴眼藥水。
而晚上當一仔媽放工回家，一仔滴眼藥水時間又到，居然唔駛一仔媽幫手，見到一仔乖乖滴眼藥水。
一仔媽要問了一仔爸幾次，他才肯講出點解一仔咁合作滴眼藥水。
原來一仔爸同一仔重覆講"唔痛、唔痛"!
下，無諗過一仔唔肯滴眼藥水係因為以為會痛!?
<2yr11mo>
去年９月知道舊工人決定唔續約，要請新工人時，真係好頭痕又擔心，擔心慢熱害羞的一仔好難適應。
九月尾時成功揀到一個新工人，十一月尾批到working visa, 十二月初上班。
舊工人的合約原本今年一月才到期，好彩佢同意提前完約，可能佢掛住回家鄉湊女及再結緍吧！
舊工人
僱傭Agent 估計新工人的working visa 大約十一月尾、十二月頭才批到，所以打算替舊工人訂十二月中的機票，因年近聖誕假，機票會又貴又full，所以十一月時開始幫舊工人追機票，好彩揾到一間好的賣機票agent，新工人的working visa又剛好趕到十一月尾機票最后要confirm 的一天出了，成功買了張$2450的Garuda Indonesia Airline機票，可以在Jakarta 轉機去Surabaya，舊工人可帶一件35kg的寄艙行李(check in 時要出示綠色果份僱傭合約)，泗水落機后再搭三小時巴士就回到家了。
一直都好順利，直到上機時卻出事，原來舊工人的working visa唔係兩年有效，因舊工人上工時的passport 就快到期，入境處只批了半年visa期架，果朝早上機前航空公司及入境處分別call我，要核實舊工人是否一直替我工作，最後舊工人被罰了$168, 仍可坐原機離港。
舊工人今次過期居留，僱傭agent 一定有責任，但見她替我地請新、舊工人時都跟足，一仔媽沒有再追究，亦要怪自己沒有細心睇清楚舊工人passport上的working visa 有效日期！
只希望今次事件，不會被入境處列入黑名單，影響她將來申請來港工作，已囑咐舊工人要keep住新舊兩本passport、僱傭合約及香港身份証。
新工人
新工人自己有兩個仔，一個3歲，一個５歲，資料話係佢自己湊，一仔媽最初如意算盤打得太響，原打算讓新工人今年夏天幫一仔戒片時會容易入手d，點知新工人話其實佢媽媽亦有幫手湊佢兩個仔，算吧，幫一仔戒片一事夏天時再算。
當初同新工人面試時，佢只穿普通便服及打扮，但第一天去接佢時，居然有披頭巾，還話一天要拜神五次，每次五分鐘，每次都要披上頭巾及外袍。
拜神無問題，時間佢自己安排到，唔影響工作便可。
但頭巾，最后要求佢屋企唔戴，出街可以戴。
面試時，一仔都在埸，難得慢熱害羞的一仔和佢有互動，及新工人的廣東話明顯比舊工人好，所以決定揀佢 > 現在證實依兩點係對的，詳情稍後再講。
煮食方面，新工人話識煮普通的餸、滾湯，依點一仔媽真失策，當時無再追問下去，到上班后再問，才知新工人有負責去街市買餸，但最后都係其前僱主或家人煮餸，好彩一仔媽有后著。。。
一仔媽之前努力“教了“舊工人煮餸、煲湯的“秘笈“，但一仔媽自己係唔識煑，避免“秘笈失傳“，還有平時的家務、接送一仔返學、放學的細節等等，一仔媽臨急抱佛腳列了一張表，讓舊工人及新工人有幾天的時間"交接"學習實習，始終佢地用印尼話溝通容易明白d。舊工人走時，新工人都有去送機呢，舊工人還好好人的留了些舊衫比新工人添。
另亦交了一份9頁紙的"外傭工作及操守指引"(中英印文對照)給新工人，囑咐佢睇完后，一仔媽會考佢，但到現在仍未有時間去考。
最後再加上口述的家規。
現在一個月后的結果呢?
當然有些甩漏，不過大致上都ok，但現在依然要留意新工人做事的手法有無做錯，有就要即時話佢知，佢都會樂意更改。
今天新工人送一仔上學，第一次忘了帶鎖匙，好彩一仔爸今天返中班，只係去了附近食早餐，新工人亦醒目先問學校要了一仔爸個電話號碼，再問一仔同學的嫲嫲借手機打比一仔爸。
而煮餸、煲湯呢?
新工人成功可以煲到好味的胡椒豬肚湯，但亦試過私自沒有跟一仔媽每天的"餐單"去煮，不過有些係ok的，其中佢更識煮一仔媽好喜歡食但未搵到"秘笈"的魚香茄子(豬肉碎改用了牛肉碎，沒有加鹹魚)及苦瓜抄牛肉(但加了些紅椒，有些過辣呢)!!! Yeah! Yeah!
希望新工人可以繼續keep到這種工作態度做落去!
一仔
除了面試時，見到慢熱害羞的一仔難得和新工人有互動外，新工人第一天工作大約傍晚時分到屋企，洗完手就即刻入廚房同舊工人一起煮飯，一仔居然主動叫新工人"ee"，當我地糾正應叫新工人個名"SaSa"后，一整晚一仔都叫了幾次SaSa，食完飯又主動行去SaSa到，好似想要SaSa同佢玩咁，完全不似平時一仔爸媽其他的朋友來拜訪時，一仔要warm up一陣才會和人地有互動!
第二天工作，SaSa都係旁觀，第三天才開始落手自己做，一仔后來亦肯比SaSa餵食野，但當舊工人走了后，好奇怪 : 一仔一定要一仔媽餵晚餐，餵了幾天，有一晚一仔主動比SaSa餵，但餵了幾天，又要一仔媽餵番，於是一仔爸出手，一仔無奈接受晚餐要比SaSa餵了。
平時換片及沖涼，如果一仔媽係屋企，好奇怪，一仔都要媽媽幫佢，唔要SaSa。
當舊工人走果日，係一早六點出門口，一仔媽叫醒一仔，抱一仔到門口，同舊工人講bye bye，之后幾天一仔都有問舊工人?我地會話佢返了屋企，又讓一仔和舊工人通過一兩次電話。
去年11月尾時，提早了和一仔去尤德跟進language delay，今次係直接由醫生評估，及結果係一仔真的有language delay。
一仔爸覺得除了我地兩公婆要返工，少時間教一仔講野外，舊工人因講廣東話麻麻，好少同一仔有真正的"對話"交流亦係原因之一。
面試時覺得SaSa講廣東話好過舊工人，相處了一個月，亦覺得SaSa同一仔的"對話"交流係較多的，一仔亦在這個月講野有明顯的進步。
之前己識講的有26個英文字母、英文數字、11種英文顏色、早抖、唔該晒、apple、orange、對唔住、爸爸、媽媽、嫲嫲、dog、cat、車車、的士、巴士、飛機、lamp、clock、watch、筆、波、白飯、水、書書、ee、bb、moon、sun、ear、eye、鼻、mouth、fish、 痾殊。
由12月開始，一仔識講 :
姑媽、表姐、姨丈、姨媽
Micky mouse、高飛、Minnie、Daisy、叮噹、Hello Kitty、羊羊、龜、monkey
媽媽坐、開電話、老師早晨、加奶、加飯、刷牙
雞雞、蛋、麵麵
no坐、 no sit down、no 痾臭、 no菜、 no奶、no 覺(即唔瞓覺)
新界的士、專線小巴、古董巴士、校巴、電車、警車、船船、BB車
電話、冷氣機、暖爐、電飯煲、風扇、燈 、窗
衫、褲、鞋、襪、番盞(即肥皂)
star、雲雲、house、花花、樹樹、聖誕樹
最重要係識講佢自己個名!之前佢只會講"one"架!
還有在提水之下，亦識講一仔爸、媽個名。
晚上一仔媽幫一仔換完片，一仔很樂意跟工人出去倒垃圾> 所有的routine, 都跟舊工人時的一樣，只係現在換了新工人去做。
一月一日開始，讓一仔夜晚開始刷牙，點知第二天返學，學校話參加了刷牙的活動，早晩都要刷牙，刷足十二個星期，早上由於一仔媽趕出門返工，看管一仔刷牙就交由SaSa負責。
之前一仔刷牙玩玩下，隔了幾個月再刷，今次一仔“正經“刷牙了好多，還識吐水。每次刷牙時，亦示意一仔媽自己要一齊刷牙。
今年一仔爸話佢的願望係希望一仔愈講愈多!
