終於自己舀飯食

<3yr7mo>

由一歲半開始訓練一仔自己舀食野，終於現在成功了，由九月初到今天，晚餐"多數"都係一仔自己舀來食!

一歲半時，一仔可以左右手一齊用匙餵自己食，但從碗舀出果下，就由我地負責，之後想訓練一仔做麻舀出來的動作，唔成功，唔知點解仲演變成全程由我地又舀又餵！

平時一仔食野，會玩手提電話或ipad，初時見一仔食野好快，大約廿分鐘內食晒，便由得佢，但漸漸要半小時以上....

暑假前已間中同一仔講，七月起晚餐要佢餵自己食，食飯時亦唔可以玩手提電話，最後趁九月四日抗戰利假期帶一仔去冒險樂園的波波池玩，前一晚食晩餐前，同一仔講要佢自己食飯，第二天才有得去波波池，一仔話好。

但到開飯時，一仔出聲要工人餵，一仔媽話一仔要自己餵十啖先，一仔媽數一啖、兩啖、三啖...，見一仔自己繼續食下去，一仔媽當然由得一仔繼續食落去，哈哈!

第二晩，白天去完波波池，無藉口添，於是一仔媽又話一仔自己食十啖先，數數下...哈哈

第三晩，一仔媽索性拎走麻ipad，一仔媽要一仔食十啖先，十啖食完，一仔好似忘了要ipad, 反而一仔爸話唔好呃小朋友，要畀番ipad一仔，依個慈父呢！

第四晩，一仔爸不在家食晩飯，一仔媽同一仔講食完飯才有ipad玩，一仔又肯合作喎!

之後天天食晩飯，用上面同一個理由，一仔無再拎ipad玩了。

一仔餵自己食，有時只舀餸食，又要提才會用左手扶住個碗，所以我地要一邊食一邊監督住一仔食麻白飯。

以前每晩一仔會食一碗飯，有時會叫加飯添，自從要餵自己食，有時食了大半碗飯，一仔會話飽，改由我地接手餵番，佢又可以食晒成碗飯。

午餐呢，工人話一仔已有三個星期無拎電話出來玩。

早餐食麥皮及飲奶，仍由一仔媽餵，嗯，畀多少少蜜月期一仔吧，之後....

這個短片是第一天拍的，所以仍有ipad

另外，這個月飲藥水，一仔肯用量杯飲，不需再用針筒了。

N班開學Week 10 > 無返學一星期

<2yr8mo>

一仔上個星期六開始有少少咳。

星期日夜晚咳多了，明顯有痰聲，但唔識咳出來。

星期一早去睇胡医生，話一仔扁桃缐發炎，医生摸到一仔頸右邊位置有些腫，開了抗生素药（同上次一樣，此药要放入雪柜，每早一次，每次飲5ml），今次飲了4天便飲晒，上次飲了一星期呢。

今次係開學後第二次扁桃缐發炎了，好彩今次無發燒。



星期二已經無乜咳了，只有少許鼻水。



星期三好得七七八八，但量耳仔體温時有37度，若在學校門口量到有37度，就不能返學的，所以是日在家休息。



星期四起身后，一仔超級眼瞓，連食早餐時都中下中下咁才食完份早餐（半碗麥皮/30ml 奶 + 一杯150ml 奶）。

原本開了手機的youtube，一仔都無乜點望過，只掛住瞓 > 真嚇親一仔媽，因一仔從未試過早上瞓醒后仍咁眼瞓！

以為一仔病情是否嚴重了？但又無發燒。

一仔連早上八點食蘋果都唔願食。

之后一仔爸才醒起會否因前一晚八點食完晚飯后一仔偷飲了幾啖啤酒（青島牌）呢？

但晚上九點半上床，一仔玩到十點半才瞓着啊！

半夜一仔亦醒了幾次，不似平時那样可以一覺瞓天光。

一仔咁眼瞓，莫非因飲啤酒的後勁反應？

這天，一仔瞓了整個早上，下午無瞓（即正常番），晚上我地一家三口還和一仔姨丈姨媽一起去了堂舅父、堂舅母的婚宴，一仔好開心。

上年8月套衫褲仍太大

預早幾天去了堂舅父家，替堂舅父的新床跳大床。
堂舅父小時候曾替一仔的姨丈、姨媽新床跳大床，估唔到現在輪到一仔跳，姨丈話”一代傳一代”。

有個小朋友係屋企sofa跳到咁，但幫堂舅父跳大床時就......好彩都跳到幾下!

未入席前，在商埸玩了一陣。

因第一次帶一仔參加緍宴，九點開席時場地的閃爍燈光令一仔覺得好神奇。

中場時一對新人敬酒，一仔亦敬麻一份。

大概十点多，我地就離開，上車一陣，一仔便睡着了，落車時好似樹熊咁攪實一仔媽，回到家才醒。

喜宴其間，一仔只食了少少白飯，亦唔肯飲奶，但卻痾了三次，每次痾少少，稀稀爛爛，黄色的。



星期五一仔爸帶一仔再去睇胡醫生，醫生話一仔感冒菌入腸，開多了一樽止肚痛的藥。

左面是止肚痛藥，右面是退燒藥，但止肚痛藥每格的份量多好多啊!

醫生亦吩咐一仔要改食軟飯、飲開稀的奶(見一仔無再痾，所以只食了一餐軟飯及一餐開稀的奶)。

一仔媽自己另外幫一仔停了食蘋果、菜(由星期五至日)。

是日有兩次臭臭。

今天學校開生日會，替一仔打電話给學校請病假時，請學校留番一份生日禮物给一仔。


星期六及日各有一次臭臭。




這個星期的進步
1) 除了晚上瞓覺要瞓窗邊時，一仔會不停講”唔該晒”直至一仔爸讓出個位才停講外，有時我地坐係sofa上，一仔想要個sofa 位玩玩具，亦會不停講”唔該晒”直至我地又讓位才停講。

原來一仔講"唔該晒"，係跟一仔媽學架!

2）食了一星期药，一仔”學識”了bur 药水及吐口水，起初我用手打佢咀仔，打時話吐口水要掌咀，之后一仔再吐時，捉住佢隻手掌佢自己個咀，后來佢每次吐口水時，剩叫佢自己掌咀，佢又識做喎！

3）上星期聽到班主任話一仔係學校唔會自己飲水，一仔媽心諗會否一仔曾試過自己飲水，整濕了校服，所以抗拒在學校自己飲水呢？

剛好經過百貨店見到這個好似學校的水杯，一邊有耳仔，透明的，可以望到一仔飲水的情況。

如果杯里的水不多，一仔都可以自己拎住個杯飲晒d水，不會倒瀉。

4）喜歡拎學校的書包、課本、杯、毛巾盒出來，有d 課本纸質比較薄，比一仔撕爛了。

最喜歡睇A至M果本英文書，雖未識講得晒全部英文字母所代表的物件，但如果問一仔 ice-cream，佢可以揾番果一頁出來。

而問lamp 或moon，一仔都会指住廳燈。

但一仔对於中文課本，好似興趣不大。

5）知道爸媽要出街，一仔係鞋柜幫我地拎定對出街鞋出來。

N班開學 Week 6 + 理想中的幼稚園

<2yr7mo>

踏入九月、十月、十一月，是忙碌報K1班及面試的日子（好彩有幾間學校暑假時已開始接受郵寄報名），適逢公司超忙，家中接二連三、四有事，分分鐘忙到明年。。。

一仔在8月中開始返N班，這個星期開始無喊了，星期四和班主任梁老師講過一次電話，憂多過喜，憂係一仔有language delay、學校里多流口水又咬野>有次咬到件校服濕晒要替換（但係屋企，一仔無咬衫喎），一次咬到衫上的胶名牌又濕晒（老師話可能係一仔口腔肌肉控制有問题，亦間接影响説話）、有時唔聽指令（係一仔唔明嗎？）、係課室走來走去，唔似其他同學仔咁会坐定定（老師話係專注力問题）、唔食茶點、要老師餵飲水才飲、有社交的問题。

喜的係師話一仔係學術上没問题，但唔係好記得指什麼？應係學ABC等卦，因一仔已識讀晒。

另外喜的是，老師話班里的情況已穩定，下星期可以開始試幫一仔戒片，老師已预計一仔唔会自己出聲去v v，所以書包里要放定兩條内褲、兩條短褲。開學初期，老師亦提過要放多一對襪、一對輕身的拖鞋。

記得開學第一天和梁老師説話，老師話會幫一仔戒片，一仔媽即刻感到好開心，亦對幼稚園的印象改觀，覺得梁老師係一個好有經驗的老師，如果升K1時仍由佢做班主任，亦不錯，雖然對此間幼稚園仍無乜大信心。

其實一仔爸對一仔讀邊間幼稚園無乜要求，最緊要近屋企，唔駛搭校車。

一仔媽我自己呢，屋企附近有好幾間幼稚園都ok，只係擔心龍年效应，而一仔有語言及面試問题（上年一入學校就拖着一仔媽要一齊走及又喊），唯有揾多幾間附近幾個地鐵站而又可提供校巴服務的幼稚園。

可惜有幾間幼稚園不接受郵寄報名，要親身去報，但又不在同區，星期六又唔開，好彩一仔爸没有阿支阿draw，都願意去報，已成功報了兩間，而有幾間，要十月才可以去報。

由上年替一仔揾N班到今年K1的幼稚園，一仔媽理想中的幼稚園有以下的條件：

1）不需要名校，但需要係一間happy school，老師及嬸嬸都要有愛心，有經驗更好，會幫小朋友戒片就超级好，亦要有渠道會定期向家長滙報小朋友在學校中的情形，最欣赏的例子就係肚B讀果間的方法，有興趣班提供。

2）學校有責任感，亦會替家長着想，因而會有個詳盡的學校網址内容，介绍學校的一切，令家长可以直接了解學校怎樣教育小朋友。

理想幼稚園及學校的網址應包括以下的資料：

1）介绍學校的位置地圖、學校面積、有什麽課室（最好有相片睇，及包括男女洗手間）、遊戲設施

2）"有"校巴、"有"老師跟車、車费、校巴的路線

3）註明學费（分多少期？半日班最好$500以下、全日班$1000以下）、書簿費、生日會费、夏冬的校服費、書包費、茶點費、膳食费、興趣班费等

4）有多少老師及每级有多少學生

5）上學、放學時間

6）"有"校內廚房及參予了"幼營喜動校園計劃"

7）有校曆>要每個學期有更新的，曾見過一間2014年的仍係2013年的校曆

8）有最新通告，如"有"開放日、參觀活動、報名詳情

9）學校有什麼課程如蒙特梭利教學、奥福音樂，比比和朋友，每级會教什麼、"有"外藉老師教英語、"有"普通話老師

10）升小一派位資料

11）學生参加活動的照片

12） 報名表可download 及郵寄，會註明報名期限、面試日期（如果家長早知有幾間面試日期會撞，便不會魚翁撤網方式去報，慳了時間去填表、慳了用報名表、用少幾张相、信封、郵票、出世纸/針卡/父母身份証等的影印本（總括係一句環保）、郵费、信封費、報名费（總括一句係悭荷包）、郵差的勞力。

P.S. 
1) 原來有d學校的網址只可以用IE才睇到，Chrome睇唔到，有d網址有分電腦板及手機板的網址。

2) 如果出世紙有幾張正本，左下角的number各不同，有d學校核對正本時，會睇麻依個number的。

象印保溫杯(燜燒杯)點樣整粥

幾個月前在永安見到這款粉紅色有半個"8"字貼紙做緊慈善特價，幫朋友買了一個。

今天經過永安，見到這張紙，當然要同大家分享。

close-up

新飯煲仔

<2yr2mo>

舊電飯煲仔$199，煲粥煲飯只需30分鐘，但買了唔夠一年，就坏了！

個內膽無得拎出來，sales話成個飯煲放在水喉下沖水都唔怕，因有個蓋可以冚住個電掣

幾個月前，試过有兩天红色的煲飯燈唔着，但個飯煲插着了电掣5分鐘后，煲身开始会好熱，所以估可能只係盏燈燒了。

但第三天红色燈又着番！

直到上個星期某日下午煮四点半果歺時，個飯煲突然”拍”一声，跟住廚房所有电器都唔着！

好彩当日一仔爸返早班，已差不多放工，可以回家。

而工人姐姐即刻改用大人电飯煲，拎出去客廳煮。

原本發愁那里可以買番咁细個飯煲，又可咁快煲熟飯，但今次最好可以內膽拎出來洗呢？

公司附近的永安無得買。

屋企附近的日本城亦無得買。

假期经过豐澤，見到依款威馬牌，無写明煲飯要幾耐時間，但內膽可以拎出來，$199。

於是問sales，sales話20分鐘，但只可以煲飯，唔可以煲粥。

20分鐘咁快？唔係卦？咁快煑好飯，但個包裝盒或展示牌都無写既？

用了幾天，新舊的飯煲比較如下：

舊的：
-盛餸的碟係不銹鋼，但容量少
-會噴少少水，亦会噴到工作桌都有水添
-內膽唔可以拎出來，煲完飯，要加水起碼浸一小時，才容易清洗
-煲飯煲粥要30分鐘

新的：
-盛餸的碟係胶，但容量多少少
-会噴水，但唔会噴到工作桌都有水
-內膽可以拎出來，煲完飯，加水浸一陣，已經好容易清洗
-只可煲飯，要20分鐘，之后熄电掣，等5分鐘飯煲無咁熱先拎餸盛飯較好

健康院書仔及DVD 網上睇

健康院書仔及DVD 網上睇

好正，所以再另寫一個post要分享下!

回想當初初为人母，真係乜都唔識，好彩有同學、同事、朋友、陪月阿姨問，后來更識到一班blog 媽媽。

而每次返健康院打針，更有書仔連DVD比，教点照顧初生BB、餵人奶、留意他們的發展、轉食固體食物等，真係好有用，幫助好大。

只可惜書仔有quota，每人只限獲派發一份。

幸好今次有護士介紹，才知網上都可睇到，但若要睇麻彩图的，就要download 每份的pdf 檔案睇。

入右手边依個”健康資訉”

依三本講由初生至一歲，但现在要割愛比人啦。

當初印象最深刻係依份講初生BB皮膚問題的。

真估唔到bb会有咁多不同皮膚問題

還有d資料係健康院無比的，例如重量

依4本係一仔媽的至愛，因一仔媽唔識煑餸，更唔識煑BB食物，但從中学到很多！

教煮食的書仔有video，估唔到亦可網上睇到，去依到的youtube里

頂右边的播放清单，依幾個影片有教初步點煮BB固體食物。

頂左”活動”、頂中”影片”亦有啱自己平時睇的，有講餵母乳、婦女健康等。

左右手一齊開餐

<1yr8mo>

継上個月一仔用匙餵自己食有小進步後，打算教麻他自己舀。

唔知係未他用開的長匙匙頭係軟身，令一仔舀唔到呢？

於是再係日本城買了支粗柄硬匙頭的膠匙。

估唔到一仔居然會左右手一齊用。

新匙匙頭雖硬，但稍闊，好似对一仔個小咀來講，顯得稍大。

藍色果支，匙頭係軟膠。

綠色果支，全支稍短。

想再揾支粗柄、硬頭、匙頭闊度及長度適中的膠匙。

另外，之前一仔開餐時又要睇電視，又要有玩具玩。

見一仔食得快，食飽会自動停，不會因为掛住睇掛住玩而食过龍，所以都由得他。

後來升呢到玩手機添。

但自從一仔自己餵食后，因为無手玩手機，上半部份可以無手機出場，但下半部份，有時一仔都会er er叫要玩手机。

希望遲d全程一仔自己舀食后，手機可以退居幕后！

自己畢野食有小進步

<1yr8mo>

只有隔一、兩個星期日，等工人姐姐放假，一仔媽因晚餐貪方便快捷，會煮麵比一仔食，又會比一仔自己用匙羹練習畢野食，所以畢野食進度龜速咁慢。

趁十月頭有兩天假期，一仔媽首先示範給工人姐姐睇點樣set好個戰場，再示範点样從旁協助讓一仔自己畢野食。

用即棄檯布，椅、地下都要舖好  ~ 最初無舖，食完后，一仔媽抹餐c。

之后要工人姐姐每天十一點半果餐食軟飯的，協助讓一仔自己畢來食。

大約半個月了，一仔畢野食有進步 ~ 握匙羹的手勢不再好似蘭花手只用手指頭拎住匙羹尾。


幫一仔畢了野食在匙羹里后，一仔現在可以下下對準畢入口里。

不過，食既時候，一仔唔係次次由頭到尾自己畢來食，有時去到后半段時間，要工人姐姐餵番。

頭幾天係公司透過web cam望，發現工人姐姐無set個戰場，回家問工人姐姐，她話一仔無畢到周圍都係，所以唔駛set個戰場!


剛過去既星期日，終於輪到一仔媽可以親自睇到一仔自己畢軟飯食，學工人姐姐無set個戰場。

又真的啊!一仔無畢到周圍都係!

前排經過地鐵站的有機店，買了依包烏東，煮 5 - 8分鍾便可。

一包有三束麵。

第一次煮，取一束，再分開取一半。

煮好后，原來好少，但一仔都食唔晒，要補奶添。

一仔媽學白天一樣唔set個戰場，點知就出事。

軟飯一舊舊放入口好容易。

但d烏東，一仔畢既時候有些畢唔晒入口里，跌到椅上。

又有一次，個匙羹彈了一下，又跌到周圍都係。

所以，下次如果食烏東、麵呀，都係要set番個戰場先。

哽魚骨

<1yr8mo>

昨晚趁唔喜欢食魚的一仔爸返工，叫工人姐姐煎三文魚，另留一些蒸給一仔食。

蒸好的三文魚，用义一壓就散开晒，但估唔到有魚骨架！

工人姐姐餵了一仔幾啖飯連魚后，一仔苦住脸er er 叫！

除了試过食物太熱，一仔未试过咁样四萬咀苦住脸架！

我地即時知道唔係d飯餸太熱，应該係有魚骨哽住呀！

一仔都试过輕咳兩次（估唔到咁细个個都識依個動作！可能係自然反应），但都唔成功！

其实我地都唔知條魚骨在哪里？

哽住喉嚨？吉到牙肉？

嘗試用电筒照，一仔只合作开口兩秒，当然什么都睇唔到！

比水一仔飲，佢又唔要！

一仔媽唯有当機叫工人姐姐改开奶！

及叫工人姐姐留意奶的温度不要太熱。

好彩一仔肯飲奶，飲完奶都無事了！

然后我地继续食飯，發现三文魚有幾條魚骨，雖然好幼，但都有1cm長！

今次哽魚骨無事，真係好好彩！

將來，都係只比壽司那款三文魚给一仔食算了！

Mini Rice Cooker

<1yr6mo>

今期電费一千三百大元，除了冷氣開多了外，每天用1.5小時煲粥、1小時煲軟飯比一仔。

嫲嫲話煲粥可以唔駛煲咁耐，但一仔媽唔放心，就算d 粥ok，但怕d柳梅（豬肉）唔熟，因撈麻入d粥一起煲，唔想麻烦另外用明火再蒸。

星期日經過屋企附近商埸，有流動檔賣緊迷你電飯煲，20分鐘煲好飯，30分鐘煲好粥仔。

話SOGO賣緊400元，现在特价200元！

白色個碗係用來洗米。

飯煲只得紅色、黄色及兩款白色。

一星期包換，一年保養，唔駛receipt,內有保用証，附上一張黃色双面名片，觀塘創紀之城3樓某店代理，係韓国”歐之宝”牌子。

曾問sales那里製造？她答馬來西亚！

但回家睇個包裝只得香港同國內名稱字眼。

用法： 因煲既時間短，餸和飯一起煲，（蒸水蛋例外，只需蒸last 5分鐘喎，但未試）。

起初一仔媽漏了講比工人姐姐依一点，她無放到裝了餸的不銹鋼盛餸器，飯煲個蒸氣窿不停”彈”d蒸氣出来，放了個盛餸器，仍有少許彈，不似平時的飯煲蒸氣只向上噴。

所以，依個新飯煲用既時候，要遠離d電掣窿！

煲軟飯效果ok！

煲粥，就叫工人姐姐再早30分鐘用熱滾水浸米，但觉得d 水最好只放到飯煲一半。

煲完后，説明書話会自動跳去保温4-5小時（唔明点解唔可以一直保温下去？）。

清洗： 個內膽取唔出，要成個飯煲拎去水龍頭下洗，個sales 示範d水噴到电掣都唔怕，但我地寧願冚番個白色膠蓋先洗。

嫲嫲原來自己都剛剛在另一商場買了一個后，在另一商場亦见到有得買，还要送多一份贈品有碗、匙、叉，所以小表姐話我地兩個都蝕底了，什么贈品都没有。

另外，上網查mini rice cooker，原來都有好多款！

開始刷牙 + 麥皮早餐

<1yr5mo>

一仔一時肯一時唔肯比清潔口腔，莫非仍未吽完牙？

但食野都算正常吖！

Anyway， 一仔媽終於开始幫一刷學刷牙，但一仔又咬又玩多過刷。



支牙刷原本有塊圓片，可防止BB將牙刷推得太入個口里，但用了，反而令到一仔刷唔到左右兩邊，所以塊圓片無用到。

杯里裝的係凍滚水。

刷牙時間 ： 食完早歺后，有時一仔已擒出了歺椅，见一仔媽拎住支牙刷，又自己擒番入歺椅內坐，真係笑c一仔媽！

如果刷得麻麻，会補多一次清潔口腔，但一仔未必次次都合作。

晚上暫时依然人手清潔口腔，待早上刷牙有進步先！

**********************************************************************

題外話

一仔已經可以自由擒出擒入歺椅，一仔爸媽不再阻攔了。

会否擔心一仔有時失手跌倒？

都会，但擔心不了那么多，只希望不会發生！

还有，依隻馬騮仔，现在落sofa不再反轉身，双手扶住sofa，脚慢慢落了，直接sir落sofa！
***********************************************************************

反回正題

上次健康院一歲打針，姑娘話要減少飲奶份量！

前排一仔有一個星期吽牙，食野少了，但之后食量增多了，晚歺食剩幾啖飯，还要補120-180ml奶，唔知同飲了兩次肥仔水有关係嗎？

抱住時重手好多，起初磅重依然24磅，隔兩天再磅，一仔今次識自己企起個磅上磅，有26磅呀!

晚歺飲奶多了，唯有係早歺減奶。

試過再買Healthy Times cereal 給一仔食，食了兩天后，唔肯開口再食。

真奇怪，仔呀，以前你幾個月大都係食依款，果時你好like食喎!

於是改請教了田鼠媽，買麥皮，桂格(紅色包裝, 即食果款），起初怕一仔唔肯食，買細包裝，差不多食晒，先買罐装，食完個罐唔會扔，買大包裝refill便可。

一仔媽自己甚少食麥皮，再請教田鼠媽食的份量 ： 5匙麥皮 + 90ml奶 + 生果.

第一天一仔要補60ml奶。（六点半食麥皮 + 補奶，八点食生果）
第二天要補150ml奶。
第三天改6湯匙麥皮撈70ml奶，再補50ml奶
第四、五天及之后都ok。

每次一开始食，一仔唔肯食，要强迫餵食第一啖后，先肯乖乖继續食下去。

食了幾天，又開始扭計。

扭計第一天，食了兩三啖，唔肯再食，補了120ml奶，轉頭見到一仔媽執手尾打算食麻，一仔又肯食番，成碗食晒！

扭計第二天，食了一啖，又唔肯食，補了180ml奶，一仔媽今次真係要執手尾食麻。

好彩十點和女麻女麻去飲茶，成碗排骨飯食晒，唔肯食粥、食包，一仔變了名副其實的飯桶!

但罐麥皮剛剛先開，一仔你唔食，就大穫! 一仔媽亦唔放棄，晚上吩咐新印印第二早依然開麥皮。

扭計第三天，一仔早醒了，趴上一仔媽心口，一仔媽同一仔講 :

"仔呀，乖食麥皮啦，麥皮都有奶架，食完麥皮又有奶飲，媽媽唔會呃你!"

今次一仔真係唔駛迫，第一口就肯食麥皮，之后先飲奶 (前后共用了15分鐘)，飲完奶再刷牙(5分鐘左右)!

還是今次連早餐都比一仔玩手機，所以一仔先咁合作呢?

一仔呀，希望你繼續咁乖食麥皮!

P.S. 依套膠叉、匙、刀，千色店有得買。