終於自己舀飯食

<3yr7mo>

由一歲半開始訓練一仔自己舀食野，終於現在成功了，由九月初到今天，晚餐"多數"都係一仔自己舀來食!

一歲半時，一仔可以左右手一齊用匙餵自己食，但從碗舀出果下，就由我地負責，之後想訓練一仔做麻舀出來的動作，唔成功，唔知點解仲演變成全程由我地又舀又餵！

平時一仔食野，會玩手提電話或ipad，初時見一仔食野好快，大約廿分鐘內食晒，便由得佢，但漸漸要半小時以上....

暑假前已間中同一仔講，七月起晚餐要佢餵自己食，食飯時亦唔可以玩手提電話，最後趁九月四日抗戰利假期帶一仔去冒險樂園的波波池玩，前一晚食晩餐前，同一仔講要佢自己食飯，第二天才有得去波波池，一仔話好。

但到開飯時，一仔出聲要工人餵，一仔媽話一仔要自己餵十啖先，一仔媽數一啖、兩啖、三啖...，見一仔自己繼續食下去，一仔媽當然由得一仔繼續食落去，哈哈!

第二晩，白天去完波波池，無藉口添，於是一仔媽又話一仔自己食十啖先，數數下...哈哈

第三晩，一仔媽索性拎走麻ipad，一仔媽要一仔食十啖先，十啖食完，一仔好似忘了要ipad, 反而一仔爸話唔好呃小朋友，要畀番ipad一仔，依個慈父呢！

第四晩，一仔爸不在家食晩飯，一仔媽同一仔講食完飯才有ipad玩，一仔又肯合作喎!

之後天天食晩飯，用上面同一個理由，一仔無再拎ipad玩了。

一仔餵自己食，有時只舀餸食，又要提才會用左手扶住個碗，所以我地要一邊食一邊監督住一仔食麻白飯。

以前每晩一仔會食一碗飯，有時會叫加飯添，自從要餵自己食，有時食了大半碗飯，一仔會話飽，改由我地接手餵番，佢又可以食晒成碗飯。

午餐呢，工人話一仔已有三個星期無拎電話出來玩。

早餐食麥皮及飲奶，仍由一仔媽餵，嗯，畀多少少蜜月期一仔吧，之後....

這個短片是第一天拍的，所以仍有ipad

另外，這個月飲藥水，一仔肯用量杯飲，不需再用針筒了。

N班開學 Week 9 + 學校戒片暫停

<2yr8mo>

學校戒片 3rd week

星期一
今天學校戒片成積： 居然無濕到呀，可惜回家途中一仔話痾殊殊，跟住真係痾了，然后開始喊，好彩回家路程只係5分鐘左右，最后濕了一條底、運動褲、一對白襪、一對波鞋。

之前用戒片褲嘗試戒片時，多數痾濕了時，一仔都唔會喊，現在用普通底褲，痾濕了，一仔會喊，反而覺得係好事，亦慶幸係學校痾濕了，一仔都無話抗拒唔穿底褲返學。

后來同班主任講電話，才知道一仔會跟其仔同學仔拎杯拎毛巾盒出來，但一仔唔食茶點又唔飲野，所以才不會痾濕! 



星期二
今天一仔爸接放學，打電話問我萬一阿仔放學途中話要痾殊殊點算?

我話盡量叫一仔忍，忍唔到痾濕了，都要返到屋企才可換架啦! 唔知下次一仔爸還會否選擇接阿仔放學嗎? 

班主任見到一仔爸時，話一仔去坐廁所時唔多合作，依幾天在家，一仔都多了主動講痾殊，但帶佢去廁所，佢卻拎轉身要走人，其實係未屋企都要唔穿尿片，改穿底褲呢？

今天學校戒片成積： 濕了一條底、運動褲、一對襪、波鞋。


星期三
今天學校戒片成積： 

噢，班主任今天打電話給我(主要因一仔件校服唔見了粒button，一仔媽留了張紙仔問學校有無多一粒spare)，話終於"夾到"一仔坐係廁所上痾殊殊了。

但可惜班主任亦話覺得一仔心態上未ready，所以學校戒片要暫停，要待明年五月時再戒了。

有些失望? 少許啦!

但睇番這兩個半星期的學校戒片成績，一仔由最初不會講痾殊殊、痾臭臭，到現在有時會講，這少少的進步，我已經覺得好好了!


***********************************
天氣早晚開始轉涼，好彩學校剛發了張通告話11月初買冬季校服，11月中正式轉穿，如果期間需要，可以加穿一件白色長袖開胸冷外套。

記得8月初開學穿夏季校服時，覺得好大件，明年都穿到，現在穿穿下，仍然覺得大件，但感覺ok了，所以冬季校服希望可以跟番夏季校服呎寸去訂呢!

今個月，一仔升到30磅、89cm高，原本尿片及學習褲都係大碼，應該可以改穿加大碼了。

N班開學 Week 8 + 原校升K1?

<2yr7mo>

今個星期開始學校戒片 2nd week

星期一
今天學校戒片成積：濕了一條底褲、運動褲。


星期二
今天學校戒片成積 : 濕了一條底、校褲。


星期三
今天學校戒片成積 : 濕了一條底、運動褲、一對襪、一對黑皮鞋。

上星期對黑皮鞋濕了后，一仔爸怕個魔術貼穿過衣架后會突然負荷不了而甩，加用扣針勾住黑皮鞋里面，再用衣架掛出窗外，會容易曬乾d。

但用扣針勾得多，就算勾里面，都會勾到一個個窿。

突然想起上星期一仔塞了好多玩具係梳化底，最后玩具洗乾淨后，用洗衫袋入住，再用衣架掛出窗外曬乾。

所以，今次皮鞋用魔術貼穿過衣架后，都用相同既方法 >> 入洗衫袋先，將洗衫袋一邊在衣架上打個结，又用大衣夾夾住個洗衣袋，才掛出窗外曬乾。

星期三、四國慶及重陽節假，不用返學。

但這兩天，換片時若問一仔痾殊殊未，佢反而會講v v。

星期四開了兩次大，兩次都有主動同我地講痾臭臭。



星期五
因打算放了學直接约嫲嫲去飲茶，唔想揾地方換片，所以今天在書包里留了張便條話比班主任知今天改穿尿片返學。

但唔知点解放學時一仔全套運動衫褲都換了，借了學校的去着？

過了12点，好多酒樓已無排骨飯賣，一仔最后飲了240ml 奶。




今個星期的進步
上個星期一仔真係識講識指eye 、ear 、nose 、mouth ，今個星期識講 head、眼、耳、口、鼻鼻、toes了; 識指shoulders, 但未識講; 講kness 時，卻指住toes。

見到d 車郁，會講”呠呠”。

這幾天在不喜歡時，會大叫。

之前班主任話一仔在學校會流口水，可能口腔肌肉弱，建議可咬菜莖，但連餅餅都唔食的一仔，又點會乖乖肯咬菜莖？

剛巧見到前排學校生日會送的吹筒，一仔見我地吹，有時佢都會吹下，之后在深水埗買多幾支，平的一包五元有五支。

多數星期五一仔會有功課拎回家做，今個星期係連線(將英文字母連去所屬的圖案)及油顏色，但居然發現有幾頁之前無做功課而給老師打了問號既? 

一仔多了喜歡油顏色，還要拎功課果本油，但功課油完不能再油呀，於是改拎自己買的畫書給一仔油，但一仔唔要，只想要功課果本，看來又要入下貨再買書了!

原校升K1？

學校出了一張通告話N班同學可以優先升K1。

BK上其他家長對依間學校的評語差多過好，但一仔返了兩個月學，我地又覺得ok，尤其是班主任願意幫一仔戒片。

睇BK啲家長話如果小一派位參加大抽奬，其實間間有學劵的學校教的程度差不多。

但當你深入睇每間學校網址介绍學校的詳情時，會發現有學券的學校除了全日班的學費可以由900元 - 2000元(相同咁貴的學費，但有d學校有興趣班提供)、又分10 - 12個月比學費及每個學期的雜费由1000元- 3000元不等外，有些學校會提供net teacher 教英文(一仔間學校現在有)、有普通話堂(一仔間學校現在有)、有興趣班(一仔間學校現在及將來都無)  > 如果學校有提供，那我地不用另外出外找，又可以放心比一仔繼續留在學校上堂啊。

所以，雖然幫一仔填了願意原校升K1，但都會幫一仔報其他學校去面試，hehe，當帶一仔出去玩，順便又可參觀其他學校。

N班開學 Week 7 + 學校戒片 1st wk

<2yr7mo>

上個星期一仔返學，已經無喊，所以今個星期請班主任梁老師試下幫一仔係學校戒片。

裝備 ：
穿 : 一條底
帶 ： 兩條底/兩條短褲/一對襪/一對輕便鞋


星期一
平時食完早餐（麥皮+ 奶）或8am 食完生果後，一仔會疴臭臭，但今早居然無臭臭，工人姐姐問點算？一仔媽硬着頭皮話唔緊要，萬一在學校才開大，學校會識善後，按原定計劃照穿底返學！

一仔媽在公司擔心了整個早上，结果，一仔回家後才開大，好彩好彩！

今天學校戒片成積： 濕了兩條底、運動褲。


星期二
今早又無疴臭臭就返學，好彩又在返到屋企后才開大。

今天學校戒片成積： 全軍覆没 > 濕了三條底（第三條在放學回家途中濕）、校服褲、兩條短褲、皮鞋、后備鞋、兩對襪。


星期三
今早食完早餐已有臭臭。

今天學校戒片成積： 濕了一條底、運動褲、波鞋、一對襪。


星期四
今早要食完生果才有臭臭。

前排一仔唔肯食之前一直最喜歡吃的蘋果，這兩天终於肯食番了。

今天學校戒片成績： 濕了一絛底、一條校服褲、一對襪。


星期五
今天學校生日會，穿便服返學，唔想在party 途中整濕了麻煩嬸嬸去換，所以改穿番片返學。


記得當初班主住話小朋友返學若喊，好既兩星期唔喊，有些要一個月，最后一仔係喊了五個星期。

班主任又話在學校戒片多數兩星期便成功，萬一不成功，明年夏天可再試，所以，一仔媽現在見到一仔返學唔再喊，講野又多了，已經很欣慰了。



這個星期的進步/改善
1）一仔很明顯講叠字及跟口水尾多了，識講"杯杯、書書、筆筆、旦旦、水水、白飯、的士、到、獅子、早晨、虎(即巧虎)、monkey、係(唔再只肯講yes、話(即電話))"等。

在學校應該有成日唱 Head、shoulders、eyes的歌，回家又睇youtube，現在識講又會指住eye、ear、鼻鼻、mouth。

亦見过一仔睇youtube ，開始学講英文的形狀。

但教一仔講佢自已個名，一仔只講到"正正"，"一"呢，佢會自動translate 為"one"。

其實一仔廣東話只識講少少，反而講英文字多d，但一仔更喜歡睇"番話"的youtube ，一仔媽到現在才發現那些番話原來係"俄文"!

2）上個月晚歺一仔只肯食白飯，唔肯食餸，今個星期開始肯食了，食過鯇魚腩、蒸旦、豉油皇雞翼 > 依個雞翼的煮法，係叫工人姐姐跟youtube學的，十分好味。

之后再煮豉油皇雞翼時，一仔都主動手指指要求要食。

有一晚煮了荷包旦，一仔又指住要食。

今個星期一仔媽用匙畢定了d飯餸，間中一仔肯餵自己食。

但晚歺后，要補奶120-150ml(之前只有60ml)，唔知是否前排因避開要打仗咁餵一仔食药，直接將鼻水药倒入120ml奶撈麻比一仔飲，令一仔個胃口大了呢？

一仔又肯食番蘋果了。

3）一仔自己主動着拖鞋，有時想跟工人姐姐出去倒垃圾，又或可以企出門口的走廊上望住一仔媽行去搭電梯(一仔知媽媽唔比佢赤腳踏出走廊的)。

一仔又嘗試自已穿鞋及除鞋，但有時左右鞋仍掉亂。

4) 自從返學 Week 2病了后，每逢一仔爸在屋企一起上床瞓覺，一仔見爸爸瞓了窗邊的位置時，一仔會拎住自已個枕頭及毛巾，行去床尾，然后不停講"唔該晒"，直至一仔爸肯讓出個窗邊位比佢瞓為止。

5) 今個星期玩完一種玩具，一仔要玩第二款時，叫佢執番好第一款玩具，佢都肯執，無再喊住執。

6) 可以見到學校英文書里的物件，講出所屬的英文字母。

第二次去將軍澳泳池@寶琳站 + 大埔林村許願樹

<2yr6mo>

估唔到今個月有得再去游水，原本一仔爸想去動植物公園，但一仔嫲嫲想教孫仔游水，當然最后嫲嫲勝出，Yeah！

嫲嫲話自己游水麻麻，但小表姐在她的指導下，依個暑假，記得7月時小表姐學游蛙式時，心口要縛成塊浮板（應該係背面用的）。

今天，塊浮板可以拆剩只用一片了，及縛在背面了，游到最后15分鐘，小表姐不用浮板都游到幾步添。

一仔呢，有過上次嫲嫲抱住過水閘后大喊，今次改由媽媽抱住過水閘，盡量係近牆邊過，唔比d水淋到一仔。

過了水閘后，替一仔穿上新買的游水手袖（之前見到blog 友Kelly 播放仔仔小豆子戴住手袖係海里自己游水，好叻呀！），深水埗買，$35一對(之后見到一間賣$28咋)。

再套上水泡，慢慢帶一仔落水，由腳可踩地到深d水踩唔到地，一仔都有瓜瓜叫，但全程無大喊！

等一仔適應后，嫲嫲拎走水泡，抱住一仔，教佢郁下手腳。

一仔媽始终站在一段距離外，作為引一仔游水的目標。

期間，見到有一個小朋友，好似一仔咁大左右，穿住依件S型水泡，好似幾好，下面cool住條腰，個人一定浮出水面。

又去淺水區的滑梯玩了一陣。

平時喜歡去公園sir滑梯的一仔，今日次次要媽媽抱住才肯sir。

有一次，爸爸話比一仔坐前d自己sir，佢會在盡頭接住一仔。

结果。。。男人的說話可信，豬乸都會爬樹！

一仔成個人”潛”晒入水，而一仔爸企係旁邊！

好彩一仔無喊咋！

玩多一陣，已一個小時有多，就走人去飲茶。

係沐浴時，一仔才大喊，因他不慣用花酒洗頭沖涼。

媽媽去換衫時，一仔亦無大喊。

唔知下個月仲有無得去游水呢?

飲完茶后，今日要趕第二埸去大埔林村的許願樹。

寶牒$5一份一個人名，$20一扎香

許願牒$20一份一個人名

依棵唔係真樹了。

再回家有第三埸，又慶祝爸爸農曆生日，食蛋糕。

一仔眼甘甘望住個蛋糕，但一啖都唔肯食。

是日一仔瞓到六点，skip了5点小食無食，晚飯提早七点半食，可能肚餓，依晚一仔肯食麻肉食麻菜。

靈隱寺@大嶼山

<2yr6mo>

一仔嫲嫲每年都会去靈隱寺拜佛，上年一仔爸認承了今年帶麻一仔去，好彩天公造美，無落雨，但一仔爸事后話寧願落下雨，因当天超熱呀，但我就話落雨去街，又拎住一袋二袋才麻煩！

九点半鐘开壇，嫲嫲話希望八点幾到，一仔爸又話大嶼山巴士好耐才有一班車，又怕撞着上班人潮撘車.....最后唔知醒，四点七扎醒左，好彩大部份野前一晚已準備好，但比人摷醒換片換衫的一仔就大喊，直到出門時才收声，幸好趕到預期5点出門去接嫲嫲及小表姐，六点到東涌，但商場餐廳未開，直到六点半才揾到已開門的大家樂。

貪方便，只帶了奶比一仔飲，當早餐。

第一次搭巴士，一仔好乖的，無扭计。

落了車，大约行5分鐘。

到了寺廟，一仔唔肯坐定定，走來走去，直到11点去食齋，一仔才乖乖坐係媽媽大脾上，由媽媽用筷子一啖一啖咁餵，足足食了兩碗白飯，唔肯食其他餸。

再搭巴士去大澳，5分鐘車程，但無位，一仔都肯乖乖獨自緊握扶手企係到，無扭计。

大澳有得搭船出海睇海豚，但一仔爸話坐船不安全，所以最后都無搭船。

小表姐買了大澳的大魚旦食，但揾唔到砵仔糕。

一仔當然痴飲洛神花茶(但同事話原來好"涼"，不太適合小朋友飲)、凍飲。

上番巴士搭去東涌時，一仔终於瞓着了。

但由東涌再坐車番屋企，一仔無瞓番！

坑口文曲里公園

<2yr6mo>

上上次去單車館兒童遊戲室，時間玩了大半后，一仔自己着鞋要走。

上次去坑口體育館兒童遊戲室，去到門口，一仔大喊，完全唔肯入去。

所以依排放假，改了去屋企附近的文曲里公園玩，之前都知公園里有小水池，卻不知道池里原來有好多魚及烏龜！

以前，新都城都有個室内鯉魚池，有條長橋，好多小朋友喜欢去睇錦鋰、烏龜，又在橋上跑來跑去，但后來拆了，实在十分可惜。

七月尾第一次去文曲里公園，一仔第一次自己孭背袋。

起初一仔唔肯孭，一仔媽要試範孭個黑色大背囊，一仔才肯孭小背袋。。。到時返学，唔知一仔肯唔肯孭書包呢？

昨天第二次去，臨出發前發现鞋柜里的吹泡泡棒，正呀！

因太熟，心口的熱痱似乎番发

講 fish fish!

數魚

泡泡唔食得架!

今天又去，一仔唔肯着媽媽为他準備好的”小李小龍”衫，最后改穿依套。

有個朋友見到一仔張相玩到面红红，問是否正常喎？

佢話小朋友只会玩到流晒汗，应不会面红？

各位媽媽，你地的小朋友係室内或室外，都会玩到面红嗎？

30個月大的成長報告

<2yr6mo>

活動能力
1）以前食晚飯時，一仔坐 high chair，由工人姐姐餵食飯。依個月，一仔手指指張飯桌，意思要和我地一齊坐係桌邊食飯，最初，還要坐係普通椅上，奈何唔夠高，最后都肯坐番high chair上。

有時等不及工人姐姐在旁準備飯餸，一仔會玩下咁自己筆少少飯食住先。

一仔呀，你幾時先肯完全自己筆飯食呢? 

2) 一仔有時一日咬人幾次，邊個教? 當然係一仔爸啦! 一仔媽最近已經警告一仔爸唔好再咬一仔，因怕一仔開學后咬同學呀!

3) 工人姐姐話一仔有時都肯幫手執玩具，但會喊住去執!

4）一仔細個時，一仔爸曾和一仔玩過"阿拉伯王子遊戲"，即用毛巾遮住一仔個頭，估唔到現在一仔都喜歡這樣同我地玩，用毛巾遮住我地個頭!

5）講故仔進度停滯了，因一仔媽有時都很倦，一上床就瞓覺了，反而一仔有時唔想瞓住，塞本書比一仔媽讀，想拖延瞓覺既時間。

6) 自從一仔爸"復出"用雞毛掃罰一仔后，一仔聽爸爸話多d，尤其當爸爸話 : 喂，電話好大聲! 一仔會即刻將電話音量調教細聲d，但轉頭趁我地唔留意時，偷偷地又將音量調高。

6）会主動幫爸爸泵骨，但泵幾下就收檔。


講野

依個月又講多了:
依個, 我要巴士(聽過一次), 唔該, 謝謝, Thanks(唔知有無聽錯?), fox, black, pink, brown, white, 唔執(指玩具), yes

之前一仔都識叫Papa mama，依排卻統一叫"媽子"

之前已識講:
yellow, blue, red, green, cat, dog, man, oh no, oh shxx,  cow, duck, Mickey, in, out, mama、papa，Mi(工人姐姐)、果個、果果(蘋果)、奶支(奶咀)、曳曳、部機(手機或毛巾)、波、巴士、奶奶、好驚、orange、嘩、扮"乞池"，"屋澳"，one、 2 、three、four、five、eight、nine、ten、A, apple, B, ball, CDE'符'fish, GIOPVXvv(即W)YZ，no，ok、鴨鴨, 汪汪（狗叫声），媽(即係姨媽)，我知，再見(明明應要講早抖，唔知點解會講"再見"?)、貓、對唔住



失踪無再講:
嫲嫲，我要入去， 唔入， 飲奶奶， 去边到, 依到


玩手提电話
1. 除了会玩Candy crush, 釣魚、迷宮外，今個月真係識玩射配对颜色。

2. 之前一仔玩緊电話，一仔媽話要借电話影相，一仔会瓜瓜嘈，去到8月头，一仔会幫媽媽按入相機模式，才比番电话妈媽。


戒奶樽進度
只可以早上用鴨咀杯飲奶，晚上堅持要用奶樽。

見一仔平時喜歡痴爸爸用礦泉水水樽飲水，一仔媽專登買了新水樽，樽口好似礦泉水水樽咁，第一晚，一仔肯用，第二晚唔肯用，還因為抗拒用，一仔倒后行時，頭撞到窗花，唉，似乎一仔未ready戒奶樽呀!

水樽可兩用

戒奶咀進度
同樣原地踏步，而且因為一仔成晚含住奶咀瞓，令到咀角兩邊長期有口水漬，兩邊咀角依排成日紅紅地添。

刷牙進度
之前一仔刷牙都係玩玩下，自從上個月買了一支香蕉味的牙膏，試了一啖，一仔就不願再用牙刷玩添，唉！

小破壞王
張low chair 塊桌比29磅既一仔踏爆了，一仔爸係桌面痴膠水，桌底用塊硬膠的手寫板頂住先。

小朋友生眼瘡/眼挑針

<2yr5mo>

第一晚，一仔媽以为一仔右眼有黑眼圈。

第二晚，白天嫲嫲帶了一仔出街玩（Yeah，一仔肯跟番嫲嫲去街了），一仔爸以为一仔比蚊咬。

第三晚，工人姐姐番开一仔的眼皮，見到有粒白色野。

一仔媽連忙上網揾資料，才知道小朋友容易生眼瘡/眼挑針，但通常会生在上眼蓋，而一仔係生係下眼角附近，原因可能用污糟手捽眼，輕微的可用熱水敷或用白菊花水抹眼，嚴重的要睇医生。

第四天（星期日）朝早，一仔爸返完通宵班回家，白色粒已”化开左”，唔知係好番中定更嚴重了? 

”化开左”?

正面望，明顯d

側面望，無咁明顯

一仔媽連忙去药材舖買白菊花煲水。

是日敷眼加抹眼3次，及一仔飲了十多啖菊花水。

第五天(星期一)敷加抹眼又3次，放工回家已見一仔隻眼無乜腫，已好番9成，但工人姐姐忘了留番些少菊花水，所以臨瞓前無再幫一仔抹眼(第4次)。

第六天(星期二)早上，一仔肯乖乖比棉片敷耐d，媽媽拎走棉片時，一仔手指指隻眼，媽媽乘機鵝一仔唔好再捽眼了。

好似已經好番晒了

白菊花10元

1) 手執少少，大约6朵花，用生水沖兩次，放入一碗水的煲內

2)细火煲5分鐘，水滾已变黄色及有一陣菊花味（網上話要煲10分鐘）。

3)用棉片濕了菊花水，揸乾大部份水（一煲完，水會十分熱，大约等一分鐘水降少少温度才好去敷眼），熱敷患處幾秒先（因一仔唔合作），再抹眼幾下。

4)再用第二塊棉片重複以上的動作。

10元，其實買5元都夠用

浸一浸+沖水2次

手誤執多了些花

部份用杯盛起，當天每次用時，倒些少入煲內煲滾，再熱敷及抹眼

參考資料:

眼瘡

Readandeat覆大家治眼瘡的土法
冰水退眼瘡

4歲兒童眼睛生瘡

左眼睛出問題，持續多天

煲菊花茶

煲菊花茶應該用邊種菊花

點煲菊花荼?

愛心杞子菊花茶

點煲菊花茶先唔苦

我想問點煮"菊花茶"嫁?

第一次去將軍澳泳池@寶琳站

<2yr5mo>

原本計劃去動植物公園，但打完風，怕会落雨。。。点知小表姐及嫲嫲臨時話改去游水，嘩，一仔媽我当然舉手舉脚贊成（仲以为依个暑假無得再掂水添），上次去过沙灘，今次去泳池都好，但一仔爸其实寧願去沙灘的。

九点去到泳池，在更衣室里，一仔居然亦肯乖乖換上泳衣。

但过完水閘后，未落水，一仔已經拉住媽媽隻手要行番去水閘，但一仔又唔敢行入去。

一仔唔肯落水，最后抱了一仔去淺水区的sir 滑梯，一仔爸抱住一仔sir 了一次后，一仔只肯在滑梯平台上走來走去，唔肯落水，就算坐了落水泡里，亦要想擒出來。

其間嫲嫲嘗試在水里抱住一仔行來行去，想幫一仔warm up，但一仔只係喊ing 望住站在一段距離遠的一仔媽，不停話驚驚、連講了幾次"oh shxx"、又話曳曳。

小表姐身前cool了一套幾塊浮板学游蛙式，有一下側晒个身，双手拍水，我和一仔爸都未为意時，好彩嫲嫲在旁即時扶了小表姐一把。

原來身前cool浮板，若失去平衡，会反身，但小表姐唔識游水，会好驚。

后來，嫲嫲拖住一仔隻手仔在淺水区行，一仔媽和佢地keep住幾步遠距離，引一仔不断向前行，全程一仔都係喊。

最后玩到10:15am，在更衣室里，一仔媽去了換衫或吹頭，嫲嫲睇住一仔，一仔都喊要揾媽媽，真擔心下個月幼稚園返学点算？

以下的相及video，係在观眾席拍的。

去过幾個泳池： 葵盛、石蔭、荃湾城門谷、沙田，TKO依个係最好玩又啱小朋友的。 

遲d 將軍澳地鐵站附近会興建一個室內暖水泳池，雖然去游的机会好少，但都好期待呢！

29個月大的成長報告

<2yr5mo>

活動能力
1) 一仔媽要幫一仔準備用品清潔口腔及換片，一仔會幫手拎棉花棒點凡士林、逐片將棉巾放入暖水里。

2）媽媽話沖涼，一仔會自動去廁所柜里，拎出個浴盤，放上企缸上。

3) 曾試過上了床才幫一仔剪腳甲，點知果排晚晚一仔都要剪，好彩最后分散了一仔的注意力，無再晚晚要剪了。

4) 6月頭第3次戒奶咀失敗后，頭兩三晚一仔要玩到十一、二點才肯瞓，好彩之后正常番，玩一陣就瞓。

但另有一個新問題出現，一仔唔比關燈瞓覺，好彩到了7月頭，有一晚一仔媽突然靈機一動，同一仔講"食奶咀，就要關燈瞓覺"，一仔通常會扭一陣，最后會乖乖聽話瞓覺。

5) 繼上個月一仔爸教識了一仔曳完要講"對唔住"+飛吻，今個月佢又教識了一仔"錫錫"，每次我地一啫咀及話錫錫，一仔就會錫。

有時見到一仔爸要一仔錫，覺得好sweet之余，一仔媽心諗"兒子都係爸爸的前世情人"呀!


10/7 一仔爸話一定要記錄低依一日，因除了爸媽外，怕醜既一仔亦肯錫嫲嫲及姑媽，開心到嫲嫲呢....

嫲嫲前排唔得閒，無同一仔去公園玩，到得閒時再帶一仔去時，換麻衫，一仔都唔肯跟嫲嫲出去呀。



食野飲野
1) 有兩三次一仔爸食緊辣野，一仔要痴食，比了幾啖一仔食都食到，完全無事咁!

但有一次去茶樓食排骨飯，唔小心比了辣椒一仔食，一仔即刻扁晒咀，連忙比水佢飲。

之后塊面有少許一點點紅，好似敏感咁，好彩過了大約半小時至一小時后，紅點無晒。

2) 開始在一仔每日食的豬肉加"丁點"鹽及油"，工人姐姐試過加多少少"鹽及油"，一仔反而唔like。

3) 為了配合一仔8月中返N班，但又怕佢唔食學校既茶點，擔心佢等到12點半放學回到家后才食，會太肚餓，所以食野時間更改如下:

7:15am(之前係7am) 食麥皮 + 180ml 奶
8:15 - 8:30am  生果
12pm(之前係11:30am) 午飯
5pm(之前係4:30pm) 半碗麵或通心粉
8pm 晚飯

4) 之前好擔心一仔飲水唔夠，自從6月中姨媽送了依個水樽比一仔后，一仔好明顯飲水多了。

5) 上個月轉用了用鴨咀杯飲奶成功，但7月頭一仔晚上無端端又要用番奶樽飲奶，好彩早上依然肯用鴨咀杯飲奶。

6) 一仔每天早午晚食既餸都係相同 - 菜及豬肉，唔知點解去到7月头，12点果歺会乖乖食晒，但之后兩歺，一有菜就lur番出來？

如果果日食莧菜，就無lur。


手提电話
1) 一仔喜欢睇youtube 時將音量推到最大声，一仔爸媽有時要推番细声時，之前一仔会发脾氣。

但6月中開始，十次有七次當我地話個電話好大声時，一仔會主動整番細声，但有時佢又整得太細声，轉頭自己又會整番大声d。

2) 如果一仔玩緊媽媽部手機時，突然有電話入，每次一仔都會嚇到大喊。

3）喜双玩手机apps 的迷宮、配对、candy crush、釣魚、卜老鼠、射顏色、painting

講野

依個月又講多了:
yellow, blue, red, green, cat, dog, man, oh no, oh shxx,  cow, duck, Mickey, in, out


之前已識講:
mama、papa，Mi(工人姐姐)、果個、果果(蘋果)、奶支(奶咀)、曳曳、部機(手機或毛巾)、波、巴士、奶奶、好驚、orange、嘩、扮"乞池"，"屋澳"，one、 2 、three、four、five、eight、nine、ten、A, apple, B, ball, CDE'符'fish, GIOPVXvv(即W)YZ，no，ok、鴨鴨, 汪汪（狗叫声），媽(即係姨媽)，我知，再見(明明應要講早抖，唔知點解會講"再見"?)、貓、對唔住



失踪無再講:
嫲嫲，我要入去， 唔入， 飲奶奶， 去边到, 依到