由'到校計劃'到'e位' + 備戰報小一

<5yr0mo>

好感恩一仔於2016年年初入到'到校計劃'，又在2016年9月K2時终於排到'e位'。

當初入到'到校計劃'，開始了st、pt、ot、pst的訓練後，一仔在各方面都有進步。

到9月轉到'e位'，訓練的次數比'到校計劃'更密集了，感覺上一仔好似進步更多！？

例如一仔不再抗拒玩打千秋！

説話方面如可講到短句子，一仔好喜歡一仔爸以前從7-11便利店儲下來的小叮噹印仔，一仔將它們當做乘客放在巴士站排隊。

一仔爸儲了廿多個小叮噹，但只给了5個一仔玩，一仔問: '點解爸爸成日收埋d野架?'

小叮噹唔夠多，一仔會搵麻依d Little Minions 當乘客。

依排留意到一仔開始識分到'你'、'我'。又喜歡講'但係....'。

一仔好喜歡問人'住邊到？'，因一仔會用google map揾番果個人實際住邊到。

一仔媽其實有些少內疚，一仔仍要瞓晏覺架，上午返學，下午返訓練或返學校的興趣班，令一仔有時一星期只有一天在家瞓晏覺的時間，而其他日子間中下午上訓練時會恰眼瞓而扭計。

一仔現在主要參加了學校的交通安全隊，另加一至兩天學校的興趣班，取消參加學校的興趣班，可以嗎？

但一仔媽衡量過其實參加學校的興趣班目的，亦是'e位'外的輔助訓練，如交通安全隊是訓練一仔的'社交'及聽指令，令喜歡玩的一仔喜歡學校，更加喜歡返學。

再且，學校的興趣班學費很抵，$100返8堂，一星期返一堂。

一仔媽另外內疚因要返工，不能陪一仔去上'到校計劃'或'e位'的訓練，幸好有工人姐姐陪一仔去上堂。

備戰報K1，唔係諗住替一仔備戰去某某小學扣門面試，而係一仔媽自己要揾定校網内各小學學校的資料，諗定怎樣報今年年尾9月的自行分配學位及參加明年2月的統一派位大抽獎。

一仔媽主要有兩樣要考慮。

第一，報小學時是否要申報一仔需要言語及其他的訓練？還是等小學收了一仔後，才申報需要這些訓練呢？

第二，一仔是一個活潑好動但又敏感的小男孩，一仔媽想揾些happy school、唔谷（指功課/默書/測驗/考試量不會太多），而老師又有愛心、能循循善誘教導一仔、又有支援言語治療訓練等各方面的小學！？

上了小學，就算學校有言語治療等的訓練，聽聞都會比e位的少。有些小學好貼心，會在校網内註明'學生支援'有哪些訓練，方便家長容易找到相關的資料及一目了然，有些會在多頁的週年校務計劃報告裏提及，家長要勤力的去'咪書'呢。

原本一仔媽有兩間二線的心儀小學。

A學校好近屋企。校長會每朝早在校門迎接學生返學，但一年前有ek的家長話這間學校不支援SEN的學生，在學校的校網找到舊的週年校務計劃報告的資料，都只講了少少關於'言語治療'的服務。

另聽聞此學校開始谷，但e位其中一個導師的女兒在此校讀小三，話此校是happy school，她女兒讀得開心。

B學校，聽聞校長推行愉快學習，ek里個個家長都話小朋友返學開心，但e位個導師話有一個家長曾反應B學校她小朋友的班主任經常出"通告”，要家長"跟進"小朋友依樣果樣。

C學校，依間學校係一線學校，好多人爭，一仔媽一直以為依間學校好谷，但e位個導師卻話係happy school。而依間學校有宗教背景，20分在自行階段都要抽，一仔只有15分，只會陪跑。

好迷惘，好彩仍有時間，希望年尾可以去參加不同學校的開放日，了解學校多些。

P.S. 搵小學的資料(內有連結)
2015-2017年小學派位學額
小一派位拆解　點解成績好派不到首三志願？
二○一七年度統一派位各小一學校網選校名冊
小學校網 95 統一派位選校概覽
全港小學一覽表 - Teddy Kids
小學開放日

七月份的小組堂@到校計劃

<4yr5mo>

一仔已經上了"到校計劃"的訓練差不多半年了，因評估一仔較"輪盡"，除了言語治療，一仔亦要上職業、物理、幼兒導師個人及小組訓練。

小組訓練大概一個月上兩堂，主要訓練小朋友的社交技巧，平時因一仔爸媽都要返工，多數由工人姐姐陪一仔去上堂。

今天難得一仔媽可以陪一仔去上堂，睇到一仔怎樣與同學間的互動，更睇到簡單的玩具怎樣令小朋友很投入去玩，從中學習到不同的社交技巧。

首先導師示範要企出去，面對家長及小朋友作自我介紹，要介紹自己叫什麼名字、是男孩子定女孩子、今年幾多歲，介紹完便可以玩吹泡泡一次。

雖然有得吹泡泡，但一仔怕羞，唔肯出去自我介紹。


共有五個遊戲，今堂共有三個小朋友，包括一仔。



第一個遊戲，跨欄:
1) 房的頭及尾各放了一張桌，一張桌上放了一塊拼版，另一張桌上放了不同顏色的拼塊。

導師先問了小朋友知否每塊拼塊的顏色，確實他們認識所有的拼塊的顏色。

實際上堂不是此款拼版，此款只是作參考

2) 在兩張桌中間放了兩支矮跨欄，跨欄之間有一段小距離。

此款跨欄只是作參考，實際上堂那款設計好好多，兩端可以再加木片而調整高度

3)導師先示範在桌上隨意取一塊拼塊，讀出是什麼顏色，然後要"雙腳"一起跳過第一支跨欄，行前幾步，"雙腳"再一起跳過第二支跨欄，然後將拼塊準確放好在拼版裹。


遊戲開始，導師會問邊個小朋友想玩，待小朋友舉手，從中挑選了的小朋友就可以出去玩 > 要小朋友學習跟規則、輪住玩及有耐性等叫到自已個名才去玩。

一仔係能跳過跨欄，但每次卻不是"雙腳"一起跳，而是一隻腳先跨過欄，第二隻腳雖迅速跨過欄，但始終不是"雙腳"一起跳。

回家要和一仔再玩下依個遊戲，要看看一仔係唔明白指示，還是唔識"雙腳"一起跳呢? 因四歲的小朋友是可以用"雙腳"一起跳的。



第二個遊戲，入籃:

實際上堂不是此籃球架，此款只是作參考

房的一邊放了一個籃球架，在距離籃球架一段距離外，成一直線放下三張有色腳墊，三個小朋友要各自企在腳墊上，雙手舉高過頭，輪住將球"放"入籃里。

當小朋友入籃後，不論入籃是否成功，小朋友要執番個球，交給下一個小朋友，然後走去隊尾再排隊。

除了第一round個個小朋友失手後，之後幾round個個大多數都無失手，成功入藍，原來今堂不是第一次玩入籃，所以他們已經訓練有素，可以姿勢正確雙手舉高過頭將球"放"入籃里。

這個遊戲是訓練小朋友專注的感覺，因他們要對準入籃。



第三個遊戲，鬥快取生果:
房中間放了一張桌，桌上放了不同生果。

導師先問了小朋友知否每款生果的名字，確實他們認識所有的生果。

每次桌上放3款生果，桌的每邊各有一個小朋友站定，距離桌有一步遠，由其中一個媽媽或導師講出喜歡食邊一款生果，小朋友要鬥快跑去桌及取果款生果。

贏了的小朋友可以繼續玩，輸了的要返座位坐低，讓下一個小朋友玩。

赢了的小朋友亦要走去下一個準備玩的小朋友前面，邀請小朋友出來一起玩。

這個遊戲是訓練小朋友聽的感覺、可以接受不同人發出的指示及要互動。

導師好攪鬼，其中一次講的生果是桌上沒有的，兩個小朋友望住張桌，都不知點算好?



第四個遊戲，捉棋:
導師拎出棋盤，要小朋友幫手放好棋盤，讓小朋友各自選了一隻動物棋子代表自已。

導師再用點指乒乓的方法，點出邊個玩先?

遊戲開始，小朋友輪住擲骰，跟住骰上的點數逐步行。


第五個遊戲，食茶點:

導師要小朋友用布輪住幫手抺桌，然后一起唱歌，小朋友可選食什麼餅乾、自己用水壺倒水落杯里。

依一part係一仔最弱的，因一仔唔食零食，所以最後是一仔媽食了塊餅乾。

一仔媽的感想 :

一仔雖然已返了差不多兩年學 : N班及K1，相信在學校都有上小組的活動，但實際一仔點樣和同學互動，一仔媽完全不知道，直至現在來上到校計劃的小组堂，見到一仔好投入又開心和同學有咁close的互動，亦留意到一仔比最初時更懂得守上堂的規矩，一仔媽又開心又感動！

港台"第五台" ~ 節目關於"言語治療"及"自閉症"

無意中在網上找到 港台"第五台" 有個節目"有你同行 升級家長計劃"，在"各集內容"中，有些節目是關於"言語治療"及"自閉症"的。

睇了兩集，開頭半小時可以 skip 不用聽。

言語治療 + Bubble Bear@到校計劃

<4yr3mo>

現在'到校計劃'有包括言語治療，最近一次上堂，Part 1 用工具書，工具書即書里的圖片可拉、可轉、可打開等，可吸引小朋友的注意力。

今次工具書里是一個有水池的公園，有不同人在公園里活動。ST Miss 問一仔這個、那個是邊個？一仔都答到是哥哥、姐姐等，甚至公園里有個水池，一仔都答到有個'哥哥游水'。

但要一仔答"邊到"很弱，經常只會答'依到'，如哥哥係水池游水，一仔只會答[哥哥係'依到'游水]。

所以，我地要加强幫一仔訓練答如[媽媽係'巴士到']，而不是答[媽媽係'依到']。

一仔對答'點解'的'原因'亦很弱，如哥哥食緊雪糕，唔可以玩sir滑梯，ST Miss問一仔點解哥哥唔玩sir滑梯?一仔只識講'因為'，之後卻答了其他野，可能他唔識答個原因？

Part 2 玩LEGO，首先一仔自己砌好架貨車先，然後要一仔跟住講['擺'牛奶'係貨車'到']，一仔會經常無講'牛奶'及'到'，要加强訓練。

又要講[推貨車'比'姑娘]，一仔會經常無講'比'，要加强訓練。

Part 3 睇圖片，要一仔講圖片中什麼人做什麼事，如講['姐姐推bb車']，之前一仔會無講主語'姐姐'，現在進步了，多數會講主語。


Part 4，吹泡泡，可幫助訓練口肌，ST Miss 用 Bubble Bear同一仔在課室里玩，一仔唔係好吹到泡泡，因一仔口型不對 - 要圓唇才可吹到泡泡及唔識運氣吹，ST Miss於是教一仔的口型是要先講'烏烏'，令到咀型較圓。

或者亦可用大姆指及食指幫一仔將個咀型整到圓型咁吹泡泡。

一仔唔識運氣，因一仔只會'呠、呠'咁'噴'一口氣，不是輕輕持續'吹'氣，ST Miss教我地先持續在一仔手背上吹氣，令一仔知道及感覺怎樣吹氣，及要持續吹，不是呠一下噴氣就可吹到泡泡。

ST Miss話一仔發音都清晰，好彩沒有遺傳了一仔媽發音有問題。

Bubble Bear支棒的圈夠大，適合一仔玩，ST Miss話當一仔識吹時，可改用其他款較细的吹泡圈。

多謝肚B媽提供以下的資料，才知Bubble Bear來頭不少呢!

網路上超夯的泡泡玩具！德國 Pustefix 魔力泡泡熊系列

唔識揸筆之謎

<4yr1mo>

前年（2014年9月開始）讀N班時，學校差不多天天都有'撕纸'的功課拎回家做，一仔都係撕得麻麻。

到K1上學期轉了第二間學校讀，間中有撕纸的功課，或者上堂時亦有撕紙的練習，記得曾見到有一個月的學習報告説一仔撕紙有待改善時，一仔媽才警覺要正視問題，連忙捉一仔去撕紙。

一撕，才認真發現一仔兩隻手的手指拎紙及撕纸的位置/方法不對，令他不易撕開張纸。

於是教他左手大姆指及食指要捉住張紙近住撕開的位置，另用右手大姆指及食指去撕。又示範畀一仔睇一仔媽點撕，又捉住一仔的手指放在正確位置上，成功又順利撕到後，一仔已捉到竅門可以自己撕纸了。

撕紙的問題解決了，另一個問題一直困擾一仔媽係 : 一仔唔識揸筆！

一仔現在的學校教用'tick tick手'揸筆，即大姆指和食指揸住d筆，第3、4、5隻手指負責頂住支筆後面，及學校建議用三角型臘筆做功課，但每次做功課，都要一仔媽提，一仔不太情願才肯用tick tick手揸筆。

以下學揸筆的圖是由肚B媽提供，好清楚又簡單教點揸筆! (補充於2016.4.22)

非常感恩一仔入到'到校計劃'，三月初一仔终於可以去上第一堂OT，OT陳sir發現一仔原來平時多數只用大姆指和中指，但揸筆要用大姆指和食指，而一仔的食指因少用，唔夠力！

要訓練食指用力，陳sir建議有兩個方法：

1）要一仔開始用學習筷子食飯。

      一仔有些抗拒用筷子，但現在每晚都會一仔用筷子食十啖。

2)  用剪刀剪紙，練習手指力，提議用A4紙，因夠薄，容易剪開。

先在張紙上用間尺畫了一條條直線，讓一仔沿住條直線剪，其間要教一仔拎住張紙及拎剪刀的手勢。

言語治療訓練(5、6)

<3yr7mo>

2015.9.26

今天玩穿繩(新玩具)、薯仔先生(第2堂玩過)、猩猩掛樹(新玩具)、捉老鼠(新玩具)、攪拌機(新玩具)+切食物((第3、4堂玩過)，因為搵不到新玩具的相片，所以遲遲未動筆寫....

猩猩掛樹，在淘寶找到類似的，棵樹對，但不是相中的猴子，應是外形有趣些的猩猩，而且上堂時不見有跳板，可能阿sir沒有拎出來!?

2015.10.3, 3號風球，不用上堂。

2015.10.10，一仔媽有事，請假，原來這天阿sir因腸胃炎入了醫院，亦請了假。

2015.10.17
一開始，一仔媽同阿sir講覺得一仔講野有進步了，有時講到少少句子，阿sir話一仔講野有進步係正常。

今天又玩了些新玩具，見上次多款新玩具的相片搵不到，一仔媽今天問准阿sir影了些相。

玩具(1)，攪拌機(第5堂玩過)+切食物((第3、4堂玩過)，練講及考一仔那個食物"切左、未切?"，切完食物，一仔會自動將食物放入攪拌機裏，阿sir再叫一仔按掣啟動攪拌機攪幾下，然後要一仔自已扮飲，又畀阿sir及一仔媽飲。

玩具(2)，認卡，有兩張卡，一張卡有個蘋果未切，另一張個蘋果分開了兩半，練講及考一仔那張卡個蘋果"切左、未切?"

玩具(3)，捉老鼠(第5堂玩過)，有黑色及白色老鼠，阿sir拎出白色老鼠時，要一仔講"我既"，當拎出黑色老鼠時，要一仔講"阿sir你既"，再將所有老鼠倒在遊樂場上，有些老鼠反轉了，教一仔講"要反轉"，反好晒，開動遊樂場，老鼠會在遊樂場上"走來走去"，阿sir和一仔分別用支捧將老鼠"捉"入籃里。

玩具(4)，認卡，有兩張卡，一張卡上小朋友塊面劃花了，另一張卡上小朋友塊面乾乾淨淨。

阿sir要一仔講及考一仔邊一張卡小朋友塊面係"未洗、洗左"?


玩具(5)，Hello Kitty 拼圖，阿sir考一仔邊一個窿"擺左、未擺"不同Hello Kitty的家族成員?


玩具(6)，芭蕾舞蹈員的衣服拼圖，阿sir考一仔邊一個窿"擺左、未擺"件衫及條裙?


玩具(7)，泥膠(第2堂玩過)。


玩具(8)，再玩番蘋果認卡，再考一仔那張個蘋果"切左、未切?"

臨落堂，一仔媽終記起同阿sir講一仔仍有講BB話，只有一仔自己明佢自已講緊什麼， 阿sir話雖然在一仔的年紀不應仍有BB話講，但一仔有時講到些有意思的說話，所以可以接受。

預告 2015.10.24 一仔學校旅行，2015.10.31 一仔媽請假，2015.11.7 阿sir請假，應是2015.11.14上第7堂。


參考
言語治療訓練(1)
言語治療訓練(2)
言語治療訓練(3)
言語治療訓練(4)

言語治療訓練(4)

<3yr7mo>

今天玩入豬仔錢箱、入柱、切生果、playskool波波、動物拖車、砌漢堡包、吹泡泡。

玩具(1)，豬仔錢箱，練講"將錢放入錢箱"

玩具(2)，入柱，練講"將圈放入柱到"

玩具(3)，切生果, 第三堂曾玩過
阿sir話回家后可以用擦得甩的水彩筆畫花生果，當係污糟了，教及考一仔污糟了的生果係唔食得。


玩具(4)，playskool波波, 第一堂曾玩過
阿sir另外拎出一個大波，間中會問一仔個大波可否入落遊戲機個窿裏，一仔識答唔可以。


玩具(5)，動物拖車 : 一架電動拖車，車廂有一個個窿，要對應放入不同的動物，放對及放到後，動物會叫。

練講"將xx放入車到"


玩具(六)，砌漢堡包, 第三堂曾玩過
今堂阿sir叫一仔放xx先，再放yy，睇下一仔識否跟指示做


玩具(七)，吹泡泡，第二堂曾玩過，仍覺得好難吹到泡泡。


後話
今個星期覺得一仔講野係叻了少少，如曳曳時，我地會同一仔講"一仔瞓廳"，之後一仔會改講"爸爸瞓廳"。

瞓覺時，一仔媽想同一仔再講多幾句，一仔會話“唔講，好攰，瞓覺“。

食晚飯時，一仔爸有時會和一仔媽閒話家常，一仔會突然講“唔講，食飯”。



參考
言語治療訓練(1)
言語治療訓練(2)
言語治療訓練(3)

言語治瘵療- 好書分享(1)

在網上揾言語治療資料時，無意間揾到這本書，有網上試閱，覺得幾好，剛好帶一仔去上言療堂可以繞路過去，便買了一本，$35，唔貴。

本書只有A4紙一半大，有21頁，一仔媽難得很快一天內便讀完，之前在ek 睇有些jm分享言遲的小朋友在上了密集式訓練後大有改善，當時不明白固中的原因及訓練，讀完這本書，加上陪一仔上了幾堂言療，深深明白書中講的技巧，可惜政府沒有提供這類昂貴的密集式訓練，只有讓小朋友排隊排特殊學校、早期訓練(俗稱e位)、幼兒園/幼稚園兼收位(俗稱i位)，但往往要排起碼一年以上才有位呢。

這本書可以去"這個網址"訂購及郵寄，一仔媽不寫出機構名及書名，因不想好似賣廣告咁！

言語治療訓練(3)

<3yr6mo>

中心姑娘早幾天前call 一仔媽，話阿sir 有事，今個星期要提早上堂，下堂亦要順延一星期才上堂。

但去到中心時，估唔到姑娘約了我地和另一個小朋友相同的上堂時間，既然如此，一堂時間有五十分鐘，一仔媽帶一仔去APM行，但回程時卻遲了少少上堂！

星期五一仔話唔返學，話要去阿Sir到，但星期六去到，一仔見到阿sir時卻怕羞，叫錯了阿Sir個名!

今堂又有新玩具玩。

玩具(1), 砌漢堡包

阿Sir和一仔輪住將食物放上包到。

一來訓練"輪住玩"概念;

二來再練習講"畀xx我";

三來今次新講"放xx係yy到"，如"放芝士係牛肉到"。

有些食物一仔未見過或未講過，如芝士及煙肉。

一仔有時會認錯芝士為薯片，其實無教過一仔薯片，應該之前係學校見過。

蕃茄和牛肉好似，一仔亦會認錯。

一仔對"係"及"到"，有時會講唔到，阿Sir話這兩個字無什麼特別意思，所以對有言語遲綬的小朋友來講，是會較弱講這些字。

之前在家已留意到一仔對講"得唔得"中的"唔"或其他生字的中間字會講唔到，要加強訓練先。

四來阿Sir教新講"先放xx，然後yy"，話一仔這個年紀可以明白先後次序的概念，一仔一半半做到，所以阿Sir話一仔可能係"靠估"多。


一仔媽建議
1) 回家後和一仔練習講"放xx係yy到"，一仔好似好抗拒，屋企無漢堡包，但有大大小小不同的車輛，會改叫一仔"放的士係巴士上面"。

既然"到"無意思，難講d，咁改講"上面"有意思d，好似又好d; 

又或有時專登收埋d玩具，然後問一仔"係邊到?"一仔亦會跟住講"係邊到?"，然後加長句子，要一仔跟住講"架巴士係邊到?"

工人姐姐在廚房，問一仔，工人姐姐"係邊到?"
引導一仔答"工人姐姐係廚房到"! 

之前一仔對講"畀"及"擺"，有時會撈亂了，遲些當一仔學好了講"放xx係yy上面"，再練講"擺xx係yy上面"及"擺xx係yy到"吧!


2) 可以用不同顏色的積木，如"放黃色係藍色上面"，可惜屋企太多玩具，已收麻積木玩具了。




玩具(2), 街道+馬路拼圖

好似手抓版咁，但這塊版係一幅街道+馬路圖，圖上還有幾個車窿，除了可以考小朋友是否對應到放對不同類型的車輪外，還可以讓小朋友模擬將車輪在馬路上行走。

又再訓練"輪住玩"概念及一仔講“畀xx我“及“放xx係馬路到。



玩具(3), 釣魚

這個電動釣魚機，開動后，魚口會一開一合，要趁魚口開時放支魚竿在魚口里，將魚勾上來。

魚絲有些特別，是一支膠棍，不是繩，容易操控。

阿sir 和一仔輪住釣魚，但釣魚機轉的速度有些快，於是阿sir見多魚口打開時，會停了釣魚機，讓一仔可以順利釣到魚。

釣完后，數下邊個釣得最多? 

每次玩完，一仔都會合作幫手收拾。


玩具(4), 切生果

一仔以前玩過，無難度，只係一仔喜歡將把刀上下倒轉拎(但屋企果把泥膠刀又不會倒轉拎，奇怪!)

切完，頭一、兩次阿sir 要一仔畀一仔媽或工人姐姐食生果，之後再切完，無大提示下，睇一仔會否記得都要畀一仔媽或工人姐姐食，好彩一仔都記得!


玩具(5), 畀一仔自己揀，佢揀玩番街道+馬路拼圖。

走時，一仔指住中心出面的公園滑梯，一仔媽雖趕時間，但都讓一仔玩了十分鐘才走。


後話
上了3堂，一仔的進步不太明顯，主要因一仔爸媽要返工，回家後能同一仔練習的時間不多，但一仔媽從上堂中學到技巧，亦會多留意一仔有什麼說話的弱點，再加強練習。



參考
言語治療訓練(1)
言語治療訓練(2)

言語治療訓練(2)

<3yr6mo>

今堂第二堂有舊玩具及新玩具玩，一仔媽的記性愈來愈差，已經忘了邊款玩具玩先，邊款玩後了，所以以下的玩具未必順序！

玩具(一)，泥膠

一塊板上面有一個個窿整蔬菜形狀，淘寶上揾到依款類似的。

阿sir 問一仔想整什麼食物，然後要一仔有個concept要完成一款，才可再整第二款。

之後一仔學阿sir 扮食，阿sir 話一仔依個年紀會懂得“扮演“。

玩完，幫手收拾。



玩具(2)，薯仔先生

依款係中心玩果款

原來玩具反斗城有得買，有不同款添。

阿sir 首先畀個“光身”的薯仔一仔，然後逐件腳、手、帽、眼耳口鼻和一仔輪住放上去。

一來考一仔知否應放在邊個位置。

二來讓一仔知道要輪住玩及講出"到我玩"、"到阿Sir"玩。

三來再考一仔講“畀xx我”，一仔係屋企已經講到，但一仔媽有時要出聲提示一仔要“講咩”，一仔才會開始講"畀..."，若無提示，一仔只會講"xx我"，無了動詞"畀"，要講第三、四次才會“畀“先，而阿Sir 的標準是要他伸出件玩具時，一仔會主動講“畀”，唔駛出聲提示，一仔媽要回家同一仔加強訓練呢！

另外，阿sir 話可以令句子有變化，除了講"畀xx我"，亦可以要一仔講"畀物件邊一個人的名"。

四來考一仔講“擺(”放”的意思)xx依到”，原來一仔唔係好識分“比”及“擺”兩個音。

阿sir 問一仔媽有無同一仔在屋企玩拋波？
若有，可以訓練一仔“輪住玩“的concept及講“到我“、“到你“或“到邊一個”，一仔媽有時有同一仔玩拋汽球，但"齋"玩及玩到開心時大叫，今天學識了玩時要“講野“！

如果考N班或K1面試，有時會考小朋友講出五官，薯仔先生係一款幾好的教具!



玩具(3)，猴子爬樹

阿sir 和一仔輪住插支竹簽入樹裏，一邊再訓練一仔講"到我玩"、"到阿sir 玩"，插完所有竹簽後，又輪住從樹頂放入猴子，每次放幾隻，令猴子掛在竹簽上，再輪住取出竹簽，要思考揀取出邊一支竹簽，令到猴子跌落地下最多，最後數下邊一個手上的猴子最多？

一仔都有跟住數，其實每晚都要一仔數下拎了幾多架車仔入房玩，不過一仔好似玩野咁，明明數到6架車，總是會講7架，講多一架，我地會話數錯了就要拎番車仔出廳，要一仔數多一次才講啱。

依款猴子玩具，一仔媽不會買回家，因一仔爸會擔心若一仔自己玩時，會不小心插到自己。


玩具(四)，吹泡泡

這款泡泡樽，有支泡泡棒浸在樽裹，阿sir 用手"擠"個樽，支棒會自已升出來，就可以對住泡泡圈吹d 泡泡出來，但見有時玩之前要上下搖個樽，吹唔到泡泡，要再搖過，唔多"暢順"咁。

一仔和阿sir 輪住吹，一仔要講"到我吹"、"到阿sir吹”。

一仔有時吹唔到，唔知係一仔唔識吹?定支棒有問題?



玩具(五), Playskool 波波
係上次第一堂會噴波波的電動遊戲，一仔想玩，可惜無電無得玩。


玩具(六)
一仔媽完全唔記得是什麼玩具，泥膠? 波波? 只記得有不同頦色，阿sir問一仔是什麼顏色，一仔每次都用英文答。


後記
多謝肚B媽幫忙提供容易上口的兒歌，一仔依個星期識唱“一閃一閃小星星.....”了!


參考
言語治療訓練(1)

言語治療訓練(1)

<3yr6mo>

Part 1 : 
上年11月尾一仔排到去CAC見醫生，醫生評估一仔有言語遲緩相差一年多。

今年8月頭再排到去CAC見言語治療師，言語治療師依然評估一仔的言語遲緩仍相差一年多，建議一仔媽要盡快替一仔搵些"一對一"的言語治療訓練上堂追番進度。

過去大半年，一仔在讀了N班後，講野方便明顯有進步，一仔爸、媽諗住放心d，相信隨住一仔一天天長大，講野亦會再進步，但估唔到依然遲緩相差一年多。

終於的起心肝去揾私人的言語治療訓練，跟住CAC言語治療師比的list 及肚B媽 blog里的list，逐間機構打去問，首要問有無地鐵站沿線而又近TKO的，再問以下:

1) 有無一對一的言語治療訓練?
     因CAC言語治療師話小組形式的上堂應不適合一仔。

2) 一堂幾錢?
   多數$600 - $950。

3) 一堂多少分鐘?
   多數45-50分鐘。

4) 一個session要上多少堂? 
    4 - 8堂。

5) 要先做評估嗎?
    有些機構認可CAC的評估及要求半年里做的才有效，若機構不認可CAC的評估，務必要在該機構再做一次的，要當一堂咁收費或更貴的亦有。

6) 家長可以一起上堂嗎? 
    因家長可以學到技巧，回家再同小朋友練習。

7) 若請病假，可以補堂嗎? 
     因之前上過興趣班，病了就無得補堂呢!

8) 最后及最重要的 - 有星期六的下午時間上堂嗎?
    因一仔媽要返5.5天工作，所以一定要選星期六下午上堂，
   正因為這個原因，好多機構話要排隊排一至9個月，後來有一間突然call一仔媽話上個星期六有位，太好了!


Part 2 : 
準時去到，係一個好後生的阿sir, 在一間好細的房間里(好似屋企廚房的size 咁)上堂，有一張細桌，起初一仔怕陌生，痴住一仔媽，唔肯坐低，當阿sir 拎出玩具時，一仔才開始放下戒心。

阿sir 問我地平時點叫一仔，不過之后阿sir有時亦會錯叫了“一一“。

阿sir 問一仔識講句子嗎？最長句子講到什麼？
一仔媽答一仔識唱太陽伯伯首歌[都係跟肚b 學的:-)]，及識講"爸爸搭地鐵去返工",但依句句子都係copy 我地講的，一仔好少有自組句子講。

第一款玩具玩泥膠，係一仔媽一直想買，但因連一仔媽自己都唔識玩，所以一直無買，今次上堂學識了，一落堂就帶一仔去買了一桶，回家后，一仔一玩就玩了幾個鐘呢！

透個依個遊戲，阿sir 逐個字教一仔講“比”、“泥膠”、“我”，然后要一仔成句句子講一次。

阿sir 話玩泥膠，有d小朋友會東玩一個，西玩一個，要教佢地完成一個先可玩第二個。

阿sir 問一仔在屋企有無玩煮飯仔遊戲? 
當然無啦! 
阿sir 話依個遊戲可以教識小朋友玩遊戲要有steps 如"洗菜、切菜"等，但平時玩開會郁的車車，一仔又點會對依d"靜態"的遊戲有興趣? 


第二款係一個電動遊戲機 Playskool波波，有4、5個波波會輪住噴出來，及沿住"跑道"碌來碌去。

透個依個遊戲，阿sir 逐個字教一仔講“比”、“波波”、“我”，然后要一仔成句句子講一次。

原來一仔唔係好講到依兩句句子架 "比泥膠我” 及 “比波波我”，有時會講了“泥膠”及“波波”先，才講“比”，會成日無講“我”，阿sir要拍一仔心口提佢講“我”。

回家后，一仔媽同一仔練習時，用了另一個方法，會先講成句句子比一仔聽先如 "比泥膠我” ，然后才要一仔跟住講，一仔就比較講得好d。

到晚上要一仔講"比車車我”、"比書書我”，一仔講得好好多了。

在玩波波遊戲里，阿sir 話在一仔講到成句句子后，要暗地里數三秒，才比波波一仔，因為要一仔學識去等，唔好去搶波波。

第三款係一個火箭形狀的電動玩具箱，有不同形狀的窿，玩入形狀。

阿sir 教一仔講“放“、“星星“、“入火箭里“等。

阿sir另拎了一張紙巾，問一仔可否放入火箭里，一仔話no，但阿sir 聽唔到，再問一仔，一仔以為阿sir 一定要將張紙巾放入火箭里，便“聽話的“跟住做了。

阿sir 話依個年齡的小朋友應已適分辨什麼可以、什麼不可以，一仔都識呀，但佢聽話的跟住阿sir 意思做，依一點，一仔媽都唔知可以點教一仔了？

第四款玩具畀一仔自己揀，一仔揀番玩泥膠。

好快就50分鐘完了一堂，一仔媽當時有d 納悶，上堂只係學了講依d 句子，會否太少了?

但回家后，一仔媽學識了爭取機會要一仔講多d句子，如一仔玩泥膠時問"較剪"?，一仔媽會教一仔講"較剪係邊到?"

平時一仔識講"電話"、“我要電話“，現在教佢講“比電話我“。

一仔好似知道我地在教佢講野，佢都乖乖跟住講。


Part ３
一仔8、9個月大時識講爸爸、媽媽，之后面試N班時都講到A至Z、one to ten、不同colors等，以為佢一切發展正常，直到返健康院例行檢查時才發現有問題，萬分多謝健康院的護士及醫生的及時發現，及refer 一仔去CAC跟進，因排政府隊好耐，而黃金治療期是六歲前。

原來現在好多小學都有支援言語遲緩，即愈來愈多小朋友有言語遲緩及此問題已存在多年，香港政府及教育界亦留意到, 可惜上教育王國睇，政府提供的言語治療訓練評價不太好，因為言語治療師的質素參差不一，若小朋友排咁耐隊卻遇上一個差的，會白白浪費了黃金治療期，所以好多家長捱貴的都寧願盡快揾些私人的言師，但出面的言師質素又係未知知數，唉！

另外，教育王國有d家長話小朋友發展出現問題，嚴重的如有自閉症，是在打了一歲針MMR 后，有些國家有cases 有家庭上訴后獲得賠償，而日本亦曾停打此針，唔知香港政府幾時會正視此針所引發的問題呢？提供言語治療(但要排好耐隊)，始終是治標不治本啊。

而一仔講野遲的問題，是否因為這支針，一仔媽真係唔知，但若將來幫一仔添細佬妹時，會認真考慮是否打依支針！


P.S. 剛剛在網上睇到這則新聞 :  

三歲未戒「嬰兒話」 言語遲緩響警號