F1 Kids x 東港城 小車手

<5yr6mo>

已經不是第一次參加此主辦單位舉行小車手的活動，經過暑假帶一仔去玩不同的活動，大多數都要排長龍，還要等好耐，有些排一粒鐘，卻只玩得十分鐘！

但今次，一仔爸話只需排隊排了幾個字（因未開埸），登記想邊一個時段玩便可以，咁當然亦要早去才有時段揀及有位啦，所以特别要讚下主辦單位的very good 登記安排。

而一仔，玩了十分鐘後，當然仍再想玩多幾次！

F1會員可以平10元。

10元做張司機駕駛執照！

隻警犬好似真咁！

有三條不同跑道，一仔當然揀可以揸警車果條跑道啦！

仲可以免費上台拎獎杯影相。

打第二支水痘針@5歲半

<5yr6mo>

於2013年1月1日或以後出生的兒童，根據衞生署的指引，兒童在一歲及小一時可以免費打水痘針。而一仔這些於2012年出世的龍BB，兩支針都要家長自己出去搵私家醫生打。

仍記得2014年果時水痘針很缺貨，要周圍打電話問私家醫生疹所，好彩最後都打到第一支水痘針。

而第二支水痘針呢，有些私家醫生提議在打了第二支打水痘針後3個月內要再打，又有些卻是要足六歲才可打。

由於一仔是龍年年初出世，如果等足六歲才打，到時是上學的日子，又聽聞有些小朋友在打了水痘針後會出水痘，一出水痘，因會傳染，不能返學幾日，那如果等明年長假期打，即要等暑假，但升小一了，因不知小學會否有小一適應班，擔心若出水痘便不能參加適應班，所以趁這個升K3的暑假打。

好彩搵到一間不用足六歲亦可打第二支水痘針的私家醫生疹所，早幾天打電話去預約時間，講明是打水痘針，打針時記得要帶出世紙及針卡，估唔到見到醫生時醫生提議兩個選擇:

第一:  
只打水痘疫苗，630元。

第二:  
麻疹、流行性腮腺炎、德國麻疹及水痘四合一疫苗，960元。
其中" 麻疹、流行性腮腺炎、德國麻疹三合一疫苗"， 衞生署會替小一學生免費打的。

因見小一學生免費打，所以替一仔揀了第一個選擇。

點解唔揀第二個選擇免去打多一支針?   因諗住小一時一仔和其他同學一起打，可以留低一個集體的回憶!

唔怕打多一支針會痛嗎?  以下一仔打針的反應，證明唔駛怕!

針打在右手臂上，一仔今次完全無喊，又話唔痛，大個仔了!

打完針，貼上膠布，但到第二天才記得撕走塊膠布，令到皮膚有些少敏感，少少腫及痕癢，好彩再過幾天就好番晒了。

第2次睇戲

<5yr5mo>

上次第一次同一仔去睇戲，原來已是2016年年初了。

果次睇的戲有3D效果，一仔唔多願戴3D眼鏡，所以今次再睇，素性睇2D便算，即同屋企睇咁姐，都ok呀！

特别多謝6姨送的戲飛！

睇最愛的Minion，一仔全埸坐定定！

睇完戲，更買到一仔想要的藍色Minion兒童傘，開心到佢。。。就算無落雨，都要拎出街遮大陽喎！

從這本書開始。。。

<5yr5mo>

前排無意中摷到依本小書仔，一仔開始了要媽媽睡前講故仔書，但有時太晏收工，唔係晚晚講到。

今晚，收晏，一仔仍想睇故仔書，媽媽靈機一動，要一仔講番個故仔，估唔到一仔肯一頁一頁咁講_ _ _ 好的開始，要記住這一天，這本書的功勞！

踩兒童單車@大圍《》沙田 + 再遇家庭式單車

<5yr3mo>

自從前排一仔爸和一仔兩父子去踩單車後，一仔成日都話想再去踩。

一仔識自己踩有輔助轆的兒童單車，咁我地唔駛再像上次咁山長水遠去大尾篤租家庭式單車了，今次可以近d去大圍租。

一早起身，已天陰陰，半夜還下過雨，好彩食完早餐有番太陽，於是出發，但去到大圍時都差不多12點，一仔話未肚餓，一仔爸話租單車先，到時一路踩一路揾野食，但其實一仔媽有些懷疑能否揾到野食賣嗎？

租單車，大小同價，全日$60（7pm要還車），另加按金。
原本話加一個籃放在車頭要十元，但老闆話可以免費加。

租完單車，一仔爸突然英明決定食麻lunch先出發踩單車，又好彩揾到依間茶餐廳好好服務，待應叔叔主動話可以幫我地鎖住d單車。

食完去攞番單車時，見到單車seat 位有纸皮遮住，唔怕泊起街上被太陽曬到熱辣辣，茶餐廳有此貼心又細心的服務，真值得讚！

出發由大圍踩去沙田，來回差不多2小時。

去沙田沿途的相

見到樹上有什麼動物嗎?

回程仍在沙田時，個天突然黑晒，有少少毛毛雨添。

途經沙田時，見到有3間租單車的舗，仲有得租家庭式單車，下次唔駛再去大尾篤咁遠租了！

由'到校計劃'到'e位' + 備戰報小一

<5yr0mo>

好感恩一仔於2016年年初入到'到校計劃'，又在2016年9月K2時终於排到'e位'。

當初入到'到校計劃'，開始了st、pt、ot、pst的訓練後，一仔在各方面都有進步。

到9月轉到'e位'，訓練的次數比'到校計劃'更密集了，感覺上一仔好似進步更多！？

例如一仔不再抗拒玩打千秋！

説話方面如可講到短句子，一仔好喜歡一仔爸以前從7-11便利店儲下來的小叮噹印仔，一仔將它們當做乘客放在巴士站排隊。

一仔爸儲了廿多個小叮噹，但只给了5個一仔玩，一仔問: '點解爸爸成日收埋d野架?'

小叮噹唔夠多，一仔會搵麻依d Little Minions 當乘客。

依排留意到一仔開始識分到'你'、'我'。又喜歡講'但係....'。

一仔好喜歡問人'住邊到？'，因一仔會用google map揾番果個人實際住邊到。

一仔媽其實有些少內疚，一仔仍要瞓晏覺架，上午返學，下午返訓練或返學校的興趣班，令一仔有時一星期只有一天在家瞓晏覺的時間，而其他日子間中下午上訓練時會恰眼瞓而扭計。

一仔現在主要參加了學校的交通安全隊，另加一至兩天學校的興趣班，取消參加學校的興趣班，可以嗎？

但一仔媽衡量過其實參加學校的興趣班目的，亦是'e位'外的輔助訓練，如交通安全隊是訓練一仔的'社交'及聽指令，令喜歡玩的一仔喜歡學校，更加喜歡返學。

再且，學校的興趣班學費很抵，$100返8堂，一星期返一堂。

一仔媽另外內疚因要返工，不能陪一仔去上'到校計劃'或'e位'的訓練，幸好有工人姐姐陪一仔去上堂。

備戰報K1，唔係諗住替一仔備戰去某某小學扣門面試，而係一仔媽自己要揾定校網内各小學學校的資料，諗定怎樣報今年年尾9月的自行分配學位及參加明年2月的統一派位大抽獎。

一仔媽主要有兩樣要考慮。

第一，報小學時是否要申報一仔需要言語及其他的訓練？還是等小學收了一仔後，才申報需要這些訓練呢？

第二，一仔是一個活潑好動但又敏感的小男孩，一仔媽想揾些happy school、唔谷（指功課/默書/測驗/考試量不會太多），而老師又有愛心、能循循善誘教導一仔、又有支援言語治療訓練等各方面的小學！？

上了小學，就算學校有言語治療等的訓練，聽聞都會比e位的少。有些小學好貼心，會在校網内註明'學生支援'有哪些訓練，方便家長容易找到相關的資料及一目了然，有些會在多頁的週年校務計劃報告裏提及，家長要勤力的去'咪書'呢。

原本一仔媽有兩間二線的心儀小學。

A學校好近屋企。校長會每朝早在校門迎接學生返學，但一年前有ek的家長話這間學校不支援SEN的學生，在學校的校網找到舊的週年校務計劃報告的資料，都只講了少少關於'言語治療'的服務。

另聽聞此學校開始谷，但e位其中一個導師的女兒在此校讀小三，話此校是happy school，她女兒讀得開心。

B學校，聽聞校長推行愉快學習，ek里個個家長都話小朋友返學開心，但e位個導師話有一個家長曾反應B學校她小朋友的班主任經常出"通告”，要家長"跟進"小朋友依樣果樣。

C學校，依間學校係一線學校，好多人爭，一仔媽一直以為依間學校好谷，但e位個導師卻話係happy school。而依間學校有宗教背景，20分在自行階段都要抽，一仔只有15分，只會陪跑。

好迷惘，好彩仍有時間，希望年尾可以去參加不同學校的開放日，了解學校多些。

P.S. 搵小學的資料(內有連結)
2015-2017年小學派位學額
小一派位拆解　點解成績好派不到首三志願？
二○一七年度統一派位各小一學校網選校名冊
小學校網 95 統一派位選校概覽
全港小學一覽表 - Teddy Kids
小學開放日