一仔 Oscar Blog: 學習

顯示具有 學習 - K1 標籤的文章。顯示所有文章

2017年1月24日星期二

跟學校去童夢城

<4yr11mo>

記得朋友上年話在書展報名去童夢城影相有優惠，但一仔媽無報，估不到一仔學校安排K2全級去童夢城，學校的package係$1xx包小朋友影二款職業造型相，學校包小朋友的車費及茶點，家長每人來回車費$60。

曬相package : $4xx包兩張大相及一隻有8GB的手指入晒二款職業造型相的相底（全级大合照要由學校另外提供）。

8GB的手指

攝影師好專業又識氹小朋友，見到相機的閃光燈不停閃，以為平時唔like望鏡頭影相的一仔，影時一定會不合作，但估不到兩款造型相出來的效果出乎意料之外的很靚外，一仔笑容很燦爛，還會擺pose添!

一仔揀做太空人

揀做太空人，老師話係一仔自己揀，一仔媽我完全估唔到，但一仔爸一估就估中！

聽返同學仔講，原來老師介绍不同職業造型時，老師話太空人可以睇星球！

一組8個太空人，有男仔有女仔，好可愛

揀了做太空人，第2個職業就配時裝演員，無得再揀其他職業

全級大合照（張相影得不清晣，就算放大，同學仔的樣子都看不清吧？）

同學媽媽們分享了同學仔扮演不同職業的video，幾個機場特警手持長槍去垃圾桶搵炸彈、消防員用水槍對住'火光熊熊'的建築物不斷射真水救火、救護員合力抬住擔架運送傷者，真係好逼真，班救護員行到好似抬緊一個好'重'的傷者，加上有'閃光燈'閃下閃下，好似有記者在埸直擊拍攝咁、太空人將殞石當波踢，真係笑c! 可惜私隱原因，不能在此分享其他同學仔的video！

另有整杯麵環節，家長每人$10，整完，杯麵可以拎回家食，有效期一個月

原本在學校集合時間0830，大約1小時車程，預計回程1200上車回校，回到學校1300，但活動中有些延誤，最後1400才回到學校，一仔雖然很肚餓，但懂事的没有瓜瓜嘈。

漏了講，學校很貼心，在旅遊車上老師和家長、同學仔玩問答遊戲，估中獎小食，遊戲玩完，老師問有無同學仔無參加遊戲、無小食？老師會額外畀，仲之個個同學仔都有份！

2016年3月30日星期三

唔識揸筆之謎

<4yr1mo>

前年（2014年9月開始）讀N班時，學校差不多天天都有'撕纸'的功課拎回家做，一仔都係撕得麻麻。

到K1上學期轉了第二間學校讀，間中有撕纸的功課，或者上堂時亦有撕紙的練習，記得曾見到有一個月的學習報告説一仔撕紙有待改善時，一仔媽才警覺要正視問題，連忙捉一仔去撕紙。

一撕，才認真發現一仔兩隻手的手指拎紙及撕纸的位置/方法不對，令他不易撕開張纸。

於是教他左手大姆指及食指要捉住張紙近住撕開的位置，另用右手大姆指及食指去撕。又示範畀一仔睇一仔媽點撕，又捉住一仔的手指放在正確位置上，成功又順利撕到後，一仔已捉到竅門可以自己撕纸了。

撕紙的問題解決了，另一個問題一直困擾一仔媽係 : 一仔唔識揸筆！

一仔現在的學校教用'tick tick手'揸筆，即大姆指和食指揸住d筆，第3、4、5隻手指負責頂住支筆後面，及學校建議用三角型臘筆做功課，但每次做功課，都要一仔媽提，一仔不太情願才肯用tick tick手揸筆。

以下學揸筆的圖是由肚B媽提供，好清楚又簡單教點揸筆! (補充於2016.4.22)

非常感恩一仔入到'到校計劃'，三月初一仔终於可以去上第一堂OT，OT陳sir發現一仔原來平時多數只用大姆指和中指，但揸筆要用大姆指和食指，而一仔的食指因少用，唔夠力！

要訓練食指用力，陳sir建議有兩個方法：

1）要一仔開始用學習筷子食飯。

一仔有些抗拒用筷子，但現在每晚都會一仔用筷子食十啖。

2) 用剪刀剪紙，練習手指力，提議用A4紙，因夠薄，容易剪開。

先在張紙上用間尺畫了一條條直線，讓一仔沿住條直線剪，其間要教一仔拎住張紙及拎剪刀的手勢。

2015年10月10日星期六

卡通印章

<3yr8mo>

一仔學校現在做功課有時要蓋印，於是上淘寶淘，剛收到，大約RMB12一套有6個印。

普通印章，有蓋，其中一套的三個

滾輪印章，有蓋，原來仲可以分體兩用的，若早知道，就不需買普通印章了

剛巧一仔爸執野，畀佢搵到這幾個陳年的叮噹印仔

題外話
上個月一仔媽的淘寶及支付寶戶口同時被人盜用了，賊人改了登入的密碼及電話號碼，一仔媽好辛苦用了兩小時才入番自已的戶口改番密碼及電話號碼。

個賊人"好鬼崇"又古滑的買了好多野，因在平時“已買到的寶貝”中完全睇不到購買的資料，改要在左上角“訊息”中見到已發貨的物流訊息，才知賊人買了什麼!

而哪些未發貨的，真不知賊人還買了什麼?賊人還很猖狂的第二天又嘗試再登入....最後一仔媽去了警署備案，又call淘寶取消了兩個戶口。

奉勸各位，要提高警覺留意自己電郵及手提電話有無收到淘寶或支付寶戶口變動的通知，而變動不是自己提出的? 若好似一仔媽咁倒霉淘寶及支付寶的戶口被人盜用了，要即時call去淘寶(電話: 2215 5300)跟進。

2015年9月12日星期六

K1 - 由迎新日至first two weeks

<3yr7mo>

22/8(六)，家長日+迎新日，1.5小時
之前已收到學校老師的whatsapp提醒去家長日。

可以用whatsapp 同老師聯絡，真係方便好多，當然，若沒什麼特別事，都不會騷擾老師!

離遠見到新學校的門口，一仔唔肯再行，又大喊，好彩今天分2組及2 parts, 我地果組屬於part 1 去音樂室唱歌先，期間玩吹及執假樹葉，吸引到一仔玩得很投入又開心。

Part 2 家長同小朋一起入課室聽班主任介紹返學的準備，一仔唔肯入課室，因佢見到禮堂有其他玩具，如車車、小型玩具屋，好彩一仔媽叫麻工人姐姐一起來(好讓工人熟悉帶一仔返學放學的路線)，於是讓工人睇住一仔在禮堂玩，一仔媽獨自去聽書，由於課室門無關上，一仔有時會走入班房揾一仔媽。

回家後，問一仔返學好玩嗎？一仔話好玩!

一仔媽好擔心一仔不適應返新學校，因一仔好喜歡舊學校的班主任，舊學校和新學校返學的路線上半部份是相同的，擔心工人開學時帶一仔返學，一仔會扭行返舊學校，結果呢…

28/8(五)，第一天返學，1小時，穿校服

前一晩，一仔嫲嫲畀定了一封利是一仔爸，要我地放係一仔書包裏面，好意頭!

離遠見到著住相同校服的同學仔，一仔居然好開心的跑上去，要一仔媽叫唔好再跑才停低。

今天一仔媽可以陪一仔上堂，班房裹有3個老師。

入到課室裏坐定，一仔識了第二個同學仔小張，一仔好乖的肯借出車仔比小張玩。

漏講了點識第一個同學仔，係blog 友個女勞小姐呀，同班呢！

今日分2 parts, part 1 老師在班房裹講故仔書，一班同學仔圍一個圈坐在椅子上，一仔要一仔媽在側邊陪住佢，好彩老師都畀。

一仔媽記得以前去其他學校面試時，亦有老師講故仔書，但一仔通常無興趣，會走左去玩玩具，令一仔媽十分擔心一仔有專注力的問題，但今天，估唔到一仔肯坐定(有八乘)聽老師講故仔，點解?

因老師講故仔的方法特別，除了好似其他學校老師咁拎住一本特大的故事書，逐頁掀逐頁講外，特別在每頁有小部份被一張紙仔遮住，老師要同學仔估下是什麼?然後請一個同學出來幫手打開張紙仔，再要同學講出是什麼? 令每個同學都有份參予，更投入聽老師講故仔!

一仔打開的係一隻簡筆畫的帆船，但之前未見過，一仔卻好有聯想力的將帆船上下倒轉睇，答係“遮”，一把打開的雨傘!

Part 2去音樂室唱歌玩遊戲，其中一個遊戲要同學們幫手拎住一塊好大的彩虹布拋下拋下，令到個個都玩到好開心。

臨走，一仔媽吸取了肚B媽分享的經驗，連忙和幾個同學仔媽媽交換電話號碼入谷。

原來有些同學仔以前同一仔同一間舊學校讀N班添，一仔媽唔認得d 同學仔，反而同學仔的媽媽認得一仔先!

31/8(一), 今個星期返一小時，今天生日會，著便服
工人姐姐帶一仔返學，一仔無喊，但入到班房後，一仔想要工人留低陪佢，工人即話去廁所而成功閃走了。

1/9(二),著運動服返學
同學媽媽谷裏報料話一仔唔肯入學校，工人話一仔扭要去波波池，入到課室，老師即畀玩具一仔玩，好讓工人成功閃走。

第一週總結
老師話一仔有喊住要工人陪佢入課室放書包，但工人走了后，佢又能夠乖乖地坐定上堂，無喊。

一仔急v時，亦會出聲去洗手間。

第二週總結，正常返三小時
一仔無喊，老師話一仔適應得很好，上課都投入，但依然唔食茶點，只飲飲品。

插曲
工人話試過兩次返學及放學，一仔和同學仔拖手仔一齊行，有一次還一邊行一邊唱歌！

一仔媽感想
一仔返N班時喊了一個月，K1返新學校，一仔媽起初好擔心，現在放心好多了，每晚問一仔返學好唔好玩，一仔多數答好玩; 問一仔返學開唔開心，一仔答開心。

一仔爸媽希望一仔繼續返學好玩、返學開心，可以認識更多同學仔，一起玩同學習，一齊成長，和睦相處！

2015年9月1日星期二

三角形蠟筆

<3yr6mo>

新學校建議同學仔在家做功課用三角形的蠟筆，上網揾到一則bk的討論、這幾款及優點如下：

Carioca, 只知 made in Spain, 粗身
Crayola, 有分可水洗及不可水洗
Titi(韓國), 粗身,無毒
Sakura櫻花(日本), 可水洗
Faber-Castell，有些款可擦及送擦膠和筆刨
Staedtler
Melissa & Doug

打電話去屋企附近兩間大書局,“大x書局“及“中x書局”，居然無，好彩第二天有同學媽咪谷話“美亞”有得買依款。

Carioca, 粗身, 12支 $28