三角形蠟筆

<3yr6mo>

新學校建議同學仔在家做功課用三角形的蠟筆，上網揾到一則bk的討論、這幾款及優點如下：

Carioca, 只知 made in Spain, 粗身
Crayola, 有分可水洗及不可水洗
Titi(韓國), 粗身,無毒
Sakura櫻花(日本), 可水洗
Faber-Castell，有些款可擦及送擦膠和筆刨
Staedtler
Melissa & Doug

打電話去屋企附近兩間大書局,“大x書局“及“中x書局”，居然無，好彩第二天有同學媽咪谷話“美亞”有得買依款。

Carioca, 粗身, 12支 $28

另一個媽咪在“Taste”揾到依兩款,估唔到Taste 有得買！

Crayola,  8支, 可水洗 $49.9 (左),  不可水洗 $32.9 (右)
(後補 : 奇趣天地有得買不可水洗，$38)

同一天，一仔媽在公司附近的舊式文具店揾到依款

舊款橙色盒，新款透明色，12支$58，明星陳敏兒推介呢
(後補 : 奇趣天地有得買新款透明色，$51咋，但唔知點解無了明星陳敏兒的貼紙)

舊式文具店

                            奇趣天地

Titi 比普通顏色筆粗身d

以下幾款找不到哪裏有得買

Sakura櫻花(日本)

(後補 : 奇趣天地: 12支$30及24支$42, 都送擦膠和筆刨 )

                                              12支$30

                                       24支$42

言語治療訓練(2)

<3yr6mo>

今堂第二堂有舊玩具及新玩具玩，一仔媽的記性愈來愈差，已經忘了邊款玩具玩先，邊款玩後了，所以以下的玩具未必順序！

玩具(一)，泥膠

一塊板上面有一個個窿整蔬菜形狀，淘寶上揾到依款類似的。

阿sir 問一仔想整什麼食物，然後要一仔有個concept要完成一款，才可再整第二款。

之後一仔學阿sir 扮食，阿sir 話一仔依個年紀會懂得“扮演“。

玩完，幫手收拾。



玩具(2)，薯仔先生

依款係中心玩果款

原來玩具反斗城有得買，有不同款添。

阿sir 首先畀個“光身”的薯仔一仔，然後逐件腳、手、帽、眼耳口鼻和一仔輪住放上去。

一來考一仔知否應放在邊個位置。

二來讓一仔知道要輪住玩及講出"到我玩"、"到阿Sir"玩。

三來再考一仔講“畀xx我”，一仔係屋企已經講到，但一仔媽有時要出聲提示一仔要“講咩”，一仔才會開始講"畀..."，若無提示，一仔只會講"xx我"，無了動詞"畀"，要講第三、四次才會“畀“先，而阿Sir 的標準是要他伸出件玩具時，一仔會主動講“畀”，唔駛出聲提示，一仔媽要回家同一仔加強訓練呢！

另外，阿sir 話可以令句子有變化，除了講"畀xx我"，亦可以要一仔講"畀物件邊一個人的名"。

四來考一仔講“擺(”放”的意思)xx依到”，原來一仔唔係好識分“比”及“擺”兩個音。

阿sir 問一仔媽有無同一仔在屋企玩拋波？
若有，可以訓練一仔“輪住玩“的concept及講“到我“、“到你“或“到邊一個”，一仔媽有時有同一仔玩拋汽球，但"齋"玩及玩到開心時大叫，今天學識了玩時要“講野“！

如果考N班或K1面試，有時會考小朋友講出五官，薯仔先生係一款幾好的教具!



玩具(3)，猴子爬樹

阿sir 和一仔輪住插支竹簽入樹裏，一邊再訓練一仔講"到我玩"、"到阿sir 玩"，插完所有竹簽後，又輪住從樹頂放入猴子，每次放幾隻，令猴子掛在竹簽上，再輪住取出竹簽，要思考揀取出邊一支竹簽，令到猴子跌落地下最多，最後數下邊一個手上的猴子最多？

一仔都有跟住數，其實每晚都要一仔數下拎了幾多架車仔入房玩，不過一仔好似玩野咁，明明數到6架車，總是會講7架，講多一架，我地會話數錯了就要拎番車仔出廳，要一仔數多一次才講啱。

依款猴子玩具，一仔媽不會買回家，因一仔爸會擔心若一仔自己玩時，會不小心插到自己。


玩具(四)，吹泡泡

這款泡泡樽，有支泡泡棒浸在樽裹，阿sir 用手"擠"個樽，支棒會自已升出來，就可以對住泡泡圈吹d 泡泡出來，但見有時玩之前要上下搖個樽，吹唔到泡泡，要再搖過，唔多"暢順"咁。

一仔和阿sir 輪住吹，一仔要講"到我吹"、"到阿sir吹”。

一仔有時吹唔到，唔知係一仔唔識吹?定支棒有問題?



玩具(五), Playskool 波波
係上次第一堂會噴波波的電動遊戲，一仔想玩，可惜無電無得玩。


玩具(六)
一仔媽完全唔記得是什麼玩具，泥膠? 波波? 只記得有不同頦色，阿sir問一仔是什麼顏色，一仔每次都用英文答。


後記
多謝肚B媽幫忙提供容易上口的兒歌，一仔依個星期識唱“一閃一閃小星星.....”了!


參考
言語治療訓練(1)

電車遊 + 荔園 + 走失的測試 + BMW兒童交通安全城

<3yr6mo>

電車遊
搭電車由鰂魚涌去中環，大概45分鐘至一小時，好彩上到電車的上層有位女士讓座，雖然有位坐又有微風，但天氣咁熱，一仔媽和一仔一直流汗，下次都係揀秋冬天去坐電車會爽d。



荔園
去到中環，見有得free 入場，才用來攝時間，依個攝時間玩了兩個鐘左右，就玩了二百元喇，十元換一個代幣，d 遊戲通常1 米定1.1米以下高度的小朋友要兩個代幣，大人要4個，今天唔算多人，平均排隊15-20分鐘，玩就5分鐘。

依期一仔喜歡鴨仔

旋轉木馬，估唔到一仔肯自己坐馬仔

坐船仔

Sir滑梯

剩番d 代幣，畀兩父子拋香蕉餵大象剛好

戰利品

設施
1) 有雨傘出租，$100按金，可惜起初我地唔知，亦好彩只有少少過雲雨
2) 幾排一格格的流動廁所，有坐廁及蹲厠
3) 有兩間育嬰室
4) 有小食檔及少量的桌椅比人坐低食野


走失的測試
期間同一仔去廁所，一仔可能對一格格的廁好好奇，再經過廁所時，一仔居然企定定望住d人進進出出廁所，一仔爸媽同一仔講bye bye，一仔都聽唔到，於是一仔爸媽分別躲在人牆后，當一仔回過神，左望望右望望都唔見一仔爸媽后，一仔即刻走番之前行來的方向，行了幾步，一仔爸才叫住一仔，一仔即跑去攬住一仔爸喊，我地乘機告誡一仔出街要跟實我地。

之前試過去商場有d 推廣活動，有一間房仔，一仔好快由正門衝了入去，一仔可能見一仔媽無跟住入去，一仔由後門走出來後，走番去正門揾一仔媽。



BMW兒童交通安全城@尖沙咀海運大廈
前排一仔媽部手機出街用流動數據上唔到網，多謝肚B媽的幫忙，才報到名咋！

約了晚上七點半，要早15分鐘到，之前收到mama 群組分享玩的攻略，可以先去玩具反斗城果層填顏色，like BMW 的fb 可以取紙製的車模型回家砌，可惜我地太晩到，無玩到依part，登記完，就連忙上一層聽安全講座。

講座要小朋友自己上，但一仔唔肯，好彩在埸的工作人員姐姐讓我地坐近門口上堂。

上完堂，就落跑道，part １由姐姐帶住幾個小朋友繞場幾個圈，一邊認識紅綠燈過馬路，一仔又要一仔媽陪，工作人員的姐姐好有耐性，氹到一仔肯自己跟住其他小朋友一齊行。

Part ２坐車仔，今次輪到工作人員的哥哥氹一仔，一仔最后都肯自己坐車仔，玩完走后，一仔成日叫玩車車呢。

今次依個活動真的幾好，免費、室內、又有教育意義！

言語治療訓練(1)

<3yr6mo>

Part 1 : 
上年11月尾一仔排到去CAC見醫生，醫生評估一仔有言語遲緩相差一年多。

今年8月頭再排到去CAC見言語治療師，言語治療師依然評估一仔的言語遲緩仍相差一年多，建議一仔媽要盡快替一仔搵些"一對一"的言語治療訓練上堂追番進度。

過去大半年，一仔在讀了N班後，講野方便明顯有進步，一仔爸、媽諗住放心d，相信隨住一仔一天天長大，講野亦會再進步，但估唔到依然遲緩相差一年多。

終於的起心肝去揾私人的言語治療訓練，跟住CAC言語治療師比的list 及肚B媽 blog里的list，逐間機構打去問，首要問有無地鐵站沿線而又近TKO的，再問以下:

1) 有無一對一的言語治療訓練?
     因CAC言語治療師話小組形式的上堂應不適合一仔。

2) 一堂幾錢?
   多數$600 - $950。

3) 一堂多少分鐘?
   多數45-50分鐘。

4) 一個session要上多少堂? 
    4 - 8堂。

5) 要先做評估嗎?
    有些機構認可CAC的評估及要求半年里做的才有效，若機構不認可CAC的評估，務必要在該機構再做一次的，要當一堂咁收費或更貴的亦有。

6) 家長可以一起上堂嗎? 
    因家長可以學到技巧，回家再同小朋友練習。

7) 若請病假，可以補堂嗎? 
     因之前上過興趣班，病了就無得補堂呢!

8) 最后及最重要的 - 有星期六的下午時間上堂嗎?
    因一仔媽要返5.5天工作，所以一定要選星期六下午上堂，
   正因為這個原因，好多機構話要排隊排一至9個月，後來有一間突然call一仔媽話上個星期六有位，太好了!


Part 2 : 
準時去到，係一個好後生的阿sir, 在一間好細的房間里(好似屋企廚房的size 咁)上堂，有一張細桌，起初一仔怕陌生，痴住一仔媽，唔肯坐低，當阿sir 拎出玩具時，一仔才開始放下戒心。

阿sir 問我地平時點叫一仔，不過之后阿sir有時亦會錯叫了“一一“。

阿sir 問一仔識講句子嗎？最長句子講到什麼？
一仔媽答一仔識唱太陽伯伯首歌[都係跟肚b 學的:-)]，及識講"爸爸搭地鐵去返工",但依句句子都係copy 我地講的，一仔好少有自組句子講。

第一款玩具玩泥膠，係一仔媽一直想買，但因連一仔媽自己都唔識玩，所以一直無買，今次上堂學識了，一落堂就帶一仔去買了一桶，回家后，一仔一玩就玩了幾個鐘呢！

透個依個遊戲，阿sir 逐個字教一仔講“比”、“泥膠”、“我”，然后要一仔成句句子講一次。

阿sir 話玩泥膠，有d小朋友會東玩一個，西玩一個，要教佢地完成一個先可玩第二個。

阿sir 問一仔在屋企有無玩煮飯仔遊戲? 
當然無啦! 
阿sir 話依個遊戲可以教識小朋友玩遊戲要有steps 如"洗菜、切菜"等，但平時玩開會郁的車車，一仔又點會對依d"靜態"的遊戲有興趣? 


第二款係一個電動遊戲機 Playskool波波，有4、5個波波會輪住噴出來，及沿住"跑道"碌來碌去。

透個依個遊戲，阿sir 逐個字教一仔講“比”、“波波”、“我”，然后要一仔成句句子講一次。

原來一仔唔係好講到依兩句句子架 "比泥膠我” 及 “比波波我”，有時會講了“泥膠”及“波波”先，才講“比”，會成日無講“我”，阿sir要拍一仔心口提佢講“我”。

回家后，一仔媽同一仔練習時，用了另一個方法，會先講成句句子比一仔聽先如 "比泥膠我” ，然后才要一仔跟住講，一仔就比較講得好d。

到晚上要一仔講"比車車我”、"比書書我”，一仔講得好好多了。

在玩波波遊戲里，阿sir 話在一仔講到成句句子后，要暗地里數三秒，才比波波一仔，因為要一仔學識去等，唔好去搶波波。

第三款係一個火箭形狀的電動玩具箱，有不同形狀的窿，玩入形狀。

阿sir 教一仔講“放“、“星星“、“入火箭里“等。

阿sir另拎了一張紙巾，問一仔可否放入火箭里，一仔話no，但阿sir 聽唔到，再問一仔，一仔以為阿sir 一定要將張紙巾放入火箭里，便“聽話的“跟住做了。

阿sir 話依個年齡的小朋友應已適分辨什麼可以、什麼不可以，一仔都識呀，但佢聽話的跟住阿sir 意思做，依一點，一仔媽都唔知可以點教一仔了？

第四款玩具畀一仔自己揀，一仔揀番玩泥膠。

好快就50分鐘完了一堂，一仔媽當時有d 納悶，上堂只係學了講依d 句子，會否太少了?

但回家后，一仔媽學識了爭取機會要一仔講多d句子，如一仔玩泥膠時問"較剪"?，一仔媽會教一仔講"較剪係邊到?"

平時一仔識講"電話"、“我要電話“，現在教佢講“比電話我“。

一仔好似知道我地在教佢講野，佢都乖乖跟住講。


Part ３
一仔8、9個月大時識講爸爸、媽媽，之后面試N班時都講到A至Z、one to ten、不同colors等，以為佢一切發展正常，直到返健康院例行檢查時才發現有問題，萬分多謝健康院的護士及醫生的及時發現，及refer 一仔去CAC跟進，因排政府隊好耐，而黃金治療期是六歲前。

原來現在好多小學都有支援言語遲緩，即愈來愈多小朋友有言語遲緩及此問題已存在多年，香港政府及教育界亦留意到, 可惜上教育王國睇，政府提供的言語治療訓練評價不太好，因為言語治療師的質素參差不一，若小朋友排咁耐隊卻遇上一個差的，會白白浪費了黃金治療期，所以好多家長捱貴的都寧願盡快揾些私人的言師，但出面的言師質素又係未知知數，唉！

另外，教育王國有d家長話小朋友發展出現問題，嚴重的如有自閉症，是在打了一歲針MMR 后，有些國家有cases 有家庭上訴后獲得賠償，而日本亦曾停打此針，唔知香港政府幾時會正視此針所引發的問題呢？提供言語治療(但要排好耐隊)，始終是治標不治本啊。

而一仔講野遲的問題，是否因為這支針，一仔媽真係唔知，但若將來幫一仔添細佬妹時，會認真考慮是否打依支針！


P.S. 剛剛在網上睇到這則新聞 :  

三歲未戒「嬰兒話」 言語遲緩響警號

與 blog 友囝囡 gathering @ 啓德郵輪碼頭

<3yr5mo>

上次去九龍城寨公園，早上已經出門，所以第二朝早唔願返工，吸取了上次經驗，今次我地下午才出發，第二朝早無上次咁攰了，一仔無瞓晏覺，晚上又成十一點三才瞓，但早上依然自動自覺起身，又ok喎。

多謝燒腩仔媽教路，才容易在九龍灣地鐵站A出口，再去德福花園的平台，揾到專線小巴"86"去郵輪碼頭。

原本一仔爸擔心碼頭公園無滑梯sir，一仔會無野玩，一仔媽又無申報到時會玩噴池水，結果....

一仔玩到好開心!

多謝巨龍媽提供的相片，才知一仔原來和巨龍都有互動呢！

去到公園一仔媽才同一仔爸講其他blog友囝囡去了噴水池玩水，一仔爸原本不贊成，但當一仔見到其他小朋友在水池玩得咁開心，亦要衝入去玩時，口硬心軟的一仔爸亦比一仔除鞋除襪去玩，好彩我地背袋里平時有多一套衫褲替換。

以為郵輪公園咁露天，會好曬，但坐椅的地方多數有瓦遮頭，不會曬，又因較空曠，有時有些微風，幾舒服下，而小朋友在噴水池玩，更加涼浸浸啦！

依支泡泡槍在報紙檔買$30，雖好玩，但個樽會漏水

車不離手

來張大合照，sorry, 一仔媽有認人能力困難症，有d  blog mama 及小朋友第一、二次見，一仔媽唔係好認到呀！

再來張幕後花絮

P.S.多謝以上有些相是由其他blog mama 提供。