與 Blog 友囝囡 gathering @ 九龍城寨公園

<3yr4mo>

好開心又再與一班 Blog 友囝囝囡囡(龍BB，南瓜仔&南瓜妹，燒腩仔，肚B)出來玩，今次去 九龍城寨公園!

上午一仔爸媽先帶一仔去了深水埗玩具街行，當然少不了要買玩具。

天氣咁熱，再去商場嘆冷氣，先後去了樂富廣場 (依個商場d冷氣唔夠)及  九龍城廣場。

現在美國冒險樂園緊有一間係左近，一仔一見到冒險樂園個標誌，就不停叫"波波池、波波池"，最後去了其中一間，時間唔夠，當然唔玩波波池，改玩了用水槍滅火的遊戲機、彩虹"撤"錢等。

之後知道肚B到了集合地點，我地改去九龍城寨公園，九龍城廣場一樓有條樓梯連接公園，公園聽聞好大，我地目的地係樓梯出去后左邊最盡角落的大滑梯。

一仔掛住係大滑梯走來走去，對一仔爸帶去的泡泡槍興趣不大，只玩了一陣，好彩比龍BB媽捕捉到兩張靚相。

對一仔爸剛在深水埗買的大氣球，一仔亦只玩了一陣，反而Blog 友囝囝囡囡好有興趣玩，亦吸引到其他小朋友來玩。

一仔同其他Blog 友囝囝囡囡的交流雖好少，估唔到佢肯一齊拖手仔影相。

晚上去Pizza Hut食，一仔只食了幾啖咋，跟住玩車車，在深水埗新買了架黃色巴士，一仔成日霸住玩，唔肯同Blog 友囝囝分享，一仔媽真係覺得好唔好意思呀!

食完，無瞓晏覺的一仔，一上巴士，就瞓著了，回到家，沖完涼才補奶食麥皮。

期待下次的約會，一仔能和一班 Blog 友囝囝囡囡有更多的互動!

重嘗久違了的"剁豬肉餅"

一仔媽的祖母曾請過兩個工人姐姐，第一個“L"做了四年，L當年會食豬肉，祖母將廚藝傳授比L，L真的肯用心去學，煲湯煑餸樣樣學識，煑到和祖母一樣咁好味。

多年後的今天，L再返香港工作，趁她放假，約她和一仔媽現在的工人姐姐“S“交流煮餸心得，因L和S都喜歡煑餸！

今次剁“豬肉餅“，一仔姨丈咬了一啖後，即話好似食番當年祖母煑的口味，連一仔爸都話好味！

材料：
1. 絞碎豬肉(柳梅$22), 但老闆話用絞碎的柳梅剁豬肉餅，會起唔到膠喎，一仔媽即答老闆話工人姐姐識煑，自己唔識煮，所以信工人姐姐，依然買絞碎豬肉，老闆於是將柳梅用水沖一沖後才絞碎。
2. 蔥(適量)，沖水，切粒
3. 沖菜(即大頭菜)，$2一片長形，只要1/3 size便可(因會好鹹)，沖水，切粒。
4. 三朵東菇，先浸軟，去蒂，切粒
5. 馬蹄2粒，沖水，去皮，切粒

左: 沖菜, 中:東菇, 右: 馬蹄

做法 :
將以上材料全部放在砧板上剁，大約剁 十 至 十五分鐘，令到所有材料平均分佈，中途需加半茶匙雞粉，剁完後，再放上碟，加少許油在肉餅面，中火蒸十分鐘，即成。

剁、剁、剁

上: 剁完后，下 : 蒸完后

溫馨提示:

1. 柳梅要早上買，因晏d可能已賣晒。

2. 剁豬肉餅用圓型砧板較方便，因面積較大。

3. 如果蒸完覺得肉餅唔夠鹹，可以加少許生抽。

香港淘 - 便利店/分店取貨 - 接二連三黑仔事件

自從轉了新公司后，去淘寶買野，無得再用公司的地址收貨，好彩現在有些快遞公司可以去OK或7-11便利店取貨，好方便，已試過6、7次，但有一半卻好黑仔，總在取貨時出意外!

先講淘寶 - 落單時怎樣選取那間快遞公司做集運商 :

1. 確實訂單及"結算"

2. 選取收貨地址及選取"淘寶集運"

3. 選取那間快遞公司做集運商 

4. 確定后，去支付寶繳付訂單如平時做法。

5. 當多張訂單到達所選取的集運商倉庫后，要跟以下的流程: 

6. 選取"支付轉運費"

7.. 因落訂單時選了"順豐"，所以現在要再點選多一次"順豐"

 8. 多張訂單都要分別選取"合併快遞"或"單併快遞"

9. 選取"送貨上門"、"便利店取貨"或"自提點取貨"

10. 選了"便利店取貨"，要再選哪一間"OK"便利店取貨

11. 顯示貨到便利店后，要24小時取貨

黑仔事件一:

明明晚上見到集運份件已到香港OK便利店，但第二天手機仍未收到訊息通知我可以去取貨，因要靠訊息中的編號給便利店店員核對取貨的。

於是致電去順豐問，職員好快發出訊息給我了。

黑仔事件二:

明明第一天見到集運份件已到香港OK便利店，亦收到手機訊息通知我可以去取貨，但當放工去到便利店取件時，便利店店員話份件已到分店，但電腦卻顯示件"仍在運送途中"，做不了交收，回到家后即刻打去順豐問。

順豐第二朝一早再send番同一個訊息給我，我再去OK便利店問，但份件"仍在運送途中"，仍做不了交收，於是又打去順豐問，並要求順豐自已打去OK便利店弄清楚，放工時嘗試再去取，件"仍在運送途中"，今次即時在便利店致電給順豐，讓順豐職員同OK便利店店員自己傾掂佢。

結果，第三天順豐通知我可以再去OK便利店取貨，順豐話係OK便利店系統有問題，當我放工去OK便利店取貨時，便利店郤話係順豐系統有問題。

對我來講，最重要係取到貨，及希望下次不會再出現問題!

黑仔事件三:

今次更絕，在淘寶確認付了集運運費后，完全無顯示"集運的物流情況"，到第二天傍晚，只見到多張集運訂單待我"確認收貨"，我估計份件已到OK便利店，但我又沒有收到手機訊息通知我可以去取貨，於是致電去順豐問，問時我要提供其中一張集運訂單的單號、物流的單號&快遞公司名及我在淘寶的用戶名。

當天順豐回覆我係淘寶的系統有問題，所以顯示不到集運的物流情況"，另因我份件超重，要改去順豐分店取貨，職員在電話中告知了我提貨的編號，我便可去取貨了，但之后我亦收到手機訊息通知我編號及可以去分店取貨。

總結 :

其實去便利店或分店取貨真係好方便，只希望咁黑仔的事件不要再發生!

溫馨提示:

要留意集運何時到達便利店，及是否收到手機訊息?

止咳陳皮

自從一仔上年8月返N班後成日病，連帶我地大人都一齊病，我多數係喉嚨唔舒服，初起時感覺喉嚨好乾，繼而咳，有黃痰。

六月時我病了一星期，睇了醫生食了抗生素，好了一星期后，估不到咁快又復發(應該怪自己唔戒口，食了酸辣豬潤米線)，再去睇醫生及食抗生素藥，之后變成夜晚瞓覺會咳醒，白天上班有時喉嚨癢到咳不停。

夜晩瞓覺咳係寒咳，以前試過去鴻福堂買熱的鱷魚湯飲，一日一次，連飲兩 - 三天，真的有效，瞓覺無再咳了。

白天喉嚨癢咳呢？以前都係要再睇醫生，今次恰巧同事在下午4點多時比了塊陳皮我試，大姆指甲咁大塊，含在口里，估唔到好work，直到回到家后，都好少咳。

第二天連忙問同事去邊到買？

新蒲崗衍慶街，近錦榮街，"x"的位置

間店叫"蔡榮發"，夾在 7-11 及 759 之間，街頭有間譚仔雲南米線

有多款陳皮，同事比我的係"甘草九制陳皮"，最右面黃色菠蘿粒旁果包

                                             甘草九制陳皮，$15

我會拎一大塊先，放在細膠袋里，每次再拎一細塊慢慢"含"

戒片後一個月的報告(2015-6-9) + 即棄廁板膠套

<3yr4mo>

結果 ～係完全成功!

除了頭一個星期有用片外，第六天開始戒夜片時，屋企/返學/去街，已無再著尿片或學習褲了。

第二個星期在屋企都有失手幾次，試過一次痾金金在底底上，因遲了出聲叫去廁所，要工人姐姐清潔(因一仔媽返了工)，亦試過幾次因一仔唔出聲，自己走去廁所v v，想企係到殊，而整濕了條褲。

第一個星期，一仔頻頻去廁所v v，一小時去幾次，第二個星期開始，減少去v v的次數了。

第一個星期，一仔主動講痾殊殊、痾臭臭會講到亂晒，所以在佢講痾殊殊卻開大時，一仔媽會話原來痾臭臭呀，好多，又同佢一起數痾了幾多舊。

到一仔講痾臭臭卻係v v時，一仔媽會同一仔講痾殊殊呀，好勁，好多殊殊，第二個星期開始多數講啱了。

基本上，戒片第二天開始，一仔每次都自己出聲叫去廁所，唔駛我地提佢，反而出街時，每次見到廁所，係我地大人擔心而問一仔需否去，怕錯過了，到一仔叫要去時，一時半刻揾唔到廁所，so far，好彩出街未失手過。

不過有時去廁所，無兒童廁所，要用大人廁所時，見到d 廁所板好污糟，於是在淘寶買了這款即棄廁板膠套，人仔18.9有十包，每包有4張，方便帶出街，但要留意，膠套用完要扔落垃圾桶，唔可以直接沖走。

用過廁板膠套兩次，第一次成功，第二次因一仔媽失手，抱一仔坐上廁板時，坐得太前，底底又無拉得低，結果一仔殊到係廁板套夾層里，殊完落地下時，整濕了㡳底。

如果女仔用，應該不會有殊到在廁板套里的問題出現，因女仔垂直殊殊，男仔卻向前殊，才殊到在廁板套㚒層里。

可能在學校係企係到殊，一仔對坐或企去殊殊都ok, 但每次係屋企坐，一仔要成條褲除走，若企，只需拉低條褲。

肚B媽介紹下面果款更正，前面長d仲好d，可以遮到前面少少咋!

http://item.taobao.com/item.htm?spm=a1z0d.6639537.1997196601.33.u8u2lT&id=13904260148


在屋企企係到殊，其實一仔唔夠高，起初買了一張矮凳比一仔企上去，但用用下，一仔爸教識一仔咪腳尖，每次叫一仔"突高"就夠高殊到了。

有時我地大人用緊廁所，一仔又要去時，會比potty佢用，又ok。

第二個星期開始戒夜片時，每朝早一起床，一仔要去殊殊，但漸漸的，可以食緊早餐或食完才去殊殊。

以前著片時，一仔多數每日開大一次，戒片后，有時一小時內開大兩次。

清潔方面，因一仔媽慣了用濕棉幫一仔清潔pat pat，所以，現在一仔開大后，會改用濕紙巾清㵖，一仔試過想自己清潔pat pat，當然唔成功啦！

係萬寧買，盒外有卡通圖案

係藥房買，反而無圖案，但价錢差不多

另有refill裝

小小分享
1. 當小朋友ready 戒片時，真的容易戒片d
2. 當小朋友開始抗拒用片
3. 初夏開始試戒
4. 識講少少殊殊、臭臭
5. 用普通㡳底便可
6. 痾濕了，唔好即刻換，要讓小朋友感受下"濕"的不舒服感覺
7. 每15-30分鐘問小朋友去唔去殊殊(一仔個case, 唔駛問，自己會出聲)
8. 可以的話，請老師幫手在學校一起戒

2015年父親節@西貢半月灣+厚德商場冒險樂園

<3yr4mo>

因一仔爸剛轉了份新工，暫時定了星期日放假，今年可以同一仔爸正日慶祝父親節，又因現在返工方便了，只需搭地鐵，連車都賣了，齊齊做搭車一族!

上次去半月灣，搭專線小巴無乜人排隊，但今次居然打蛇餅，好彩多車，排了大約十五分鐘，上到大概第十架專線小巴，又好彩無塞車，大概二十分鐘就到西貢了。

今次亦係在貓記買船票，今天見到船期表，最早一班回程係1:50pm，不過賣票嬸嬸話今天多船去半月灣，見到有船就上得船，不需跟船期表。另外一個新手賣票職員話一仔要買船票，賣票嬸嬸即刻指住攤檔上手劃的一米高刻度，話一仔都未過(有排啦)，唔駛買！

之後行去上船地點時，居然遇見燒腩仔媽一家三口，目的地亦係半月灣呢！

今次亦係搭小船，先去橋咀島，原來大約要二十分鐘，途中已下雨。

去到沙灘，連忙租locker、大傘及換衫，間中都有落雨，海水比上次凍，但都可接受！

今次一到沙灘就落水，完全忘了要搽防曬膏，好彩有上次的經驗 ：落水前才搽，回家后膊頭、背曬到甩皮又痛。於是今次在屋企出門口前搽定，第二天都無痛亦無甩皮。

起初一仔都玩得好開心，謝謝艾菲影的相片，好靚!

叫一仔同燒腩仔玩，一仔仍未識點樣同其他小朋友玩，只識向燒腩仔踢水!

后來見燒腩仔用水袖游水，我地都比一仔試，但我地太心急了，嚇怕了一仔，上岸后，一仔話要返屋企呀！

回程十二點多時，貓記來了一架好似遊船咁，有上下兩層，上了船，有個小朋友的職員收番張登船証，依架遊船看似比小船慢，又先去橋咀島，船程最后依然都係二十分鐘左右。

上船一陣，一仔已瞓著了，直到返到屋企，落車才醒，瞓了差不多45分鐘。可能眼瞓，一仔無乜胃口，平時lunch食一碗飯，今餐只食了幾啖，但食完經過冒險樂園時，一仔扭要去玩sir滑梯，我和一仔爸都心諗一仔唔駛瞓晏覺嗎？還有精力玩嗎？

一仔媽好多年無玩冒險樂園了，現在入會年費$20，會員買代幣有優惠，代幣入落會員卡里。

一仔見到依個三層高的波波池+滑梯(假日100個代幣全日任玩，包一個大人及小朋友)，第一時間想衝入去玩，但原來要著襪，好彩counter有得買，十元一對，最細19-21size，好彩一仔啱著。

玩到兩點時，要清場消毒半小時，之后繼續玩，見到坐係觀眾席的一仔爸居照瞓著了，而一仔仍精力充沛在三層高的波波池捐來捐去，難為一仔媽在後面跟住跑，到三點時，開始同一仔講三點半要走，每5分鐘提佢，到三點半叫要走時，一仔只扭了幾聲后，都乖乖跟住走。

三層高的波波池+滑梯，好正!

有幾條滑梯，條條都好滑!

估唔到一仔敢玩依個!

走時見到汽水機，一仔叫要買菊花茶，飲了大半盒，回家后試過一次肚瀉咁痾水。

又經過"點心皇"，一仔叫買雞扎食，終於肚餓了，回到家，沖完涼就食，食完話瞓覺，但上了床都係玩，最后到夜晚睇麻武則天十點半才瞓。

是夜，一仔叫醒了幾次，不知是否仍記住用水袖游水嚇怕了呢？

原本之前一仔成日叫搭專線小巴、搭船船、游水，今晚一仔重复了多次“no 游水”。