同一天（2/11），第二場面試，好彩一個係上午，另一個係下午，亦係今年最后一場面試！
面試時間 4:20 - 4: 50pm，4:30pm又係一仔食飯時間。
同早上一樣，今次3:45pm出門口，出門口前按着飯煲掣，又帶定奶、水做back up。
去到學校門口好多人，先登記，后排隊，等4:20pm開始入場，只可一個家長帶小朋友入去面試。
共要去三個場地。
第一個在一間課室，由校長講解面試有兩個環節，小組形式，有A - F 共六組，每組約6-8個小朋友，由老師觀察、評估小朋友的表現、大小肌肉能力。
一仔媽抱住一仔坐，一仔當然唔肯，所以聽校長講解聽到有頭無尾。
好似校長有話由於申請人太多，被錄取的，會抽簽編入上、下午班。
N班學費$2370，交十期。
書簿費$900，分開交上、下學期共兩期。
11月14-16日會通知面試結果，11月19日交註冊費$660。
校長又幽默話知道有d家長申請了多間學校，如果被其他學校取錄了的，請家長盡早通知，因今年的行政工作繁重好多，大家都明白啦!
第二個環節去一間課室，室內有兩張大桌，一張上面放了有圖案的畫紙及畫筆，另一張放了拼板、積木、一件會轉的玩具。
拼板無一仔拼開的數字、字母、形狀，一仔見到無興趣，又拉一仔媽隻手走出課室，因一仔留意到課室外的地墊有好多大大舊的積木，一仔媽又捉番一仔入課室。
今次改去有畫紙的桌，一仔畫了兩下就無興趣。
好彩依個時候見到另一張桌上有件會轉的玩具，又有積木，一仔先肯玩。
老師見到，叫"一一"叠高d積木，一仔無反應，一仔媽即叫"一仔"叠，但一仔又係無叠，之后慢熱的先叠，但唔知老師有無睇到呢?
其間隔離的小朋友叠到六、七層高，一仔想去攞人地的，一仔媽話no no ，好彩都肯聽媽媽話，但都比老師見到，唔知会否扣分呢？
第三個環節去課室外的大空地玩，即上次开放日果個，有sir滑梯等等。
上次開放日影的
有得玩，一仔當然好開心。
依次個埸地还有其他组的小朋友，所以好多人，都無留意老師幾時做評估？
最后走既時候，每個小朋友獲贈一個迷你搖鼓，幾得意。
原來我地之后还有最后一班面試的小朋友。
回到家，差不多5点，雖然掛了一号波，但好彩整天都無落雨。
********************************************
面試后的感想
依間學校真係好好，校網的資料好充足，又夠update。
面試中校長又親自及主動講解學费及通知日期，很替家長着想。
面試雖然多人，但又好快好有秩序咁完成，証明學校的行政管理非常好。
上教育局的網址睇过，學校上年上午班有38人，下午班有6人（点解可以咁少人既？）。
按理推，即明年上、下午班各可收38人。
但那么多小朋友面試，覺得一仔被錄取的機真係一半一半咋。
面試前要填一份問券，一仔媽在回答時借題提到一仔識拼唒d數字、英文字母板，唔知会否加分呢？
但一仔媽又用了好多塗改液，唔知会否被扣分呢？
如果下次再有問券填，会先拎去影印一張，填好后先再copy 番答案去正本到。
其实，另外報了维景湾及救世軍明德，但太多人排隊，今年連in的機会都無。
回家同一仔爸講，擔心一仔明年無N班讀呢，一仔爸話隨遇而安。
实情係，一仔爸根本唔明白，如果N班唔收，由於龙年效应，相信到時in K1会更加激烈，到時要報麻要搭校車的幼稚園了。
臨回家前工人姐姐幫手影了一張相，有d走了焦。
一仔，你望什么呀？
係未同媽媽一样擔心明年無N班讀呀？
唔驶擔心啦，到時交比媽媽再打算吧！
