先講開放日當天。
开放日派發的單張，講明不可以拍攝或錄影！
由於人數太多，要在指定時間到達，亦不需帶小朋友。
一仔媽的指定到逹時間是1230，參观時間1245-1345 (相信亦係當天最后一批入場家長)。
一仔爸媽差不多1230到達，門口已有一條龍排緊入去，但見有d家長都有帶小朋友去呢。
在門口，每位家長都會獲派發印有小朋友名字的貼紙，貼在身前。
又獲派發開放日單張，講解課室位置及有什麼示範。
一入門口，跟大隊去了大門口左手邊的課室，睇老師和兩位同位同學示範英文拼音，又幾好!
一仔媽當然無偷拍，依張相係其他救世軍幼兒學校網址copy下來的。
跟住去了大門口右手邊的課室睇蒙特梭里教學示範，由鍾老師主持 ~ 她有些似麥玲玲呢，面圓圓，戴眼鏡。
原本話英文同蒙特示範只可選一項睇，可能人流很難安排，最后兩樣都睇晒，真係好!
示範一:
一個N2 (救世軍幼兒學校用 N1 - N4，唔用 K1 - K3 名稱)女同學示範"砌粉紅塔"。
張相又係其他學校網址copy來的。
依個蒙特教學方法可以訓練小朋友手眼協調，將一個粉紅磚由大至細向上塔，每一個都要靠向同一個角位，小朋友最後要用一粒1cm x 1cm的小磚，度下余下的兩邊是否都剩1cm距離。
示範二:
一個N4男同學示範"銀行遊戲"(唔知有無記錯名呢?)。
一粒珠仔代表數字個位。
一行十粒串珠代表十位。
一塊一百粒代表百位。
一舊磚一千粒代表千位。
鍾老師請在場家長出一個千位數字，如 "4385"。
男同學會取4舊磚 + 3塊 + 8行 + 5粒珠，合共 "4385"。
依個方法可以教小朋友"實質"去感受數字，而不是去死記。
課室里亦有另外 4 - 5個女同學做其他簡單的示範，如從一個杯倒水去另一個杯。
最后，去了戶外的操場(不屬於學校的範圍)睇"水"實驗的示範，真係大開眼界!
實驗一:
一個男同學示範，檯上有一條好似蚯蚓咁彎彎弓弓形狀的大膠明膠管口，同學在一邊高位入水，水會在另一邊低位流出膠杯里。
之后，男同學還要講解水流的原理。
實驗二:
女同學手拿一支注滿了8成的水樽。
她擰開了樽蓋，原來水樽早被吉穿了幾個窿，因空氣的關係，水從窿里射出來。
而且，高窿的水射得遠d，低窿的水射得近d，原理 ~ hehe，一仔媽已經忘了同學說什麼了(一仔爸半途已走了，因趕去上班)。
實驗三:
有一盆水，有幾件物件 : 細西瓜、石頭、膠匙、鐵匙等等。
男同學先問在埸家長，估邊一樣會沉、邊一樣會浮?
又講解原因，如空心會浮(西瓜)、實心會沉(石頭)、輕會浮(膠匙)、重會沉(鐵匙)等等。
嘩，依d實驗，一仔媽要讀中學時先有，估唔到現在幼稚園都有教!
臨走前，近學校門口的長檯上見到有幾本關於學校資料的藍色大folder。
有講，例如 :
學費 x 12期，2013年度 :
N1 全日，大約$3500/月
N2 - N4 全日，大約$2300/月
其他的，一仔媽已忘了。
******************************************
參觀后的感想:
感覺上依間學校比其他之前兩間(慶恩及煜明)都細間d。
當天蒙特示範房冷氣不足，又無開風扇。
有些家長提出問題，例如 : 主任回答11月开始面試，但係係in 2011年頭申請的！
N1会收30個學生，但in会in 60-70人。
開放日單張上寫已有1000個小朋友輪候，但主任話仍接受新入學申請!
****************************************
其間，一仔媽亦私底下問了主任一個一直很想知的問題答案。
一仔二月出世，但到五月一仔姑媽提醒，一仔媽先开始報名。
果時仍住緊舊屋，未知幾時搬新屋，所以，舊屋、新屋兩邊的學校都報名。
而舊屋，到現在一間的面試信都無收到 >>> 真係好彩搬來了新屋 >>> 現在收到兩封 (慶恩同厚恩)，相信今年都係得依兩間要面試N班咋！
果時報了幾間救世軍，間間回复時都有學费收據回條 + 輪候編号，唯獨明德只得收據。
當時有打电話去明德問，又問唔到。
趁開放日問主任，原來收據上的编號已是輪候编号，一仔果张係034xx，即係排緊4百幾！?
但又有點唔明，當天開放日的參觀時間，一仔爸媽已是最後一批，那之后5百幾的編號，係未今次未受到邀請參觀學校呢?
其實，再睇番学校網址，关於学校的資料唔多，趁开放日瞭解的，係多了些，但仍不足夠！
但似乎，如果輪到一仔面試，都要明年，有得讀，可能都係 N2 或 N3了!
另外，在此補充，救世軍學校有分兩種，學校名是"幼兒學校"的，是全日班，才會用蒙特教學。
其他幼兒學校的資料，間間學校的網址內容大同小異，但有d會詳盡d，而明德的網址，係最簡單那個design。
如果學校名是"幼稚園"，半日班的，不會用蒙特教學。
